Navigaziun principala

Cuntegn da la pagina

Interpellaziun concernent la scolaziun da persunas d'instrucziun per il rom „economia da chasa“

Sessiun: 29.01.2002
Igl è gist ed impurtant ch'er en ils novs uraris dal stgalim secundar 1 (scola reala/scola secundara) vegnia menziunà obligatoriamain er vinavant il rom „economia da chasa“.

Ils 26 da november 2001 ha la regenza grischuna fixà las cundiziuns structuralas essenzialas per il studi a la scol'auta professiunala da pedagogia. Ils moduls pon cumpigliar enconuschentamain be curs d'instrucziun per la scolina e per la scola primara. Las persunas d'instrucziun dal stgalim secundar 1 na vegnan betg scoladas a la SAP.

En quest connex fan las interpellantas ed ils interpellants las sequentas dumondas:

1. È er la regenza da l'avis ch'il rom „economia da chasa“ mantegnia er en il futur sia gronda giustificaziun e duaia vegnir instruì er vinavant sco rom obligatori sin il stgalim secundar 1?

    2. Co pon ins garantir a lunga vista ch'en il Grischun stettia a disposiziun in dumber suffizient da persunas d'instrucziun scoladas per il rom „economia da chasa“, sch'adina daplirs auters chantuns desistan dal rom „economia da chasa“?

    3. Qualas persunas d'instrucziun vegnan ad esser autorisadas a media vista d'instruir il rom „lavur da maun cun textilias“ sin il stgalim secundar 1?

Cuira, ils 29 da schaner 2002

Name: Jäger, Frigg, Butzerin, Ambühl, Arquint, Bachmann, Bär, Barandun, Beck, Berther (Mustér), Bucher, Bühler, Cathomas, Catrina, Cavegn, Caviezel (Cuira), Caviezel (Pitasch), Christ, Dalbert, Darms, Dermont, Furrer, Giuliani, Hess, Joos, Kehl, Koch, Lardi, Locher, Looser, Luzi, Luzio, Meyer, Nick, Noi, Pfenninger, Pfiffner, Robustelli, Scharplatz, Schmutz, Schütz, Tremp, Trepp, Zindel, Zinsli

Session: 29.01.2002
Vorstoss: rg Interpellation


Resposta da la regenza

La scolaziun da magistras da lavur da maun e d'economia da chasa che vegniva purschida fin uss als seminaris da lavur da maun e d'economia da chasa - sco p.ex. er a la scola da dunnas dal Grischun - maina ad in diplom che na vegn betg renconuschì en tut la Svizra. Considerond questa regulaziun che na vegn betg sustegnida dal chantun Grischun ha la regenza concludì da desister da la purschida d'in studi da magistra da lavur da maun e d'economia da chasa a la scol'auta professiunala da pedagogia. Ils roms lavur da maun ed economia da chasa vegnan integrads tenor ils reglaments che vegnan applitgads en las scolaziuns per persunas d'instrucziun da scola primara (lavur da maun) resp. dal stgalim secundar I (economia da chasa e lavur da maun). Il rom lavur da maun (lavur da maun cun textilias e zambregiar) vegn purschì sco rom da studi per il stgalim primar a la scol'auta professiunala da pedagogia. La regenza è dal medem avis sco ils interpellants che l'instrucziun d'economia da chasa duaia vegnir purschida vinavant sco rom d'instrucziun al stgalim superiur da la scola populara.

Pertutgant las dumondas dals interpellants piglia la regenza en detagl posiziun sco suonda:

    1. La regenza è da l'avis ch'il rom economia da chasa duaia vegnir instruì er vinavant sco rom d'instrucziun obligatori al stgalim superiur da la scola populara. En ils novs uraris ch'èn vegnids deliberads la stad 2001 da la regenza ha quest rom d'instrucziun la medema impurtanza sco fin uss.

    2. En quellas scolas autas che scoleschan persunas d'instrucziun per il stgalim secundar I, è il rom economia da chasa in element da la purschida da roms da studi. Ins po partir dal fatg che quai restia er garantì. Las persunas d'instrucziun per il rom economia da chasa che vegnivan scoladas fin uss en ils seminaris mantegnan er vinavant lur dretg da dar quest'instrucziun en il chantun Grischun. L'impurtanza da questas persunas d'instrucziun entaifer il collegi dal stgalim superiur vegn anc a s'augmentar, perquai che lur collavuraziun gida a francar quest rom fundamentalmain en la scola er en il futur. Er en auters chantuns sa mussi che l'impurtanza dal rom economia da chasa vegn sustegnida en in vast senn da la sociopolitica.

    3. Las persunas d'instrucziun per il stgalim secundar I èn autorisadas, cun ina
    selecziun da roms correspundenta, d'instruir il rom „lavur da maun cun textilias“ al stgalim superiur da la scola populara. Medemamain vegnan persunas d'instrucziun ch'han frequentà ina scolaziun tradiziunala sco persuna d'instrucziun da lavur da maun ad in seminari che vegniva renconuschì pli baud ad avair er vinavant il dretg da dar quest'instrucziun al stgalim superiur da la scola populara dal Grischun.

    Datum: 26. da favrer 2002