Navigation

Inhaltsbereich

Dumonda en scrit concernent la glista d'ospitals dal chantun Grischun

Sessiun: 26.03.2002
Il sboz da consultaziun dal departament da giustia, polizia e sanitad prevesa da transferir l'incarica da prestaziun per l'ortopedia en Engiadin'ota da l'ospital da Samedan a la clinica privata Gut cun 18 letgs. Quest transferiment vegn motivà cun l'argument ch'ins eviteschia duplicitads. L'ospital public bain equipà da Samedan ha ademplì fin oz cun success questa incarica. El posseda er ina staziun da tgira intensiva ch'è adattada per tractar pazients, tar ils quals igl è da resguardar ulteriuras ristgas da sanadad.

Perquai supplitgesch jau la regenza da respunder las sequentas dumondas:

1. Na pegiurescha quest transferiment betg il provediment ortopedic da l'Engiadin'ota. Spezialmain per persunas attempadas, tar las qualas igl è da resguardar ulteriuras ristgas da sanadad?

2. Co fan ins quint da reparter suenter quest transferiment il champ che cumpiglia l'ortopedia, la traumatologia e la chirurgia tranter l'ospital d'Engiadin'ota e la clinica Gut?

3. Pon ins respargnar custs considerabels cun quest transferiment en l'ospital public da Samedan; custs che giustifitgeschan ina tala intervenziun en la purschida actuala da l'ospital da Samedan?

Cuira, ils 26 da mars 2002

Name: Trachsel

Session: 26.03.2002
Vorstoss: rg SchriftlicheAnfrage

Resposta da la regenza

La clinica Gut a San Murezzan ha gia tenor la glista d'ospitals da fin uss ina incarica da prestaziun per la chirurgia ortopedica. Ella furnescha la contribuziun principala per il provediment spezialisà en chirurgia ortopedica en la regiun d'ospitals Engiadin'ota. L'ospital d'Engiadin'ota ha fin uss ina incarica da prestaziun en chirurgia, en la quala la chirurgia ortopedica è er cuntegnida.

La regenza prevesa uss analogamain a la glista d'ospitals da fin uss da dar tant a l'ospital d'Engiadin'ota a Samedan sco er a la clinica Gut a San Murezzan vinavant ina incarica da prestaziun en chirurgia ortopedica. Ella parta dal fatg che la chirurgia ortopedica tutgia da princip tar la purschida da prestaziuns d'in ospital dal provediment fundamental amplifitgà. En il provediment ortopedic dal Grischun dal sid vegn integrà plinavant l'ospital d'Engiadina bassa a Scuol.

Da princip èsi da constatar en connex cun la repartiziun d'incaricas da prestaziun en il rom da la planisaziun d'ospitals e dal decret d'ina glista d'ospitals, ch'i sa tracta qua tranter auter dal fatg da vulair cuntanscher, cun evitar duplicitads en la purschida spezialisada da prestaziuns dals ospitals, ina qualitad da provediment fitg auta a custs pli favuraivels pussaivels. Da quai duain pudair profitar las pazientas ed ils pazients e las pajadras ed ils pajaders da premias medemamain. A basa da la situaziun speziala e da las incaricas da prestaziun previsas per l'ospital d'Engiadin'ota e la clinica Gut n'è betg necessaria ina nova limitaziun da las incumbensas per ils secturs ortopedia, traumatologia e chirurgia.

Datum: 21 da matg 2002