Navigaziun principala

Cuntegn da la pagina

Postulat concernent il reglament da stimaziun per immobiglias

Sessiun: 29.01.2002
Durant la sessiun d'october 1999 ha il cussegl grond revedì l'ordinaziun davart las stimaziuns uffizialas. En occasiun da questa revisiun han ins expressivamain rendì attent al fatg che l'ordinaziun davart la stimaziun na creeschia nagin dretg da taglia, ma ch'ella haja da fixar las valurs confurmas al martgà.
Ils 25 da settember 2001 ha la regenza dal chantun Grischun decretà in nov reglament da stimaziun. Quest reglament è vegnì publitgà en il fegl uffizial dal chantun Grischun dals 20 da december 2001. Latiers èn vegnids reducids fermamain ils tschains da chapitalisaziun. L'applicaziun dal nov reglament da stimaziun chaschuna valurs da rendita augmentadas e nunusitadas pervia dals tschains da chapitalisaziun considerablamain pli bass. La consequenza èn augments multifars da taglias, p. ex. tar la taglia sin la facultad.

Ils sutsegnads dumondan da fixar tschains da chapitalisaziun usitads sin il martgà, sco ch'els vegnan er applitgads da las cassas da pensiun.

Cuira, ils 29 da schaner 2002

Name: Tscholl, Nick, Suenderhauf, Ambühl, Augustin, Bachmann, Bär, Barandun, Battaglia, Beck, Biancotti, Brüesch, Brunold, Bühler, Butzerin, Capaul, Casanova (Cuira), Cathomas, Catrina, Caviezel (Pitasch), Christ, Claus, Conrad, Crapp, Dalbert, Donatsch, Farrér, Giovannini, Göpfert, Gross, Hanimann, Hardegger, Hess, Hübscher, Jeker, Juon, Keller, Kessler, Koch, Lardi, Lemm, Loepfe, Loi, Luzi, Maissen, Märchy, Marti, Michel, Möhr, Müller, Patt, Portner, Ratti, Rizzi, Schmid (Sedrun), Schmid (Spleia), Schütz, Stiffler, Telli, Thomann, Trachsel, Tramèr, Turnell, Vetsch, Walther, Wettstein, Zanolari, Zarro, Zinsli

Session: 29.01.2002
Vorstoss: rg Postulat

Resposta da la regenza


A basa da la pretaisa legala da stimaziuns confurmas al martgà ha la regenza reglà da nov la fixaziun dal tschains da chapital en il reglament da stimaziun. Enstagl da la prescripziun veglia che vegniva adattada pir en cas d'ina midada dal tschains per dapli ch'in punct da pertschient tar ipotecas prevesan las disposiziuns novas ina
adattaziun cuntinuanta dal tschains al martgà, quai che correspunda dal rest er a la pratica generala en la branscha da stimaziun.

La taxa da chapitalisaziun sa cumpona a moda aditiva dal tschains da basa e d'in supplement per ils custs d'administraziun. Il supplement vegn eruì individualmain tenor las recumandaziuns da las federaziuns spezialisadas SVKG (Vereinigung kantonaler Grundstückbewertungsexperten) e SEK/SVIT (Schweizerische Schätzungsexpertenkammer). Sch'ils custs effectivs d'aministraziun èn conuschents, pon ins - tenor l'art 24 dal reglament da stimaziun - er desister da fixar ils supplements e chapitalisar la rendita netta (quai vul dir la rendita netta da locaziun, main ils custs d'administraziun) cun il tschains da chapital.

Enstagl da la disposiziun da stimaziun applitgada fin la fin 2001 han las cumissiuns da stimaziun da sa basar en il futur sin ils tschains actuals per emprimas ipotecas da la banca chantunala u da la banca directiva al lieu da l'immobiglia sco tschains da basa da la stimaziun. Quests varieschan tut tenor il gener da l'object e vegnan applitgads independentamain da las pussaivladads finanzialas individualas dal proprietari. L'uffizi da stimaziun communitgescha a las cumissiuns da stimaziun ils tschains da chapital actuals, armonisads tenor las relaziuns da tschains actualas, quai che duai garantir in'execuziun unitara.
La nova metoda deliberada da la regenza cun in'adattaziun cuntinuanta correspunda al princip d'eruir valurs da stimaziun confurmas al martgà ch'è fixà en l'art. 7 al. 4 da l'ordinaziun davart las stimaziuns uffizialas. L'intent dals postulants da fixar taxas da chapitalisaziun usitadas sin il martgà vegn pia realisà cun il nov reglament da stimaziun.

Las taxas da chapitalisaziun cuntegnidas en il reglament da stimaziun vegl sa basavan sin in tschains da basa da 5 1/2 pertschient ed avessan stuì vegnir adattadas en cas d'ina midada da pli ch'in pertschient. Consequentamain stuess ins, schizunt en cas d'ina applicaziun correcta da las taxas da chapitalisaziun fixadas en il reglament vegl, sa basar sin in tschains da basa da 4 1/4 pertschient per la stimaziun da chasas d'abitar, sco tenor il reglament nov. Il nov sistem permetta dentant da reagir pli spert sin midadas dal martgà ipotecar e da resguardar uschia per exempel er in augment minimal dals tschains. Il princip da l'applicaziun dal tschains ipotecar sco basa per las valitaziuns da las immobiglias ha ses origin er en il dretg da locaziun,
uschia ch'ina reducziun dal tschains ipotecar chaschuna adina in'adattaziun dal fit-chasa resp. da la valur da l'atgna fittanza (art. 12 al. 1 da l'ordinaziun davart la locaziun e fittanza da locals d'abitar e da fatschenta). D'ina reducziun simultana da la valur da locaziun e da la taxa da chapitalisaziun resulta circa la medema valur da rendita. Da princip po pia be ina chareschia influenzar la valur da rendita, quai che correspunda puspè a princips economics.


Tar la tariffa da conversiun che vegn surtut applitgada da las cassas da pensiun sa tracti d'in factur da la tecnica d'assicuranzas. La calculaziun da questa tariffa succeda cun agid d'uschenumnadas basas tecnicas che resguardan la mortalitad dals pensiunads e da las vaivas sco er ulteriurs indicaturs da statistica. La tariffa da conversiun applitgada da las cassas da pensiun na stat pia en nagin connex cun la taxa da chapitalisaziun ch'è relevanta per la stimaziun da la valur da rendita d'ina immobiglia.

Resumond na vesa la regenza nagina raschun da midar las disposiziuns decretadas da nov, e quai per ils sequents motivs:

    a) La nova ordinaziun davart las stimaziuns uffizialas prescriva la stimaziun da valurs confurmas al martgà, ed il nov reglament da stimaziun realisescha questa pretaisa, applitgond tschains da chapital resp. taxas da chapitalisaziun usitadas sin il martgà.
    b) Las renditas bruttas e las tariffas da conversiun applitgadas da las cassas da pensiun na stattan en nagin connex cun la taxa da chapitalisaziun usitada per la stimaziun d'immobiglias che sa cumpona dal tschains da chapital actual ed armonisà e dals supplements per ils custs d'administraziun.

La regenza refusescha pia d'acceptar il postulat.

Datum: 26. da favrer 2002