Navigation

Inhaltsbereich

Interpellaziun concernent la promoziun dal martgà public da biestga da maz

Sessiun: 26.03.2002
Dapi la realisaziun da la nova politica agrara è sa midà fitg bler sin il sectur da la biestga da maz. Blers manaschis han midà sin l'allevament da vatgas-mamma ed auters èn ids davent da l'engrasch da vitellones. La producziun da labels ha medemamain survegnì ina nova dimensiun.
La cassaziun da las acziuns d'eliminaziun ha manà a la situaziun che la confederaziun ed ils chantuns dattan ora bler damain daners per la commerzialisaziun da la biestga da maz. En noss chantun èn vegnids reunids ils martgads sin 4 lieus da martgà.

Ils martgads publics èn anc adina impurtants per:
    a) ils pretschs transparents
    b) la segirtad da la vendita da biestga da maz
    c) ils pretschs minimals garantids

Cun quai èsi cunzunt servì a las regiuns periferas e quai gida in sectur da gudogn essenzial da la tratga da muvel.
L'uniun purila grischuna ha inoltrà al departament responsabel in rapport da la gruppa da lavur biestga da maz da la Societad grischuna per l'intermediaziun da muvel SA per la realisaziun speditiva.

È er la regenza da l'opiniun che quest concept saja significativ, perquai ch'el
    1. na surmunta betg il rom dals meds finanzials dal chantun da fin qua?
    2. promova la producziun da qualitad?
    3. favurisescha medemamain las novas furmas da producziun?
    4. dat temp da mesirar il success e sche necessari er da tschertgar schliaziuns adattadas?

Ils sutsegnads spetgan che la regenza prendia enta maun usché spert sco pussaivel la realisaziun da las propostas, tant pli che quellas èn vegnidas elavuradas da tut las forzas activas da la producziun da biestga da maz en il chantun Grischun.

Cuira, ils 26 da mars 2002

Name: Caviezel (Pitasch), Thöny, Capaul, Barandun, Battaglia, Beck, Biancotti, Butzerin, Casanova (Cuira), Casanova (Vignogn), Cathomas, Cavegn, Christoffel, Claus, Conrad, Dalbert, Dermont, Giovannini, Hanimann, Heinz, Joos, Juon, Keller, Kessler, Maissen, Montalta, Michel, Nick, Parolini, Peretti, Righetti, Rizzi, Sax, Schmid (Sedrun), Schmid (Val S. Pieder), Thomann, Thöny, Trachsel, Tuor (Trun), Wettstein, Zarro, Zegg

Session: 26.03.2002
Vorstoss: rg Interpellation


Resposta da la regenza

Ils interpellants spetgan da la regenza ch'il rapport da l'uniun purila grischuna (UPG) davart la promoziun dals martgads da biestga da maz vegnia realisà uschè spert sco pussaivel. Il rapport è vegnì elavurà en la gruppa da lavur "biestga da maz" nua ch'èn represchentads tut ils interessents da la producziun da biestga da maz. Ils interpellants motiveschan lur dumonda cun il fatg ch'ils martgads publics da biestga da maz sajan cunzunt da grond'impurtanza per las regiuns periferas ed anc adina per la transparenza dals pretschs, la segirtad da la vendita da biestga da maz e per garantir ils pretschs minimals.

Tenor l'opiniun da la regenza è la proposta da la UPG ina proposta pussaivla che na po dentant anc betg cuntentar en tut ils reguards. Al concept da la biestga da maz stat visavi ina retschertga da la SPF da Turitg cun tut in autra disposiziun. Suenter ina confruntaziun fundada cun quest studi scientific e sa basond sin il concept da la biestga da maz vegn l'uffizi d'agricultura, meglieraziun da structura e mesiraziun, per incumbensa ed en coordinaziun cun il departament da l'intern e da l'economia publica, a suttametter a la regenza ina proposta, uschia che las directivas davart l'execuziun dals martgads da biestga e da nursas pon vegnir repassadas e messas en vigur sin l'atun 2002.

La regenza è conscienta da l'impurtanza dals martgads publics da biestga, cunzunt er per las regiuns periferas. Il conturn da la commerzialisaziun dals martgads da biestga è sa midà drasticamain durant ils ultims onns. La sminuaziun annuala dal dumber d'animals mussa quai. En connex cun la producziun da label èn sa furmadas novas cunvegnas da cumpraders che portan in pretsch supplementar e dapli confort als purs. La regenza è conscienta che betg tut ils animals na vegnan vendids sur quests chanals novs. Er ils animals da label na pon betg vegnir commerzialisads sco tals. Tenor l'opiniun da la regenza duai exister la fiera libra. Quai è dentant be pussaivel, sche las plazzas da martgà vegnan er vairamain duvradas.

Las singulas dumondas respunda la regenza suandantamain:

1. La proposta suttamessa da la gruppa da lavur "biestga da maz" na surpassa betg il rom, en il qual ils credits pon vegnir duvrads. Sulettamain or da quella circumstanza na pon ins dentant betg deducir cun tschertezza ch'il concept preschentà saja er inditgà. Sin fundament dal svilup dals custs ch'è difficil da giuditgar èsi per il mument d'ir enturn plitost precautamain cun la distribuziun da contribuziuns per animals da label.

2. Gia en il conclus da la regenza dals 20 da favrer 2001, nr. da prot. 303, èsi vegnì fixà ch'i na vegnia betg pli conderschì ni contribuziuns da manar si ni da qualitad. Sch'i vegn dentant instradada tras las propostas preschentadas in'autra direcziun che quella ch'è proponida da la regenza, èsi pussaivel ch'ils products da qualitad vegnian schizunt per part er promovids. La fin finala pudess er crescher la schientscha per la qualitad.

3. Las novas furmas da produziun vegnan favurisadas tras il concept, sche la flexibilitad necessaria po vegnir garantida. Las plazzas da martgà pon survegnir dapli impurtanza en l'avegnir sco plazzas da transtgargiada. Cun la TCPTP creschenta vegni pli e pli char da charrar tar mintga stalla. Ils animals da label na vegnan betg sulettamain mazzads glindesdi e mardi. Correspundentamain stuess la transtgargiada er esser pussaivla auters dis da l'emna.

4. Il martgà da biestga da maz è suttamess permanentamain a midadas. La regenza sa che las mesiras èn medemamain d'adattar. La proposta da l'uniun purila grischuna è actualmain ina via pussaivla per garantir l'egualitad da las schanzas per ils martgads en il chantun, ella è dentant da coordinar cun las mesiras gia prendidas.

    Datum: 23 d'avrigl 2002