Navigaziun principala

Cuntegn da la pagina

Interpellaziun concernent il diever dals natels durant la chatscha

Sessiun: 26.03.2002
Tenor las prescripziuns concernent pratitgar la chatscha èsi scumandà da far diever u da purtar cun sai natels durant la chatscha.

Durant ils davos onns han numerus chatschaders, malgrà quest scumond formal, fatg diever da natels, particularmain en situaziuns d'urgenza u en cas d'accidents. Durant il mais settember da l'onn passà han ins pudì gidar e salvar in chatschader da Mesocco, victima d'in fitg grev accident, grazia al fatg ch'el purtava cun sai il natel e ch'el ha duvrà quel.

Quests fatgs mussan ch'il cumportament dals chatschaders è sa midà e ch'il diever dals natels è vastamain derasà, quai malgrà il scumond legal.

En vista a questa situaziun vegn fatga la dumonda a la regenza

a) sch'ils fatgs menziunads sajan conuschents
b) sche la regenza saja da l'avis ch'il diever dals natels saja da tolerar en cas d'urgenza e da basegn
c) sche la regenza na saja betg da l'avis ch'i saja da reponderar il scumond da duvrar natels en las prescripziuns concernent pratitgar la chatscha en il senn ch'i vegnia permess in adiever limità dals natels durant la chatscha.

Cuira, ils 26 da mars 2002

Name: Righetti, Keller, Zarro, Augustin (Cuira), Bär, Battaglia, Biancotti, Bischoff, Büsser, Capaul, Catrina, Conrad, Crapp, Giovannini, Hartmann, Kasper, Kessler, Lardi, Lemm, Locher, Loepfe, Luzi, Maissen, Marti, Möhr, Noi, Parolini, Parpan, Peretti, Robustelli, Sax, Schmid (Sedrun), Schmid (Val S. Pieder), Suter, Tuor (Mustér), Tuor (Trun)

Session: 26.03.2002
Vorstoss: rg Interpellation


Resposta da la regenza

Avant che respunder las dumonda dals interpellants considerescha la regenza per inditgà d'explitgar curtamain la situaziun giuridica en connex cun il diever d'apparats radiofonics e natels durant la chatscha. Decisiva è qua l'ordinaziun federala da cha-
tscha. Tenor quella na dastgan tranter auter vegnir duvrads nagins apparats per reproducir tuns sco er nagins apparats radiofonics durant la chatscha. Tenor ina sentenzia da la giunta da la dretgira chantunala grischuna da l'onn 1992 èsi bain cumpatibel cun la legislaziun federala da purtar cun sai apparats radiofonics e natels durant la chatscha e da duvrar quels da princip. Scumandà è dentant il diever da tals meds auxiliars per intents da chatscha. Tenor la reglamentaziun actuala en las prescrip-ziuns da chatscha èsi permiss exclusivamain da purtar cun sai e da duvrar apparats radiofonics d'urgenza ch'èn munids cun il chanal da la Rega e ch'ins na po betg programmar supplementarmain.

A basa da las controllas fatgas dals organs da surveglianza da la chatscha na resulti betg - cuntrari a l'avis dals interpellants - ch'ina gronda quantitad da chatschadras e chatschaders n'observia betg las disposiziuns vertentas davart purtar cun sai e duvrar apparats radiofonics e natels. Ins conuscha perencunter singuls cas, en ils quals chatschaders disgraziads han dumandà agid medicinal cun lur agen natel u cun quel da terzas persunas. In tal eveniment ha chaschunà ch'igl è permiss dapi 1998 da purtar cun sai e da duvrar apparats radiofonics d'urgenza. A basa da questas circumstanzas è la regenza dal medem avis sco ils interpellants, numnadamain ch'ins na possia betg s'opponer al diever d'apparats radiofonics e natels en situaziuns d'urgenza. Ella è perquai pronta d'examinar puspè questa dumonda en il rom da las prescripziuns da chatscha 2002, resguardond la cumissiun da chatscha. Ina tala reglamentaziun avess la finamira da limitar il diever d'apparats radiofonics e da natels a situaziuns d'urgenza (accidents da chatschadras e chatschaders u da terzas persunas, incendis da guaud e.u.v.) Il diever per intents da chatscha resta scumandà er en il futur.

Datum: 23 d'avrigl 2002