Navigaziun principala

Cuntegn da la pagina

Interpellaziun concernent l'adiever da la part da la distribuziun dal gudogn da la banca naziunala svizra (BNS) ch'è previsa per il chantun

Sessiun: 28.05.2002

Il departament federal da finanzas e la banca naziunala svizra èn sa cunvegnids che la banca naziunala vegn ad augmentar a partir da l'onn 2003 en il rom da la reducziun da las reservas d'aur la distribuziun dal gudogn a la confederaziun ed als chantuns da fin uss 1.5 milliardas francs sin 2.5 milliardas francs. Tenor cunvegna survegnan ils chantuns 2/3 da questa summa e la confederaziun 1/3. La cunvegna vala per ils onns 2003 2007, probablamain fin 2012.
Il chantun Grischun survegn actualmain ina part da 26.6 milliuns francs per onn. Questa part vegn probablamain augmentada per 17.7 milliuns francs sin da nov 44.3 milliuns francs. Ils meds da la banca naziunala che vegnan distribuids als chantuns n'èn betg colliads cun in intent determinà.

La stad passada èn vegnidas infurmadas las vischnancas davart la finanziaziun planisada da la cassa da pensiun chantunala. Tenor quellas infurmaziuns duain cuvrir las vischnancas sur 80 milliuns francs dal deficit presumtiv da 345 milliuns francs. La finanziaziun engrevgiescha fitg la gronda part da las vischnancas. Per bleras è cuntanschida u schizunt surpassada la limita da la supportabladad. La situaziun finanziala da diversas vischnancas grischunas vegn mendra, er sche la cumpart che tutga a las singulas vischnancas per la finanziaziun vegn repartida sin tschintg onns tras la furmaziun da reservas. Cun quai n'èn er betg exclus spustaments vers engiu da la gruppa cun capacitad finanziala, quai ch'è danovamain cumbinà cun consequenzas negativas per il chantun perquai ch'i ston vegnir distribuids dapli daners da subvenziun. Da l'autra vart vegnan las vischnancas adina confruntadas cun novas incumbensas, uschia er tras il chantun per exempel en il sectur da scola (promoziun da scolars fitg talentads, surveglianza da scola e.u.v.).

Ils interpellants èn da l'opiniun ch'er las vischnancas duessan vegnir participadas a quest regal da daners nunspetgà. È la regenza pronta d'utilisar entiramain u per part la distribuziun supplementara dal gudogn da la banca naziunala svizra per cuvrir ils custs da la part dal deficit da la cassa da pensiun chantunala che tutga a las vischnancas?

Cuira, ils 28 da matg 2002

Name: Tramèr, Nigg, Tuor (Mustér), Ambühl, Bär, Berther (Sedrun), Bucher, Büsser, Cahannes, Casanova (Vignogn), Catrina, Cavegn, Christ, Claus, Comazzi, Crapp, Dalbert, Demarmels, Dermont, Donatsch, Feltscher, Geisseler, Giacometti, Giuliani, Hanimann, Hartmann, Hess, Jeker, Jenny, Joos, Kessler, Lardi, Loepfe, Luzio, Maissen, Möhr, Nick, Parolini, Pfiffner, Plozza, Portner, Quinter, Ratti, Robustelli, Roffler, Scharplatz, Stiffler, Thomann, Tremp, Tuor (Trun), Vetsch, Walther, Wettstein, Zanolari, Zarro

Session: 28.05.2002
Vorstoss: rg Interpellation


Resposta da la regenza

Tenor l'opiniun dals interpellants duai duvrar il chantun la distribuziun supplementara dal gudogn ch'è da spetgar a partir da l'onn 2003 da la banca naziunala svizra (BNS) cumplainamain u parzialmain per cuvrir la part che tutga a las vischnancas dal deficit da la cassa da pensiun chantunala dal Grischun.

En quest connex èsi da menziunar ch'il conclus supplementar dal cussegl grond en la sessiun d'october 2000 pretenda ina finanziaziun tenor il chaschunader da la cassa da pensiun chantunala tras ils patruns ch'èn colliads cun questa. El oblighescha la regenza d'eruir la part da l'import da deficit per mintga patrun ch'è collià obligatoriamain e da reglar quest cun in contract fin la fin da l'onn 2001. Las tractativas cun ils patruns, cunzunt cun las vischnancas, han gì lieu. En il fratemp èn vegnids suttascrits blers contracts. Bleras vischnancas han fatg reservas, tenor las recumandaziuns da la regenza, tar il rendaquint 2001. Singulas vischnancas han l'intenziun da far pajaments parzials durant l'onn current 2002. Igl è perquai da refusar categoricamain da revocar il conclus dal cussegl grond da l'october 2000. Quai stess er en cuntradicziun cun il conclus dal plan da finanzas dal cussegl grond, tenor il qual il spustament da las chargias tranter il chantun e las vischnancas è sche pussaivel d'evitar.

La finanziaziun da la cassa da pensiun chantunala engrevgiescha senza dubi las bleras vischnancas. Cunquai che las vischnancas han medemamain profità en il passà da las contribuziuns memia bassas a la cassa da pensiun chantunala ed han er chaschunà quest deficit è lur participaziun a la finanziaziun giustifitgada. Sulettamain per cumplettar saja anc menziunà ch'er il chantun è pertutgà grondamain da la finanziaziun. Malgrà quai è la regenza intenziunada da proponer al cussegl grond ch'il chantun surpiglia supplementarmain ina part da las obligaziuns (? evitar 2 x part; cumpart è surs.) da las vischnancas. Las vischnancans èn vegnidas infurmadas da quai. In'ulteriur spustament da las grevezzas da las vischnancas sin il chantun n'è dentant ni giustifitgà confurm als fatgs ni finanzialmain raschunaivel.

Il Grischun è vegnì engrevgià ils ultims onns massivamain da la vart da la confederaziun. Quai stat en connex cun l'augment considerabel da noss chantun en la classificaziun da la capacitad finanziala interchantunala. La grevezza supplementara che resulta da quai da bel e bain 35 milliuns francs porta il chantun per 95% sez, malgrà che la capacitad finanziala cumpiglia egualmain la situaziun da las vischnancas. Er ils massivs custs supplementars en il sectur da las ospitalisaziuns extrachantunalas sco er la reducziun da las premias da las cassas da malsauns porta il chantun senza participaziun da las vischnancas.

Ulteriuras considerablas chargias supplementaras tutgan ils proxims onns al chantun, uschia surtut:
    - il supplement dal martgà da lavur per il persunal en il sectur d'ospitals (a partir da 2002),
    - las subvenziuns da pazients d'ospitals ch'èn assicurads mezprivat e privat (a partir da 2002),
    - contribuziuns d'investiziun fitg autas a la VR (a partir da 2003),
    - la gulivaziun da la progressiun fraida tar las taglias chantunalas (a partir da 2005),
    - il pachet da taglia 2001 da la confederaziun per distgargiar las famiglias (a partir da 2005).

Questa enumeraziun n'è betg cumpletta. La part dal gudogn da la BNS ch'è da spe-tgar supplementarmain na vegn da l'autra vart betg a tanscher per pajar p.ex. ils custs supplementars da la finanziaziun d'ospitals per pazients ch'èn assicurads mezprivat e privat sco er las fluctuaziuns annualas dals tschains d'aua. Ord questa vista n'èsi betg pussaivel d'utilsar la part dal gudogn en il senn da la proposta dals interpellants.

Datum: 25 da zercladur 2002