Navigation

Inhaltsbereich

Sessiun: 27.03.2002

Tenor ina decisiun da princip da l'uffizi da construcziun bassa dal chantun vegnan las vias automaticamain schlargiadas en connex cun sanaziuns. Uschia vegnan schlargiadas las vias lateralas da 3.60 m sin 4.20 m u da 5.20 m sin 5.80 m. Quai fa per part pauc senn.
Ils meds chantunals per il mantegniment da nossa gronda rait da vias èn limitads e cun ils meds limitads ch'èn avant maun duessan vegnir schlargiadas las vias sulettamain sch'il basegn è cumprovà. Schlargiar las vias è mintga giada er ina usurpaziun da nossa cuntrada, saja quai entras construcziuns artifizialas, mirs da sustegn pli auts e.u.v. Savens pledan er motivs da la tgira da monuments cunter in schlargiament da las vias.
I fiss perquai da beneventar, sch'i vegniss adina decidì da cas en cas ed a moda flexibla, sch'in schlargiament d'ina via è vairamain necessari.

Jau fetsch perquai las suandantas dumondas a la regenza:

1. Co giuditgescha la regenza la decisiun da princip da l'uffizi da construcziun bassa dal chantun e sin tge basa legala sa funda questa decisiun?

2. Na po la decisiun da princip da l'uffizi da construcziun bassa dal chantun betg pli vegnir abrogada per uschia pudair chattar en mintga cas schliaziuns flexiblas ed adattadas al lieu?

3. Quant auts èn ils custs supplementars, absoluts ed en pertschient per meter per il schlargiament da vias? Datti en quest connex calculaziuns?

4. Èn las respostas da la regenza sin l'interpellaziun Ochsner dals 27 da november 1992 anc valaivlas?

Cuira, ils 27 da mars 2002

Name: Looser, Jäger, Schütz, Arquint, Augustin (Almen), Brasser, Bucher, Caviezel (Cuira), Frigg, Locher, Meyer, Noi, Pfiffner, Trepp, Zindel

Session: 27.03.2002
Vorstoss: rg Interpellation


Resposta da la regenza

Igl è ina realitad ch'i vegn fabritgà bainprest sulettamain camiuns ed autocars cun ina ladezza da 2.5 m. Inclusiv il spievel da la vart e la distanza da segirezza dovra in tal vehichel tar in surpassament ed ina spertadad da 40 km/h in spazi da 3.4 m ladezza. Senza guntgidas èsi perquai be pussaivel da cruschar cun in auto da persunas sin ina via da 5.2 m ladezza, sch'ins po guntgir sin ils banchets che n'èn per part betg fitg stabils. Talas manevras da cruschar èn privlusas. Tras il squitsch sin ils urs dals vials s'augmenta plinavant er la necessitad dal mantegniment, sch'ils urs dal vial vegnan isads e la finala splattads. L'auzament da la ladezza da la via per vias da colliaziun impurtantas è perquai la consequenza dal svilup sin il martgà dals vehichels. L'adattaziun da la ladezza da la via a las novas pretensiuns na succeda dentant betg a moda schematica. Ella vegn giuditgada da nov da cas en cas tar amplificaziuns e construcziuns novas da las vias tut tenor l'impurtanza da la via ed ils basegns dal traffic.

Davart las dumondas concretas:

1. La regenza po suandar las ponderaziuns da princip da l'uffizi da construcziun bassa pertutgant las normas che sa basan sin las normas svizras renconuschidas.

2. Uschenavant ed uschè ditg che l'uffizi da construcziun bassa giuditgescha a moda differenziada e flexibla las ladezzas da las vias n'exista nagin motiv da metter generalmain en dumonda las ladezzas da las vias.

3. Ils custs per in meter via èn da princip dependents da la topografia. Trajects da vias libers senza construcziuns artifizialas èn considerablamain pli bunmartgads che construcziuns da punts e tunnels. Valurs da standard na pon consequentamain betg vegnir inditgadas, perquai ch'il trassé, la configuraziun dal terren, la problematica da drenadis e.u.v. pon avair influenzas sin ils custs da construcziun. La supposiziun ch'ils custs s'augmentian proporziunalmain a la ladezza da la via n'è betg gista en connex cun questas cundiziuns da basa.

4. La resposta sin l'interpellaziun Ochsner (1992) è anc adina valaivla, uschenavant che las cundiziuns da basa da la societad, economicas e giuridicas n'èn betg sa midadas.

    Datum: 23 d'avrigl 2002