Navigation

Inhaltsbereich

Interpellaziun concernent il Grischun e l'entrada en la ONU

Sessiun: 28.11.2001
Tenor las retschertgas da l'institut da perscrutaziun SRS appartegna il chantun Grischun anc adina tar ils chantuns indecis, q.v.d. igl è anc intschert sch'ina maioritad da las Grischunas e dals Grischuns metta en l'urna ils 3 da mars in GEA per entrar en la ONU.
Enconuschentamain na dovri per che la Svizra possi entrar, abstrahà dal Vatican, sco ultim pajais dal mund en la cuminanza internaziunala betg be ina maioritad dal pievel, mabain er ina maioritad dals chantuns.
Sco chantun da turissem cun in'auta quota da turists da l'exteriur e sco chantun al cunfin cun il pajais neutral e commember da la ONU Austria e cun l'Italia fissi catastrofal, sch'i vegniss tramess segns isolaziunistics ord il Grischun.
Plinavant vegnissan mendras las cundiziuns per pudair far turnar il WEF 2003 a Tavau e cun quai er las discussiuns davart il conflict nordsid e davart ils problems da l'economia mundiala.
En quest connex supplitgeschan las interpellantas ed ils interpellants la regenza curtaschaivlamain da rispunder a las dumondas sutmenziunadas:
1. Parta la regenza ils fastidis da las interpellantas e dals interpellants ch'in na ord il Grischun pudess avair consequenzas negativas per las interpresas e per ils lavurants e cunzunt per il turissem da noss chantun?
2. Parta la regenza l'opiniun ch'in na ord il Grischun pudess reducir la probabilitad ch'il WEF 2003 turnia puspè a Tavau?
3. È la regenza pronta d'infurmar la populaziun davart las consequenzas eventualas ch'in na da la Svizra avess per la Svizra e particularmain per il Grischun?
4. Parta la regenza l'opiniun dal cussegl federal che la neutralitad da la Svizra na vegnia betg tangada entras ina entrada da la Svizra en la ONU sco quai che quai vala er per auters pajais ch'èn gia commembers da la ONU?

Cuira, ils 28 da november 2001
Name: Trepp, Trachsel, Capaul, Ambühl, Arquint, Augustin, Bachmann, Berther (Mustér), Biancotti, Brüesch, Bucher, Bühler, Büsser, Butzerin, Casanova (Cuira), Cathomas, Catrina, Christ, Christoffel, Claus, Conrad, Farrér, Feltscher, Frigg, Giacometti, Giuliani, Gunzinger, Hanimann, Hardegger, Hartmann, Hess, Jäger, Joos, Locher, Loepfe, Looser, Luzio, Maissen, Marti, Meyer, Nick, Noi, Parolini, Peretti, Pfenninger, Pfiffner, Righetti, Rizzi, Robustelli, Roffler, Sax, Scharplatz, Schmid (Sedrun), Schmid (Spleia), Schmutz, Schütz, Suenderhauf, Thomann, Toschini, Tremp, Trepp, Tuor (Mustér), Tuor (Trun), Wettstein, Zanolari, Zindel

Session: 28.11.2001
Vorstoss: rg Interpellation

Resposta da la regenza

En sia consultaziun pertutgant la dumonda d'ina participaziun da la Svizra a l'Organisaziun da las Naziuns unidas (ONU) dals 19 da settember 2000 al departament federal d'affars exteriurs è la regenza s'exprimida cleramain per ina entrada en l'ONU. Quai cun bunas raschuns.

Ina entrada en l'ONU è cumpatibla cun la politica da neutralitad da la Svizra. Sche la cuminanza mundiala prenda mesiras via organs da l'ONU cunter stadis u singuls acturs che cuntrafan a l'urden internaziunal, èn pussaivlas mesiras militaras u sancziuns economicas. Tar operaziuns militaras n'èn ils stadis commembers dentant betg obligads da metter truppas a disposiziun. Per quest intent dovri cunvegnas spezialas.
Sancziuns economicas ston percunter vegnir sustegnidas; cas cuntrari sa metta in stadi da la vart dals aggressurs. La Svizra sustegna dapi passa 10 onns las sanc
ziuns da l'ONU. Nagin l'ha perquai rinfatschà fin oz ina violaziun da la neutralitad.
Stadis neutrals sco l'Austria, Svezia, Finnlandia u Irlandia èn medemamain commembers da l'ONU, senza che quai haja fatg donn a lur neutralitad. La participaziun a l'ONU è er finanzialmain da giustifitgar. La Svizra presta gia oz contribuziuns considerablas vi da programs d'agid da l'ONU (agid da svilup, agid umanitar, engaschaments en cas da catastrofas). Ella metta a disposiziun experts per la conferenza da discharmament a Berna. Ultra da quai è ella stada participada activamain tar l'intermediaziun da pasch ed en cas da conflicts (p. ex. en la Sahara occidentala, en il Caucasus u sin il Balcan). Il commembradi cumplain havess be per consequenza che la Svizra havess da pajar a l'ONU ina contribuziun per 10 pertschient pli auta.

La regenza considerescha l'entrada en l'ONU ultra da quai sco act da solidaritad. Collavuraziun internaziunala, svilup e segirtad èn da fitg gronda muntada per tuts pajais, per exempel a vista dals problems da migraziun e d'asil. Ultra da quai duai
e sto la Svizra prestar ina contribuziun commensurada. La Svizra profitescha il mument da las operaziuns da l'ONU per mantegnair la pasch, senza sa participar
finanzialmain.

Las dumondas pon vegnir respundidas sco suonda:

1. L'ONU e sias organisaziuns èn senza dubi in factur economic da las qualas la Svizra profitescha. Uschia furnescha la Svizra annualmain rauba (medicaments, victualias etc.) en la valita da blers milliuns francs. La totalitad da las organisa
ziuns internaziunalas ha pajà l'onn 1999 be a Genevra salaris en l'import da 1,9 milliardas francs. Quant lunsch ch'in na a l'ONU haja en il Grischun consequenzas per l'economia ed il turissem è grev da dir. Studis correspundents mancan. Exempels d'autras destinaziuns da turissem cumprovan che turists na laschan betg influenzar fitg d'eveniments politics cura ch'i sa tracta da tscherner il domicil da vacanzas. Ultra da quai vegni vitiers che la Svizra gioga gia oz ina rolla activa en las diversas organisaziuns spezialas da l'ONU e ch'ins prenda enconuschientscha dad ella sin quests secturs a moda positiva.

2. La decisiun, schebain il WEF 2003 haja puspè lieu a Tavau, vegn dà conuschent il pli tard ils
4 da favrer 2002 al WEF a New York. La votaziun davart l'entrada en l'ONU ha dentant lieu pir il mars 2002. In connex direct tranter ONU e WEF 2003 na po per quest motiv betg vegnir construì.

3. La regenza è s'exprimida gia a chaschun da diversas occurrenzas per ina entrada da la Svizra en l'ONU ed ha motivà questa posiziun. Quai vegn ella er a far cun autras chaschuns che sa porschan.

4. La regenza parta en quest reguard l'opiniun dal cussegl federal. Ina motivaziun correspundenta ha ella gia preschentà en l'introducziun da la resposta a questa interpellaziun.