Navigaziun principala

Cuntegn da la pagina

Interpellaziun concernent la politica d'asil e d'immigraziun en il chantun Grischun

Sessiun: 27.03.2002

Las cifras sin plaun federal mussan ch'il dumber dals asilants è sa reducì ad interim. Ma quest dumber n'ha mai pli cuntanschì in nivel bass per propi. Uss crescha il dumber puspè, schebain ch'ins discurra d'ina quietezza en ils fatgs d'asil. Quai fa supponer ch'er ils chantuns e las singulas vischnancas vegnian pertutgads fermamain da questa problematica.
Ils davos onns han era mussà che la politica d'asil e d'immigraziun n'è betg vegnida fatga cun la medema consequenza en tut ils chantuns. Il chantun Grischun ha dentant mantegnì in curs rectilign.
Igl è impurtant da tegnair en egl la problematica da la politica d'asil e d'immigraziun e da far attent a quella. Igl è da far transparentas las cifras per pudair enconuscher e prender en maun ils problems.

En quest connex fan las interpellantas ed ils interpellants las sequentas dumondas a la regenza:

1. Quants requirents d'asil sa trategnan actualmain en noss chantun?
a. en la procedura d'emprim'instanza
b. en la procedura da segunda instanza
c. sco persunas admessas provisoriamain
d. cun ina resposta negativa avant la scadenza dal termin da partenza
e. cun ina resposta negativa e cun la scadenza dal termin da partenza

2. Co èn sa sviluppads ils dumbers dals cas effectivs e dals cas d'execuziun en noss chantun durant ils davos 10 onns?

3. Quant ditg sa trategnan ils requirents d'asil actualmain en media en noss chantun?
a. en alloschis collectivs
b. en alloschis individuals

4. Quants custs han chaschunà ils fatgs d'asil l'onn passà per il chantun?

5. Quants da quels custs vegnan surpigliads da la confederaziun?

6. Quantas persunas èn vegnidas admessas en il rom da l'acziun umanitara (Humak 2000)?

7. Quantas persunas èn vegnidas admessas ils davos onns en il chantun, e quai en il rom dalas regulaziuns da la polizia d'esters?

8. Han ins examinà consequentamain en ils cas da direzza las pretensiuns dal tribunal federal u han ins sin questa via simplamain reducì las pendenzas en favur da la confederaziun?

9. Tge fa il chantun per evitar lungas proceduras e per meglierar l'execuziun?


Cuira, ils 27 da mars 2002

Name: Brüesch, Hardegger, Zinsli, Bär, Barandun, Battaglia, Beck, Berther (Sedrun), Brüesch, Brunold, Butzerin, Casanova (Cuira), Casanova (Vignogn), Cavegn, Caviezel (Pitasch), Christoffel, Conrad, Crapp, Dalbert, Farrér, Federspiel, Geisseler, Giovannini, Göpfert, Gross, Hartmann, Heinz, Hess, Hübscher, Jeker, Juon, Kessler, Koch, Luzi, Maissen, Märchy, Möhr, Montalta, Parolini, Patt, Peretti, Portner, Ratti, Rizzi, Robustelli, Roffler, Suter, Thomann, Trachsel, Tremp, Tscholl, Tuor (Mustér), Valsecchi, Vetsch, Walther, Wettstein, Zarro

Session: 27.03.2002
Vorstoss: rg Interpellation


Resposta da la regenza

La regenza respunda las dumondas fatgas sco suonda:

1. La fin da mars sa trategnevan totalmain 574 requirents d'asil en il chantun Grischun. Tar l'uffizi federal per fugitivs (UFF) eran pendentas las dumondas da 295 persunas (dumonda 1 lit. a) e tar la cumissiun da recurs en fatgs d'asil (CRA) eran pendentas las dumondas da 150 persunas (dumonda 1 lit. b). Suenter la procedura d'asil terminada èn sa trategnidas vinavant en il chantun Grischun 41 persunas en il rom da lur termin da partenza (dumonda 1 lit. d) ed ulteriuras 69 persunas er suenter la scadenza da lur termin da partenza (dumonda 1 lit. e). Las proceduras d'ulteriuras 19 persunas èn vegnidas sistidas per auters motivs. Ultra da quai sa trategnevan la fin da mars anc 658 persunas sco admessas provisoriamain en il chantun Grischun (dumonda 1 lit. c).

2. Ils dumbers dals effectivs, repartids tenor ils differents motivs da dimora, vegnan preschentads da l'uffizi da polizia (UP) mintg'onn detagliadamain en il rapport annual. En il medem lieu vegni infurmà er davart las activitads executivas respec-tivas. Ina statistica cumplessiva davart ils cas d'execuziun n'ha l'uffizi cumpetent dentant betg fatg per la perioda en dumonda. Ils davos onns èn vegnids exequids mintgamai tranter 77 e 228 repatriaments per onn.

3. La durada media da la dimora da tut ils requirents d'asil munta a 633 dis. La durada da la dimora en alloschis collectivs u individuals na vegn betg registrada statisticamain.

4. L'onn 2001 èn vegnidas fatgas totalmain expensas en l'autezza da fr. 12'426'000.-- per ils fatgs d'asil en il chantun Grischun, da quellas fr. 1'357'000.-- per las proceduras e per l'execuziun (uffizi da polizia) e fr. 11'069'000.-- per l'assistenza dals requirents d'asil e da las persunas admessas provisoriamain (uffizi dal servetsch social).

5. Las lavurs da l'UP, sco la realisaziun da las proceduras, la preparaziun da decisiuns e la cussegliaziun per il return èn vegnidas indemnisadas per l'onn 2001 circa a mesadad cun fr. 696'000.--. Per l'assistenza e l'alloschament indemni-sescha la confederaziun ils chantuns cun pauschalas che cuvran dal tuttafatg ils custs da l'uffizi dal servetsch social.

6. En il rom da la HUMAK 2000 èn vegnidas principalmain admessas provisoriamain 172 persunas en il chantun Grischun.

7. Tranter il 1. da schaner 1998 ed ils 31 da mars 2002 han obtegnì 303 persunas dal champ d'asil ina permissiun da dimora B da la polizia d'esters. La gronda part da quests cas èn vegnids reglads sco uschenumnads cas da direzza u en il rom da dumondas per l'arriv successiv da la famiglia.

8. En accordanza cun la pratica d'auters chantuns da la Svizra orientala e dal chantun Turitg fa er il Grischun dapi var in onn mo pli ina examinaziun summara dals cas da direzza, e quai en il rom da criteris formals sco la durada dal segiurn, l'activitad da gudogn, la chastiabladad, la dependenza dal provediment e.u.v. Ils criteris sa basan sin la giurisdicziun dal tribunal federal (cf. DTF 124 II 110). Sch'ils criteris formals èn ademplids, alura vegnan presumads l'integraziun e consequentamain il cas da direzza sco dads ed il cas vegn assegnà a la con-federaziun cun ina proposta positiva. La pratica dals chantuns en connex cun suttametter cas da direzza è dentant aunc pauc unifitgada e la confederaziun sezza n'observa medemamain betg ina pratica consequenta ed unifitgada per approvar quests cas.

Da princip decidan l'UFF e la CRA davart l'andament da las singulas proceduras e pia era davart lur durada. Sco unic chantun prepara il Grischun dentant anc sez ina part da sias decisiuns en fatgs d'asil. Uschia pon ins cuntanscher ina acceleraziun efficazia da las proceduras. Sch'i dat requirents d'asil chastiabels ed asocials, vegni proponì da tractar lur proceduras cun prioritad. Il chantun fa mintgamai attent las instanzas respectivas a proceduras che duran spezialmain ditg.

Datum: 23 d'avrigl 2002