Navigation

Inhaltsbereich

Interpellaziun concernent limitaziun da la paisa maximala sin vias da communicaziun

Sessiun: 29.01.2002

En noss chantun datti anc bleras vias da communicaziun cun ina paisa maximala da 13 tonnas.
In camiun modern ha gia ina paisa vida da quasi 10 tonnas, uschia ch'ins po chargiar be anc 3 t sch'ins resguarda il limit da paisa. Pajada vegn dentant ina TCPTP per ina paisa totala d'almain 18 t. Quai augmenta ils custs dals transports en territoris allontanads anc supplementarmain.
En la pratica vegni agì uschia che transports vegnan exequids mintgatant cun ina paisa totala da 18 t sin bleras da questas vias da communicaziun sin atgna ristga durant il temp da pauc traffic. Il pli savens senza vegnir en ina controlla da traffic. A la via da communicaziun vegni qua tras er betg chaschunà in donn supplementar.
Auter èsi tar las interpresas da transport localas che transporteschan per exempel ina pli gronda quantitad da laina per ina vischnanca. Quellas na pon betg tscherner il temp favuraivel per duvrar las vias da communicaziun e la probabladad da vegnir en ina controlla da traffic è uschia bler pli gronda. Precis il medem vala er per transports da material da las interpresas da construcziun e.u.v.
Igl è cler per nus che la situaziun finanziala dal chantun na permetta betg meds supplementars essenzials per amplifitgar las vias da communicaziun. Nus essan dentant da l'opiniun ch'ils limits da paisa da las vias da communicaziun pitschnas vegnian exequids memia restrictivamain. Dus viadis en prescha cun in camiun mez vid pon far dapli donn a la via da communicaziun ch'in viadi cun chargia entira en in tempo moderà.
Bleras da las vias da communicaziun da 13 t pudessan gia uss, avant in'eventuala amplificaziun, vegnir duvradas il temp da stad d'aura normala senz'auter cun 18 t paisa totala, senza patir qua tras donns pli gronds. La cultivaziun dals guauds chaschuna problems finanzials a bleras vischnancas e quels na vegnan betg pli pitschens cun augmentar ils custs dals transports da laina.
Sch'insatgi è pront da construir ina chasa en ina vischnanca allontanada per abitar là, n'èsi segiramain betg cunvegnent d'augmentar ils custs da transport per la construcziun da la chasa pli che quai è absolutamain necessari.
Ils sutsegnads fan las suandantas dumondas a la regenza:
1. N'è la regenza betg er da l'opiniun ch'in augment dal limit da paisa sin diversas vias da communicaziun da 13 sin 18 t possia vegnir realisà gia uss?
2. Pudessan limts da paisa da 13 t per vias da communicaziun pli pitschnas ed ev. memia taissas betg vegnir augmentads sin 18 t durant ils mais da stad, sche quest limit n'è betg pussaivel durant l'enviern per motivs da segirezza?

Cuira, ils 29 da schaner 2002

Name: Dalbert, Caviezel (Pitasch), Berther (Mustér), Barandun, Battaglia, Berther (Sedrun), Capaul, Casanova (Vignogn), Cathomas, Cavegn, Claus, Crapp, Dermont, Farrér, Geisseler, Giovannini, Giulinai, Göpfert, Gross, Hartmann, Hess, Joos, Kehl, Keller, Kessler, Lardi, Lemm, Loepfe, Loi, Montalta, Müller, Nigg, Parpan, Patt, Peretti, Portner, Ratti, Righetti, Rizzi, Sax, Schmid (Sedrun), Stiffler, Thöny, Trachsel, Tuor (Mustér), Tuor (Trun), Wettstein, Zanolari, Zegg

Session: 29.01.2002
Vorstoss: rg Interpellation


Resposta da la regenza


La regenza conuscha ils problems e dischavantatgs che resultan per las valladas e vischnancas pertutgadas tras las limitaziuns da la paisa sin vias chantunalas. Ella ha perquai da princip l'intenziun da cumplettar a media fin a lunga vista las vias charrablas be cun 7 fin 13 tonnas e d'augmentar correspundentamain ils limits da paisa. Da l'autra vart ha la regenza, en sias respostas a numerusas interpellaziuns dal davos temp en il cussegl grond, stuì render attent cleramain al fatg ch'i vuless considerablamain dapli meds finanzials sulettamain per mantegnair l'entira rait da vias fitg gronda.

La rait chantunala da vias da colliaziun ha oz ina lunghezza totala da 877 km. Da quai èn signalisads 103 km (12%) cun ina paisa maximala da 7 fin 11 tonnas ed ulteriurs 114 km (13%) cun ina tala da 13 tonnas. Totalmain 150 km da las vias da col-liaziun cun ina limitaziun fin 13 tonnas èn a medem temp restrenschidas ad ina largezza da 2.30 m. Ellas na pon betg vegnir duvradas da camiuns d'ina largezza da 2.50 m.

La gronda part da las vias da colliaziun èn vegnidas construidas oriundamain per ina paisa totala da 7 tonnas. Suenter meglieraziuns architectonicas han ellas pli tard per part pudì vegnir dadas libras per paisas pli autas. Las restricziuns resultan il pli savens da construcziuns artifizialas che derivan anc dals onns 1900-1930 cun dimen-siuns ch'eran destinadas per manadiras e betg per las paisas dals vehichels odierns. Questas construcziuns artifizialas sa chattan en general en in stadi miserabel e na pon betg vegnir dadas libras senz'auter per paisas pli autas. Er ils fundaments da las

vias sezzas n'èn betg stabils avunda. Els possedan ina stresa da crappa rutta ch'è memia satiglia e betg resistenta cunter la schelira sco er ina fermezza reducida da la cuvrida. Cun in augment da la paisa totala senza eliminar las mancanzas menziunadas tar las construcziuns artifizialas ed il fundament da las vias resulta ina chargia excessiva da las construcziuns artifizialas e da las banchinas betg stabilas da las vias sin las scarpas savens fitg taissas. Ils donns creschan sproporziunadamain ed il privel d'accidents s'augmenta considerablamain.

Sin fundament da questas cundiziuns da basa n'èsi betg pussaivel da dar liber senz'auter las vias ch'èn uss limitadas a vehichels da 13 tonnas per tals da 18 tonnas. Er in'avertura temporara sto per regla vegnir refusada pervia da las construc-
ziuns artifizialas nunsuffizientas.

La soluziun da la problematica na po betg esser quella da rinforzar provisoriamain singulas construcziuns artifizialas e d'admetter paisas adina pli autas sin las vias antiquadas senza considerar las consequenzas. Cun quai fiss collià in ulteriur augment da las expensas ed ins ristgass in pli grond privel d'accidents. Augments da tonnascha èn perquai per regla pussaivels pir suenter la cumplettaziun ordinaria da las vias da colliaziun.

Datum: 26. da favrer 2002