Navigaziun principala

Cuntegn da la pagina

Interpellaziun concernent il plaz d'ospitals Cuira

Sessiun: 27.03.2002

Suenter lungas tractativas entaifer las differentas autoritads e persunas decidentas ha la societad simpla “Ospitals Cuira”, ensemen cun la cumissiun d'ospitals communabla (COC), la conferenza da la direcziun dals ospitals, la regenza e las ulteriuras instanzas, pudì preschentar a las medias la fin d'avust 2001 il “model 1-1-3”; in purtader, in ospital en trais lieus en la citad da Cuira.

Sco finamiras da la nova organisziun vegnan numnadas:

    a) sbassament da la curva da l'augment dals custs cun eleminar duplicitads
    b) plaz d'ospitals central per il Grischun, cun in avanzament da las cumpetenzas
    c) collavuraziun en il svilup medicinal empè da concurrenzas internas separadas
    d) augment general da la qualitad en il provediment d'ospital

Suenter la preschentaziun dal concept da refurma “model 1-1-3” da la COC èsi vegnì enconuschent, che represchentants dal cussegl da fundaziun da l'ospital da la Crusch han, cuntrariamain a las determinaziuns en il contract, tractà davart la surpigliada cun la gruppa privata d'ospitals “Hirslanden”, sustegnida da la UBS.

En quest connex vulessan ils sutsegnads far intginas dumondas a la regenza:

1. La regenza ed il cussegl grond han dà las directivas politicas per realisar il plaz d'ospitals Cuira (tranter auter la finamira nr. 26, program annual 2002). La regenza era er perschenta a la preschentaziun dal plaz d'ospitals Cuira.Sustegna la regenza anc adina il plaz d'ospitals Cuira? Tgenina è la basa giuridica per la realisaziun dal plaz d'ospitals? Sche la basa giuridica na fiss betg suffizienta, quant temp avess ins a disposiziun per elavurar ina tala e suttametter quella al cussegl grond e forsa al pievel?

2. Tge pussaivladads vesa la regenza, resp. il cussegl grond, da promover u da sfurzar ina cooperaziun da tut ils participads?

3. Exista la pussaivladad da pretender enavos las investiziuns ch'ils pajataglias han procurà per l'ospital da la Crusch, en il cas che l'ospital vegn vendì ad ina societad orientada tenor il profit?

4. Correspunda ina tala vendita al document da fundaziun da l'ospital da la Crusch?

5. Ha la regenza la pussaivladad, respectivamain l'intenziun, sco quai che cusseglier guvernativ Aliesch aveva remartgà l'avust 2001, dad annular l'ospital da la Crusch da la glista d'ospitals, per cas che la clinica avess da vegnir vendida a privats?

6. Tge consequenzas finanzialas avess quai per il chantun, per la corporaziun da vischnancas e per las persunas che pajan premias e taglias en noss chantun, sche la gruppa Hirslanden surprendess l'ospital da la Crusch cun, resp. senza l'annular da la glista d'ospitals.

7. Tge dischavantatgs avess la prevenziun sanitara per ils abitants dal Grischun, sch'il project plaz d'ospitals Cuira giess ad aua?

Cuira, ils 27 da mars 2002

Name: Trepp, Bucher, Hanimann, Arquint, Augustin (Almen), Augustin (Cuira), Bachmann, Beck, Brasser, Brüesch, Büsser, Cathomas, Catrina, Cavegn, Caviezel (Cuira), Christoffel, Conrad, Donatsch, Feltscher, Frigg, Geisseler, Hardegger, Hess, Jäger, Jeker, Joos, Juon, Kasper, Kehl, Keller, Koch, Loepfe, Looser, Luzio, Märchy, Marti, Nigg, Noi, Parolini, Patt, Pfiffner, Robustelli, Schütz, Thomann, Walther, Wettstein, Zindel

Session: 27.03.2002
Vorstoss: rg Interpellation


Resposta da la regenza

La regenza respunda las dumondas fatgas sco suonda:

1. La regenza sustegna vinavant il plaz d'ospitals Cuira. Il concept da realisaziun che la cumissiun d'ospitals communabla da la societad simpla „Ospitals Cuira“ (COC) ha elavurà garantescha, cun unir las forzas, in provediment medicinal qualitativamain aut per la populaziun da la regiun d'ospital da la Val dal Rain grischuna sco er per l'entir intschess da provediment dals ospitals. Cun concentrar ils pazients en unitads optimalas per l'economia da manaschi pon ultra da quai vegnir tratgas a niz meglier las resursas dal plaz s'ospitals Cuira ed uschia er vegnir purschidas prestaziuns pli economicas. I na dat nagina basa legala per la realisaziun dal plaz d'ospitals Cuira. La realisaziun dal plaz d'ospitals Cuira pretenda il consentiment da tut ils purtaders dals ospitals participads. L'idea dal plaz d'ospitals Cuira na po uschia er betg vegnir realisada tras ina midada da la lescha.

2. La regenza po, per conceder las contribuziuns da manaschi usitadas, obliar u pretender che l'ospital chantunal e l'ospital da la Crusch sa participeschian a la realisaziun dal plaz d'ospital Cuira tenor il concept da la COC e quai en l'interess d'in provediment da sanitad optimal areguard l'economia cumplessiva.

3. Gea. Sch'in ospital che ha survegnì sustegn cun contribuziuns chantunalas da construcziun mida ses intent avant la scadenza da 25 onns da gestiun, sto vegnir restituì per mintg'onn che manca quatter pertschient da la contribuziun conderschida.

4. Tenor il document da fundaziun ha la fundaziun „l'intent da surpigliar l'ospital da la Crusch a Cuira che vegn manà dapi il 1853 da las soras misericordiaivlas da la sontga Crusch ad Ingenbohl (internat Ingenbohl) e da manar quel en il senn da la legislaziun chantunala e dals statuts da la suprastanza da la regiun d'ospitals dals 18 d'avust 1980..... da s'occupar vinavant d'in provediment medicinal economic adattà als basegns tras l'ospital da la Crusch“. Quest intent fixà da la fundaziun en il document da la fundaziun cuntegna in scumond d'alienaziun da l'ospital da la Crusch. L'ospital da la Crusch serva directamain a quest intent cun sia valur reala e betg mo cun sia valurda facultad.

5. Da princip gea. Encunter betg recepir resp. per annular l'ospital da la Crusch da la glista dals ospitals pon ils purtaders far recurs tar il cussegl federal.

6. Sche l'ospital da la Crusch vegniss laschà sin la glista d'ospitals er suenter che la gruppa Hirslanden l'avess surpiglià, pudess el cuntinuar cun si'occupaziun en la dimensiun dal mandat da prestaziun concedì a quint da l'assicuranza da malsauns obligatoria. En quest cas na fissan las premissas per la concessiun da contribuziuns da deficit davart dal chantun e da las vischnancas betg pli dadas ed il pajataglia fiss distgargià. Pli fitg engrevgiads fissan perencunter ils pajaders da premias. Autramain sa preschenta la situaziun, sch'il parlament (ed en il cas d'in referendum il suveran) suonda la proposta dal cussegl federal da midar la lescha federala davart l'assicuranza da malsauns en la sparta da la finanziaziun dals ospitals. En quest cas sto surpigliar il chantun er la mesadad dals custs da manaschi e d'investiziun dals purtaders privats che figureschan sin la glista d'ospitals.Annular l'ospital da la Crusch sin la glista d'ospitals avess per consequenza ch'el n'avess pli la permissiun da cuntinuar si'occupaziun a quint da l'assicuranza obligatoria per la tgira da malsauns . Ils custs da tractament stuess lura surpigliar il pazient. La surpigliada da l'ospital da la Crusch n'avess en quest cas naginas consequenzas finanzialas per ils pajaders da premias. Per encunter scrudass la participaziun al deficit da gestiun dal chantun e da las vischnancas. Per il pajataglia èsi en tuts dus cas relevant che la limitaziun dals custs che resultass da la sminuaziun da duplicitads en l'ospital chantunal na pudess betg vegnir realisada.

7. Cun optimar las structuras sin il plaz d'ospitals Cuira èsi plitost pussaivel da finanziar il
svilup fitg char da la medischina da center. Sch'il plaz d'ospitals Cuira giess ad aua, stuess la populaziun grischuna percunter duvrar pli savens ospitals ordaifer il chantun.

Datum: 23 d'avrigl 2002