La structuraziun dal program d'instrucziun da la scol'auta professiunala da pedagogia a Cuira è uschè impurtanta per las persunas d'instrucziun futuras dal Grischun talian ch'ella surpassa l'aspect puramain scolastic.
Sco che nus savain vegnan repartids ils differents roms d'instrucziun da la scol'auta professiunala da pedagogia che vegn creada en uschenumnads moduls da differenta durada. In da quests furma l'instrucziun specifica per la professiun da magister, l'auter è deditgà a l'instrucziun pratica ed al stretg contact cun la realitad scolastica.
Quai che concerna l'instrucziun specifica dals magisters essan nus da l'avis che almain la mesadad dal temp d'instrucziun duess vegnir fatg diever da la lingua taliana. Ultra da quai rendain nus attent al fatg che l'instrucziun pratica duai succeder en emprima lingia en las vals dal Grischun talian.
Questas pretaisas sa basan sin ils differents motivs che vegnan resumads sco suonda:
- Las futuras magistras ed ils futurs magisters da mintga gruppa da minoritad linguistica dal chantun (uschia er quels da lingua rumantscha) ston pudair gudair ina instrucziun da magister specifica e commensurada en lur lingua materna.
- Igl è necessari d'extender la cumpetenza linguistica da las magistras futuras e dals magisters futurs che vegnan ad exercitar lur professiun en las valladas da lingua taliana. Da quai èn surtut pertutgads quels scolars e quellas scolaras che han fatg ina maturitad bilingua.
- Ina instrucziun orientada per gronda part tenor la lingua tudestga fiss in impediment considerabel - per betg discurrer d'in motiv d'exclusiun - per ils candidats e las candidatas per l'instrucziun da magister che vegnan dals gimnasis dal Tessin. Las consequenzas extremamain negativas fissan quellas che l'approvaziun e la coerenza da las persunas d'instrucziun activas en il Grischun talian na fissan betg pli garantidas. Ultra da quai avess il regress da las candidatas e dals candidats mesolcinais er in effect negativ sin ils Bergiagliots ed ils Puschlavins, perquai ch'in eventual dumber minimal da scolaras e scolars na pussibilitass betg pli da pudair porscher moduls en lingua taliana.
- Igl è impurtant ch'i sajan preschents docentas e docents da lingua materna taliana per l'instrucziun da pedagogia, psicologia, didactica e roms parents a la scol'auta professiunala da pedagogia. Quai garantiss er la furmaziun supplementara da las magistras e dals magisters dal Grischun talian. (Oz èn ins dependent da persunas d'instrucziun externas).
- Igl è l'incumbensa da la futura scol'auta professiunala da pedagogia a Cuira da far perscrutaziuns activas sin ils secturs da psicologia e pedagogia. Er en vista a quest fatg èsi impurtant ch'ins possia quintar cun la preschientscha da docentas e docents da lingua taliana a quest institut.
Nus supplitgain perquai la ludaivla regenza:
- da garantir ina instrucziun taliana en il senn surmenziunà a la scol'auta professiunala da pedagogia. Quai sto esser il cas durant almain la mesadad dal temp d'instrucziun e cun dar impurtanza speziala als roms pedagogia e didactica;
- da procurar che l'instrucziun pratica da las candidatas e dals candidats da las valladas talianas a la professiun da magister possia succeder da princip en il Grischun talian.
Cuira, ils 29 da schaner 2002
Name: Lardi, Keller, Giovannini, Arquint, Bär, Battaglia, Beck, Berther (Mustér), Casanova (Vignogn), Cavigelli, Crapp, Furrer, Giacometti, Giuliani, Hartmann, Lemm, Luzio, Mayer, Nick, Noi, Peretti, Plozza, Portner, Righetti, Schmid (Spleia), Telli, Thomann, Trepp, Tuor (Mustér), Walther, Zanolari, Zarro
Session: 29.01.2002
Vorstoss: rg Postulat