Navigation

Inhaltsbereich

Interpellaziun concernent "Quant corrupt è il Grischun?"

Sessiun: 26.03.2002
Durant in lung temp han ins pensà che la Svizra saja immuna cunter ils fenomens da la corrupziun. Gugent han ins mussà vi sin auters stadis, per exempel sin la situaziun marcada da la mafia en moss pajais limitrof en il sid. L'istorgia dal davos temp mussa quai ch'ins ha pudì spetgar, numnadamain ch'il mal da la corrupziun saja derasà er tar nus. Correspundentamain han ins stuì rinforzar il dretg penal da corrupziun per cuntanscher in effect preventiv general da decuraschament (art. 322ter - art. 322octies CP; en vigur dapi il 1. da matg 2000). Ils cas da corrupziun ch'èn daventads conuschents il davos temp en l'entira Svizra laschan presumar ch'er noss chantun na possia betg mitschar dal svilup general. A basa da quest fatg vegn la regenza supplitgada da respunder las sequentas dumondas:

1. Quantas proceduras d'inquisiziun penala pervia da corrupziun èn vegnidas avertas en il chantun Grischun durant ils onns 1999, 2000 e 2001? En tge maniera èn las proceduras penalas vegnidas liquidadas fin uss?

2. Quants spezialists da corrupziun èn da preschent activs tar la polizia chantunala, tar ils uffizis d'inquisiziun e tar la procura publica? Co taxescha la regenza questas resursas persunalas concernent la quantitad resp. la qualitad?

3. È la regenza er da l'avis da las interpellantas e dals interpellants che la corrupziun - sin il pli pauc inconscientamain ed indirectamain - saja in problem ch'è da prender serius er en il Grischun? En cas da gea: è la regenza pronta da prender las mesiras necessarias? Tgeninas mesiras concretas?

Cuira, ils 26 da mars 2002

Name: Augustin (Cuira), Righetti, Augustin (Almen), Arquint, Berther (Sedrun), Brasser, Capaul, Caviezel (Cuira), Caviezel (Pitasch), Dalbert, Frigg, Jäger, Locher, Luzio, Maissen, Michel, Noi, Schütz, Wettstein, Zindel

Session: 26.03.2002
Vorstoss: rg Interpellation

Resposta da la regenza


Cun la revisiun dal dretg penal da corrupziun, entrà en vigur il 1. da matg 2000, è
daventada chastiabla d'ina vart la corrupziun da funcziunaris esters, da l'autra vart vegn chastiada pli fitg la corrupziun activa da funcziunaris svizzers; ella vegn er suttamessa ad in termin da surannaziun pli lung. Chastiabel èsi dapi quella giada er
d'attribuir e d'acceptar avantatgs en vista a l'administraziun d'in uffizi. La finamira da la revisiun è stada quella da cumbatter las raits da corrupziun gia en la fasa da svilup. Cun l'introducziun da las novas normas da chasti han ins er pudì realisar l'entrada en la convenziun da la OECD cunter la corrupziun transcunfinala e crear la basa per sutsegnar la cunvegna davart il dretg penal dal cussegl da l'Europa cunter la corrupziun.

La procura publica dal Grischun ha organisà il favrer 2001 ina occurrenza da furmaziun supplementara davart las novas normas da chasti per sias collavuraturas e ses collavuraturs sco er per commembers da la polizia chantunala. Il punct central da quest'instrucziun è stà il referat davart il tema "Il nov dretg penal da corrupziun en Svizra."
En connex cun la legislaziun pli rigurusa han ins spetgà en general in augment da las denunzias, quai che n'è dentant betg succedì en Svizra.

Concernent las dumondas:

1. L'onn 1999 sco er l'onn 2000 n'han ins gì da far naginas inquisiziuns penalas correspundentas en il Grischun. L'onn 2001 han ins avert ina procedura ch'è anc pendenta.

2. Ina spezialisaziun per propi sin il plaun da l'inquisiziun penala n'exista betg fin oz. En il rom da la repartiziun interna speziala da las incaricas han ins incumbensà aposta in inquisitur da la procura publica per tractar en il futur eventuals cas penals da corrupziun. Tar la polizia chantunala vegnan elavuradas chaussas penalas da corrupziun tras il servetsch spezial 3 da la polizia criminala, quai pervia da lur colliaziun cun chaussas penalas d'economia. Quest servetsch cumpiglia quatter collavuraturs.

3. La corrupziun sco fenomen da la societad è senza dubi in problem ch'è da prender serius. Las experientschas fatgas fin uss en il chantun Grischun (ed insumma en Svizra) mussan dentant ch'il problem n'è oz betg gravant dal puntg da vista quantitativ e che las resursas existentas en il chantun bastan da preschent per al cumbatter. Schizunt il sectur da las acquisiziuns publicas che vegn taxà en general per spezialmain periclità per delicts da corrupziun n'è fin oz anc nagin tema en il Grischun, sco quai che la regenza po constatar. Quest fatg legraivel è probablamain betg il davos d'engraziar a las prescripziuns chantunalas da submissiun che procuran per transparenza sco er per che la protecziun legala tar la surdada da lavurs publicas en noss chantun funcziunia propi. Ultra da quai vegnan uss impegnads ils offerents en il rom da las proceduras chantunalas da submissiun da suttascriver ina uschenumnada clausula d'integritad.Er il resultat dal scumond d'acceptar regals per collavuraturas e collavuraturs dal chantun sa preschenta medemamain. Las disposiziuns correspundentas dal dretg dal persunal èn in instrument effizient per pudair intervegnir en cas da basegn. Tenor l'idea da la regenza vegnan er observadas questas prescripziuns, uschia ch'ins n'è da preschent betg sfurzà da prender ulteriuras mesiras sut quest aspect. Per finir ston ins er rinviar a l'art. 340bis CP. Tenor quel han las autoritads da persecuziun penala da la confederaziun da s'ccupar da delicts da corrupziun, sche las acziuns puniblas èn vegnidas commessas per ina part considerabla a l'ester u en differents chantuns e sch'i n'extista nagin punct central en in chantun. Medemamain suttamess a la giurisdicziun federala èn delicts da corrupziun ch'èn vegnids commess d'in commember d'ina autoritad u d'in funcziunari da la confederaziun u cunter la confederaziun. Resguardond las cumpetenzas federalas extendidas sa mussa er per quest motiv ch'i na fa da preschent betg basegn d'extender la dotaziun persunala da la procura publica e da la polizia chantunala.

Sco resumaziun: concernent la dumonda preschentada en il titel da l'interpella-
ziun ha la regenza la suandonta posiziun: Il Grischun n'è betg corrupt!

Datum: 23 d'avrigl 2002