Navigation

Inhaltsbereich

Interpellaziun concernent la protecziun cunter la canera per lung da la A13

Sessiun: 29.01.2002

Ils problems sin la A13 dapi l'accident en il tunnel dal Gottard e l'intensitad dal traffic dapi la reavertura dal tunnel dal Gottard èn impuls per prender per mauns la problematica da las immissiuns. Quai è necessari na be sin fundament da la problematica dal traffic da camiuns pesants che regia da preschent, mabain pervia dal fatg ch'il traffic general, che consista principalmain d'autos da persunas (da quai ina part essenziala da traffic da vacanzas e da temp liber), s'ha augmentà relativamain ferm durant ils davos onns.
Las prognosas per l'avegnir èn in augment cuntinuant dal traffic da persunas sco er in augment anc pli massiv dal traffic da camiuns pesants. Las immissiuns da canera vegnan probablamain a sa reducir en il fratemp, a lunga vista vegnan ellas dentant segiramain a s'augmentar.
Fin uss existan mesiras cunter la canera en il chantun Grischun mo a Zizers, Trimmis, Favugn, Domat, Balamburtg (Andeer) e Roveredo. Er ulteriurs territoris stuessan vegnir protegids pervi da la vischinanza e las frequenzas dal traffic e quai da Fläsch fin San Vittore. Quest giavisch ha il cussegl dal circul da Tumleastga preschentà ils 3 da december 2001 a la regenza. La resposta cuntenta be parzialmain, essend ch'i resorta ch'i vegnian fatgas mesiraziuns, ch'ils limits en la Tumleastga vegnian per part surpassads, che autras parts dal chantun per lung da la A13 sajan pertutgadas pli fitg e las valurs d'alarm na vegnian betg cuntanschidas. Per quest motiv na saja quai betg pussaivel per la confederaziun da sa participar vi dals custs.
L'ordinaziun davart la protecziun cunter canera (OPC) enconuscha 3 stgalims da valurs, numnadamain la valur da planisaziun, il limit e la valur d'alarm. L'art. 13 OPC oblighescha da sanar stabiliments fixs al lieu che contribueschan essenzialmain a surmuntar las valurs d'immissiuns, uschè lunsch ch'ils limits d'immissiuns (pia betg da las valurs d'alarm main rigurusas) na vegnian betg surpassadas. L'art. 19 oblighescha ils chantuns a basa d'in cataster davart la protecziun cunter la canera da fixar programs per sanar vias ch'èn d'approvar da la confederaziun e ch'èn la basa per sia participaziun vi dals custs.
A basa da questa situaziun proponan ils interpellants a la regenza da dar las suandantas infurmaziuns al cussegl grond:
1. Exista per il chantun Grischun in cataster davart la protecziun da canera pertutgant la A13?
2. Quals èn ils lieus per lung da la A13 engrevgiads cun canera?
3. Èsi vegnì elavurà in program per sanar vias pertutgant la A13?
4. Cura pon ins quintar cun la realisaziun da quel?
5. Pon vegnir fatgas lavurs preparativas per entschaiver cun la realisaziun senza retard, uschespert che las premissas èn dadas?

Cuira, ils 29 da schaner 2002

Name: Hess, Schmid (Spleia), Barandun, Ambühl, Arquint, Bachmann, Battaglia, Beck, Berther (Sedrun), Biancotti, Bucher, Casanova (Cuira), Catrina, Cavegn, Caviezel (Cuira), Christ, Claus, Conrad, Feltscher, Furrer, Geisseler, Giacometti, Giovannini, Göpfert, Gross, Hanimann, Jeker, Kehl, Keller, Kessler, Locher, Maissen, Märchy, Marti, Meyer, Michel, Möhr, Müller, Nick, Noi, Peretti, Pfiffner, Portner, Quinter, Righetti, Robustelli, Sax, Scharplatz, Schmid (Val S. Pieder), Schütz, Stiffler, Thomann, Thöny, Trachsel, Tramèr, Trepp, Walther, Wettstein, Zarro, Zinsli

Session: 29.01.2002
Vorstoss: rg Interpellation


Resposta da la regenza


Il chantun Grischun sa stenta gia dapi insaquants onns da realisar l'ordinaziun davart la protecziun cunter canera (OPC) da la confederaziun er concernent la canera dal traffic. Entaifer l'administraziun s'occupan l'uffizi per l'ambient, l'uffizi da construcziun bassa e l'uffizi da construcziun auta da quest'incumbensa communabla.

La regenza prenda posiziun davart las dumondas concretas sco suonda:

    1. Per tut las vischnancas per lung da la A13 ha l'uffizi per l'ambient cumpilà ils catasters davart la protecziun cunter canera tenor OPC da la confederaziun. Quests sa basan sin las frequenzas dal traffic dals ultims onns.
    2. Las vischnancas per lung da la A13 vegnan pertutgadas en differenta mesira da la canera dal traffic. Gia avant l'entrada en vigur da la OPC han ins construì en differents lieus rempars e paraids da protecziun cunter la canera, uschia per exempel sin il traject La Punt/Reichenau - Cuira. Tenor ils catasters davart la protecziun cunter la canera vegn surpassada la limita da las immissiuns sulettamain en paucas vischnancas e tar singulas immobiglias, la valur d'alarm pli severa vegn surpassada mo darar. Per mesiras da protecziun cunter la canera en furma da rempars u paraids exista pia in dretg da contribuziuns federalas be en cas excepziunals.

    3. Per las vischnancas pertutgadas extraordinariamain da la canera èn vegnids cumpilads ils programs per sanar las vias, e là nua ch'i dovra mesiras en furma da fanestras u paraids da protecziun cunter la canera, èn quellas er vegnidas exponidas publicamain. Quai è succedì concernent la A13 ad Andeer, Cuira, Trimmis e Zizers.
    4. /5.Differentas lavurs èn gia instradadas. Ad Andeer Balanburtg han ins construì durant ils onns 2000/2001 ina paraid da protecziun cunter la canera. A Cuira è en lavur la projectaziun da paraids da protecziun cunter la canera sin il sectur da la colliaziun Cuira nord. En il cas da Trimmis vegn projectà il spustament dal vial nord da la A13 en il vest e cun quai la concentraziun cun il vial sid e la VF, tranter auter sco consequenza da las retschertgas davart la canera. La realisaziun è planisada per ils proxims onns ed è dependenta da la situaziun finanziala da la confederaziun e dal chantun.

Tras la serrada dal tunnel dal Gottard l'atun passà è s'augmentada transitoriamain a moda considerabla la part dal traffic cun camiuns pesants. Durant las ultimas emnas ha l'uffizi per l'ambient, ensemen cun ils uffizis per l'ambient dals chantuns Tessin ed Uri, entschavì ad examinar detagliadamain las consequenzas dal spustament dal traffic dal Gottard sin l'axa dal San Bernardin, e quai concernent la canera e las substanzas nuschaivlas en l'aria, ed el persequitescha l'ulteriur svilup. Las conclusiuns finalas da quest monitoring vegnan ad esser in impurtant agid d'argumentaziun per pretaisas correspundentas visavi la confederaziun.

Da preschent examineschan l'uffizi per l'ambient e l'uffizi da construcziun bassa la pussaivladad da realisar mesiras en il senn preventiv da la lescha davart la protec-
ziun da l'ambient. Nus sperain che la confederaziun vegnia a gidar a chattar solu-ziuns efficazias per proteger la populaziun pertutgada, betg il davos sut l'impressiun da l'augment dal traffic cun camiuns pesants.

Datum: 26. da favrer 2002