Navigaziun principala

Cuntegn da la pagina

Interpellaziun concernent la salarisaziun da substituziuns da persunas d'instrucziun e da las mussadras en congedi

Sessiun: 29.01.2002

Tenor l'art. 12a al. 2 da l'ordinaziun davart la salarisaziun dals magisters (DG 421.080; OCG) presta il chantun contribuziuns vi dals custs per substituziuns da persunas d'instrucziun e mussadras congedidas en il rom da la lescha da scola e da la lescha da scolina. En il medem artitgel è fixa che la salarisaziun per la substituziun sa drizza tenor las tariffas minimalas dal salari da basa.
Tenor l'art. 5 OCG fixan bain las vischnancas il stgalim da paja da lur persunas d'instrucziun e da lur mussadras, il departament d'educaziun fa dentant las recumandaziuns correspundentas.
Sin il fegl d'infurmaziun e las annexas appartegnentas davart la salarisaziun da las persunas d'instrucziun a la scola publica, edidas dal departament d'educaziun, cultura e protecziun da l'ambient, fa il departament la recumandaziun da quintar la tariffa per l'indemnisaziun per substituziuns sin fundament dal stgalim 0 da paja.
L'onn 2001 ha la dretgira administrativa dal chantun Turitg prendì ina decisiun en la medema chaussa ed ha approvà ina atgisa da classificaziun d'ina magistra primara. La magistra primara pertutgada aveva instruì durant circa 20 onns en ina scola primara en uffizi cumplain e suenter sco substituta. En il chantun Turitg vegnan pajadas las substituziuns sin fundament da l'ordinaziun da la regenza tenor il „stgalim d'entschatta“, premess che la substituziun cuzza main che 3 mais. Quai ha effectuà che la magistra primara numnada è vegnida classifitgada sco substituta puspè sco ina noviza. Ella è sa dustada cunter questa degradaziun ed è sa sentidada discriminada sco dunna, cunquai che cunzunt dunnas èn pertutgadas da questa reglamentaziun.
La dretgira administrativa ha constatà en la decisiun ch'i na dettia nagin motiv raschunaivel e pli u main impurtant da negliger en connex cun questas substituziuns las experientschas professiunalas. Il „stgalim d'entschatta“ saja patertgà per emploiads che na disponian anc betg da las premissas necessarias per ademplir ina funcziun.

Nus supplitgain la regenza da respunder las suandantas dumondas:

1. Considerescha la regenza causalmain per giustifitgà da far la decleranza pauschala tenor la quala la tariffa per la salarisaziun da substituziuns saja da calcular sin fundament dal stgalim 0 da paja?
2. Ha la regenza conuschientscha da la decisiun suramenziunada da la dretgira administrativa dal chantun Turitg?
3. N'è la regenza betg er da l'opiniun che la recumandaziun pauschala saja d'examinar da nov ed eventualmain da midar en il rom da la proxima revisiun da la OCG?

Cuira, ils 29 da schaner 2002.

Name: Meyer, Bucher, Arquint, Bischoff, Caviezel (Cuira), Christ, Claus, Frigg, Hess, Jäger, Locher, Looser, Märchy, Noi, Pfenninger, Pfiffner, Robustelli, Scharplatz, Schmutz, Schütz, Trepp, Walther, Zindel

Session: 29.01.2002
Vorstoss: rg Interpellation

Resposta da la regenza

    1. Tenor l'art. 21 da la lescha da scola surpiglia il chantun entiramain ils custs per las substituziuns en connex cun la scolaziun da perfecziunament da novs roms d'instrucziun e tenor l'art. 36 da la lescha da scola po il chantun prestar contribuziuns en l'autezza da 20 fin 55 pertschient dals custs da las substituziuns per la scolaziun da perfecziunament e per la furmaziun supplementara. En l'art. 12a al. 2 da l'ordinaziun davart la salarisaziun dals magisters (OCG) vegn alur menziunà ch'il chantun prestia contribuziuns vi dals custs da substituziuns per persunas d'instrucziun e mussadras en congedi da perfecziunament e scolaziun intensiva da perfecziunament en il rom da la lescha da scola u da la lescha da scolina. Plinavant vegn constatà che la salarisaziun da las substituziuns sa drizza tenor las tariffas minimalas dal salari fundamental. Per tut las ulteriuras absenzas d'ina persuna d'instrucziun en il senn da l'art. 8a OCG (malsogna, accident, gravidanza, servetsch militar e.u.v.) sto purtar il purtader da la scola sez ils custs da las substituziuns. Il purtader da la scola è il patrun da las persunas d'instrucziun. Las vischnancas fixeschan tenor l'art. 5 OCG ils stgalims da paja da lur persunas d'instrucziun. Consequentamain èsi er giustifitgà ch'ellas fixeschan la classifica- ziun da las salarisaziun per las substituziuns. Cunquai che las vischnancas han da surpigliar sco patrunas, cun excepziuns dals cas numnads da scolaziun intensiva da perfecziunament e da congedi da perfecziunament, entiramain tut ils ulteriurs custs da substituziun vegnì surlaschà ad ellas, sch'ellas vulan surpigliar er en quests cas las tariffas minimalas dal salari fundamental. La regenza è dentant pronta d'incaricar il departament d'educaziun, cultura e protecziun da l'ambient da far ina remartga en il fegl d'infurmaziun davart las pajas da las persunas d'instrucziun a las scolas popularas, che vegn edì annualmain a chaschun da la proxima repassada (december 2002), tar la posiziun da las tariffas da substituziun, tenor la quala las tariffas da l'indemnisaziun valan sulettamain per la subvenziun; per la fixaziun individuala da la paja da las persunas d'instrucziun che surpiglian la substituziun saja l'experientscha da fin uss da resguardar commensuradamain. Cun quai duain vegnir eliminadas las inegualitads en la fixaziun da la paja tar las differentas modas da substituziun. A chaschun da la fixaziun da las indemnisaziuns da las substituziuns da lezzas uras èn ins stà da l'avis ch'i sajan cunzunt persunas giuvnas che surpiglian ina funcziun da substituziun. Plinavant è vegnì resguardà che las persunas da substituziun n'han betg la medema responsabladad en il manaschi da scola sco las persunas d'instrucziun elegidas per temp nunfixà.

    2. La regenza ha conuschientscha da la decisiun da la dretgira administrativa menziunada en l'interpellaziun. La basa da quest'interpellaziun è dentant plitost la decisiun da la dretgira administrativa da Basilea-Champagna dals 26 d'october 1994. La situaziun effectiva tractada en questa decisiun è dentant en quest senn differenta da la situaziun en il chantun Grischun, che la OCG fixescha sulettamain las tariffas da subvenziun e betg la classificaziun concreta da las pajas da las persunas d'instrucziun. L'instanza d'engaschament è en il chantun Grischun la vischnanca. En il cas da la decisiun menziunada da la dretgira administrativa dal chantun Basilea-Champagna è succedida la fixaziun da la paja tras l'inspecturat da scola sa basond sin in'ordinaziun da la regenza davart la salarisaziun dals substituts a las scolas.

En connex cun la proxima revisiun da l'ordinaziun davart la salarisaziun dals magisters vegn examinada la dumonda d'indemnisaziun da las funcziuns da substituziun tar la scolaziun da perfecziunament e scolaziun intensiva da perfecziunament. Sco mesira immediata vegn la proxima brev da recumandaziun dal departament d'educaziun, cultura e protecziun da l'ambient precisada. Dal rest èsi la chaussa da l'instanza d'engaschament da fixar il stgalim concret.

Datum: 19. favrer 2002