Navigation

Inhaltsbereich

Interpellaziun concernent la basa per in clima da taglia favuraivel per famiglias en il Grischun

Sessiun: 26.03.2002

La reglamentaziun vertenta da reducir l'entrada suttamessa a la taglia tras deducziuns per uffants favurisescha pervia da la progressiun tendenzialmain persunas cun entradas autas. In effect pli social pudess vegnir cuntanschì, sche las deducziuns per uffants pudessan vegnir subtrahadas directamain dal quint da taglia. En quest cas vegnissan tut las famiglias distgargiadas tuttina fitg en francs. Quest sistem è plinavant pli raschunaivel ord vista da la politica finanziala, vegn gea applitgada la reducziun da las entradas da taglia a moda intenziunada ed effizienta tar las famiglias che han il pli da basegn d'ina distgargia. Entras quai pudess in nov sistem da taglias porscher ina contribuziun essenziala per meglierar la situaziun da las famiglias cun entradas pitschnas u mesaunas. Sin fundament d'ina explicaziun da cusseglier federal Villiger dals 26 da settember 2001 en il cussegl naziunal è sclerida la situaziun giuridica tras ina nova interpretaziun da la lescha davart l'armonisaziun da taglia. Tenor quella èn ils chantuns libers da fixar sezs il sistem da las deducziuns socialas. Tras quai sa mussa er per il chantun Grischun ina nova libertad d'agir.

Ord vista da questa situaziun e da las novas premissas supplitgeschan ils interpellants da respunder las suandantas dumondas:

    1. Quant auta pudess vegnir fixada ina deducziun generala per uffants dal quint da taglia, sche las sperditas vegnissan midadas dal sistem odiern en furma d'in retgav neutral en ina deducziun uschia?

    2. Co vesessan ora tar ils dus sistems las differenzas da grevezza per las differentas entradas en pass da 10'000 francs sco er las differenzas dals tips da tegnairchasa (dumber d'uffants)?

    3. Quantas famiglias vivan en il chantun Grischun en las classas d'entrada correspundentas ed en ils tips da tegnairchasa correspundents?

Cuira, ils 26 da mars 2002

Name: Frigg, Pfiffner, Meyer, Arquint, Augustin (Almen), Brasser, Bucher, Caviezel (Cuira), Frigg, Jäger, Joos, Locher, Looser, Noi, Schmutz, Schütz, Trepp, Zindel

Session: 26.03.2002
Vorstoss: rg Interpellation

Resposta da la regenza


Las respostas pretendidas dals interpellants faschessan necessarias calculaziuns che chaschunassan lavurs ed expensas considerablas a l'administraziun chantunala da taglia expensas considerablas. Datas actualas na pon per il mument er betg vegnir eruidas - quai en consequenza da la largia da taxaziun chaschunada da la midada a la valitaziun actuala.

En la sessiun da schaner da quest onn è vegnì fatg valer en il cussegl grond l'opiniun che la regenza, ensemen cun l'administraziun, possia enconuscher spert ed a moda efficazia tge expensas che n'èn betg giustifitgadas e tge exercizis ch'èn senza effect (PCG 2001-2002, p. 594). En vista a questa constataziun che ha la fin finala chattà ina maioritad en il cussegl grond ha la regenza examinà, sch'ils custs da la calculaziun numnada fissan da giustifitgar.

La regenza n'è betg intenziunada da proponer ina deducziun per uffants che po vegnir deducida directamain da l'import da taglia. La deducziun da l'entrada suttamessa a la taglia normada en il dretg actual vegn considerada sco adequata. Er en il cussegl grond n'èn betg vegnidas prendidas decisiuns divergentas a questa vista.

La regenza è perquai da l'opiniun che las calculaziuns pretendidas chaschunassan expensas che na fissan betg da responsar e represchentassan en il medem mument in exercizi senza effect. I na fa betg bler senn d'investir temp en la preparaziun da projects nua ch'ina realisaziun n'è ni decidida dal cussegl grond ni intenziunada da la regenza. Igl è perquai da desister da far las calculaziuns.
Senza las calculaziuns concretas n'èsi betg pussaivel a la regenza da respunder las dumondas tschentadas.

La renunzia d'entrar pli detagliadamain en las dumondas da l'interpellanta è dentant er il resultat d'ina consideraziun da l'ambient dal dretg fiscal. L'imposiziun da taglias sin famiglias vegn examinada fundamentalmain e reglada da nov sin plaun federal. Las novaziuns vegnan er ad avair per consequenza midadas da la lescha d'armonisaziun da taglia e qua tras far necessaria sin plaun chantunal ina revisiun parziala da la lescha da taglia. L'imposiziun da taglias sin famiglias sto vegnir tractada sco unitad e reglada da nov cura che las prescripziuns dal dretg federal èn enconuschentas. La resposta anticipada da singulas dumondas na considerescha la regenza betg per inditgada.

Datum: 16 d'avrigl 2002