Navigation

Inhaltsbereich

Interpellaziun concernent la violaziun dal schuldà S. en la caserna da Cuira

Sessiun: 28.11.2001
En ina scola da recrut en la caserna da Cuira èsi vegnì l'october 2001 tar in eclat. Igl è vegnì enconuschent ch'il schuldà S. saja regularmain vegnì offendì e vegnì tractà malamain. En la 14avla emna da recrut èn culminadas las violaziuns verbalas e psichicas en acts da violenza dasper Panaduz. Suenter è S. sa decidì d'infurmar l'adjutant dal stab davart sia paina. Silsuenter èn er las medias vegnidas attentas sin il cas extrem.
Il medem mument han ils superiurs dal militar decretà in scumond d'infurmar. Sulettamain il cumandant da la scola militara ha duì infurmar la publicitad. Envers la "Tagesschau" e la "Südostschweiz" ha quel dà da ponderar ch'il schuldà S. haja er contribuì il sieu ch'i saja vegnì tar quella situaziun. I saja usità ch'i vegnia tar ils recruts qua e là tar "sfruschadas". Eventualmain ha il litinent G. schizunt cumandà quest act da violenza a Panaduz.
Da quests eveniments na pon mai pli mai vegnir tolerads. Schizunt sch'il schuldà S. fiss sa fatgs culpaivels d'in cumportament sbaglià, avessan existì pussaivladads suffizientas per sancziuns disciplinaras. Ch'igl è dentant mai vegnì uschè lunsch, lascha concluder che las decleraziuns dal cumandant da la scola militara sajan nagut auter che pretensiuns che servan sulettamain per zuppentar l'atgna disditga.
Tenor l'atgna descripziun è il schuldà S. vegnì pitgà pliras giadas a moda collectiva. A Panaduz è el vegnì lià vi d'in vehichel e patangà avant ils egls dal litinent. Questas violaziuns èn terriblas e ston vegnir franadas ina giada per adina. Gist en la scolaziun militara èn da tolerar naginas violenzas. Ils superiurs ston adina esser abels da tractar correctamain ils recruts als confidads. Las persunas dal cader ch'èn culpaivlas, che n'adempleschan betg lur pensum e che sustegnan schizunt l'escalaziun da tensiuns ston vegnir remplazzadas immediatamain e vegnir fatgas responsablas per lur agir.
La regenza vegn intimada da respunder a las dumondas suandantas:
1. È la regenza er da l'opiniun che questa violenza sco quai ch'ella è vegnida descritta precedentamain n'è da tolerar en nagina maniera?
2. Co giuditgescha la regenza la decleraziun dal cumandant da la scola militara: "In der Armee ist es gang und gäbe, dass Soldaten eine Abreibung abbekommen." Sco er: "Dass den Kameraden irgendwann der Kragen geplatzt sei, könne er verstehen."?
3. Vegn la posiziun dal cumandant da la scola militara sco instructur da la nova generaziun militara anc giuditgada per supportabla?
4. Vegnan ils uffiziers ed ils cumandants da la scola militara scolads psicologicamain en lur furmaziun? Sche gea, ha quella disditg? Sche na, nua è ina scolaziun psicologica previsa?
5. Han ils schabetgs consequenzas per l'ulteriura carriera militara dal cumandant da la scola militara?
6. È la regenza pronta da sustegnair la victima da vart dal chantun cun pled e fatg ed eventualmain er finanzialmain?

Cuira, ils 28 da november 2001
Name: Schmutz, Trepp, Looser, Arquint, Meyer, Noi, Pfenninger, Schütz

Session: 28.11.2001
Vorstoss: rg Interpellation

Resposta da la regenza

Las violaziuns dal schuldà S. l'october 2001 dasper Panaduz na pon betg vegnir toleradas en nagina guisa. Cunzunt na dastgan ils superiurs betg tolerar tals eveniments en ina scola da recrut.

Il cumandant da la scola da recrut da l'infantaria da muntogna a Cuira ha udì da las violaziuns la saira dal medem di ed ha er udì per l'emprema giada dals problems dal recrut S. cun ses camerats. Il cumandant da la scola militara ha reagì spert cun isolar e relaschar l'auter di il litinent. Il di suenter è l'entira scola vegnida infurmada da l'eveniment. Igl è vegnì exprimì cler e bain en quest senn che talas acziuns na vegnan betg toleradas en nagina maniera. Ils recruts participads a las violaziuns èn vegnì chastiads disciplinarmain. Cunter il litinent è vegnì introducì ina procedura da dretgira militara che n'è anc betg terminada. Il cumandant da la scola militara ha mussà cun ses proceder immediat e consequent ch'el na tolerescha betg talas acziuns.

Igl è enconuschent ch'i vegn qua e là tar violaziuns en las scolas da recrut. Quai n'è dentant betg en l'emprima lingia in problem da las scolas da recrut mabain plitost in problem da la societad. Ina studia publitgada il cumenzament da december 2001 ha mussà che 1.5% dals giuvenils èn pronts per la violenza. Questa prontezza prendan els deplorablamain er cun els en la scola da recrut.

Las dumondas tschentadas en l'interpellaziun pon vegnir rispundidas suandantamain:

1. La regenza è da la medem'opiniun sco ils interpellants che questa violenza n'è betg da tolerar e ch'igl è d'interprender tut il pussaivel per supprimer sumegliantas violaziuns.

2. Las decleraziuns dal cumandant da la scola militara en las medias electronicas conferman ch'el n'è betg vegnì cità correctamain en las gasettas. Cun punir tut ils participads ha il cumandant da la scola militara dà da chapir cler e bain ch'el na tolerescha betg talas acziuns.

3. Il cumandant da la scola da recrut d'infanteria vegn nominà dal directur da l'uffizi federal per las truppas da cumbat suenter avair consultà il schef da las truppas terrestras. Perquai ha il directur da l'uffizi federal per las truppas da cumbat da
giuditgar, sch'il cumandant da la scola militara da Cuira è anc supportabel sco in
structur da la nova generaziun militara. Suenter avair consultà il directur numnà e
sin fundament da las actas na vesa la regenza dentant nagin motiv per mesiras
dals uffizis federals responsabels cunter il cumandant da la scola militara.

4. En las scolas da tut ils stgalims da cader, cunzunt er en las scolas d'uffiziers, vegn il cader scolà psicologicamain. Las persunas che vegnan scoladas uschia han alura sco en tut ils champs da la vita d'applitgar la savida teoretica en furma adattada en la pratica. Latiers poi vegnir sco dapertut tar valitaziuns sbagliadas e cumportaments fallads.

5. Ils uffiziers dal stab pli auts vegnan elegids e promovids dal cussegl federal. Ils uffizis federals designan ils cumandants da las scolas da recrut da l'infanteria. Questas instanzas (federalas) èn er responsablas per l'ulteriura carriera militara dals cumandants da las scolas militaras. La regenza na po betg prender posiziun en chaussa. Malgrà tut èsi tuttina da constatar, cun rinviar a la resposta sin la dumonda trais, che negins indizis èn avant maun ch'ils eveniments dasper Panaduz pudessan esser dischavantagius per la carriera militara dal cumandant da la scola militara.

6. I n'è betg l'incumbensa dal chantun da porscher agid a persunas ch'èn obligadas da prestar servetsch militar. Per quai è responsabla la confederaziun. Dentant ston er las instituziuns da la confederaziun spetgar ils resultats da l'inquisiziun militara per uschia pudair far in maletg cumplessiv da la situaziun.