Navigation

Inhaltsbereich

Dumonda en scritt concernent las plazzas da lavur publicas al San Bernardin

Sessiun: 30.01.2002

L'ultim temp è sa sminuida l'occupaziun en il Moesano e quai è er sa mussà da las statisticas publitgadas dal chantun.
Er tar las plazzas da lavur publicas sto vegnir constatà ina tendenza da spargnar e da reducir las plazzas da lavur. Il San Bernardin è in exempel per questa tendenza: Tar la basa da la polizia da traffic sco er tar il lavuratori dal tunnel èn vegnidas sminuidas insaquantas plazzas, tranter auter perquai che tschertas funcziuns èn vegnidas transferidas a Tusaun.
I n'è betg acceptabel che la Mesolcina vegn disfavurisada supplementarmain tras la perdita da plazzas da lavur en quella situaziun ch'ella è vegnida uss pervi da l'augment dal traffic da camiuns pesants e da la mancanza da segirtad che resulta da quel.
Perquai supplitgesch jau la regenza da respunder las suandantas dumondas:
    - Contas plazzas da lavur datti da preschent sin il sectur da polizia al San Bernardin?
    - Contas plazzas da lavur datti da preschent en il lavuratori dal tunnel dal San Bernardin? Contas eran avant 5 onns?
    - Patratga il chantun da sminuir u d'augmentar il dumber da plazzas da lavur?
    - Tgenins èn ils motivs per ina eventuala reducziun da plazzas da lavur?

Cuira, ils 30 da schaner 2002

Name: Zarro

Session: 30.01.2002
Vorstoss: rg SchriftlicheAnfrage


Resposta da la regenza

Tar dumonda 1:
En la secziun da traffic dal San Bernardin occupa la polizia chantunala dal Grischun actualmain 21 funcziunaris da polizia, in collavuratur tecnic per il mantegniment dals vehichels sco er duas assistentas da l'administraziun en la centrala operativa. En consequenza da la pensiun sa reducescha il dumber dals funcziunaris da polizia per la fin da 2002 sin 19 plazzas. Igl 1. da schaner 2003 pon ins puspè serrar questas largias enten staziunar absolvents da la scola da polizia 2002.

Tar dumonda 2:
Dapi nov onns è restà il medem dumber da persunal tar il lavuratori San Bernardin cun 34 collavuraturs.

Tar dumonda 3:
Ni tar la polizia chantunala ni tar il lavuratori da l'uffizi da construcziun bassa a San Bernardin èsi planisà pil mument da crear u da reducir las plazzas da lavur. Quai vala dal rest er per il district da polizia III a Grono e per l'uffizi da construcziun bassa a Mesocco. Sco en autras regiuns dal chantun vai er qua per garantir la segirezza da la populaziun e dals utilisaders da la via tranter auter cun metter a disposiziun las resursas necessarias da persunal, schizunt sche la recrutaziun necessaria tar la polizia chantunala e tar l'uffizi da construcziun bassa è magari be realisabla sut circumstanzas difficilas en la regiun da Mesocco.

In'excepziun è sulettamain la plazza dal schef da servetsch tar il lavuratori San Bernardin. Cun la reorganisaziun sin il sectur electromecanic èsi planisà da transferir questa plazza a Tusaun suenter la pensiun dal titular da la plazza dad oz. Questa plazza è vegnida scritta ora publicamain ed è gia occupada.

Tar dumonda 4:
Ina resposta n'è betg necessaria sin fundament da las explicaziuns precedentas.

Datum: 19. favrer 2002