Per il 1. da schaner 2003 vegn mess - sco consequenza da la sortida da la Loterie Romande or da la societad da lotto svizzer - mess la structura da lottaria en Svizra sin ina nova basa. Las societads da lottaria - lottaria naziunala interchantunala, la societad da lottaria SEVA sco era la societad da sport-toto - responsablas per la realisaziun dal lotto svizzer e da las scumessas da sport en la Svizra tudestga e taliana uneschan lur fatschenta ad in unic menaschi manà centralmain sut il nov num „SwissLotto-SwissLos“. Questas midadas han profundas consequenzas sin las singulas societads, la realisaziun da las lottarias e scumessas da sport sco era sin il pajament dal gudogn dal gieu.
Anc enfin la fin da quest onn survegnan ils chantuns independentamain da la lottaria naziunala interchantunla resp. dal fond da lottaria naziunala las parts dal gudogn dals numers da la lottaria svizra e da las scumessas da sport che gudognan annualmain. Ils daners da la lottaria vegnan attribuids al fond da lottataria resp. al fond da sport-toto entaifer il chantun. Las dus domenas èn pertutgond l'organisaziun cumplettamain independentas ina da l'aultra. Ils retgavs dal fond da sport-toto vegnan pajads per radund la mesadad en furma da pajaments directs allas federaziuns da sport dal chantun Grischun, l'autra mesadad da l'import cula medemamain en il sport organisà da dretg privat, uschè per num en occurrenzas da sport, acquists d'urdains da sport e bajetgs da sport.

Tras la creaziun da la nova societad SwissLotto-SwissLos ch'è planisada vegnan pajads als chantuns a partir dal 1. da schaner 2003 ils retgavs nets da la lottaria naziunala e da las scumessas da sport. La derivanza dals meds finanzials vegn però exiliada vinavant da la nova societad. Igl è damai anc adina visibel tge parts dal gudogn che resulteschan da las scumessas da lottaria (lotto, lottarias restantas), e tgeninas or da las scumessas da sport. Plinavant èsi da resguardar che dal gudogn da radund 60 mio. francs dal retgav net, il qual la societad da sport-toto reparta annualmain als chantuns en favur da la promoziun dal sport, ed ils ca. 2.5 mio. francs, ils quals las federaziuns naziunalas da sport survegnan, deriva la pi gronda part da las
scumessas da la lottaria. Cun questa regulaziun che vala dapi l'onn 1970 e che duai vegnir mantegnida er'en l'avegnir per la part da las federaziuns da sport, èsi vegnì stgaffì gia tar l'introducziun dal lotto in cuntrapaisa tar la reducziun dals stgomis da las scumessas da sport.

La redistribuziun proponida en il postulat Trachsel da la part dal gudogn en relaziun da 70% per il fond da lottaria e 30% per il fond da sport-toto signifitgass in spustament essenzial en favur da la promoziun dal sport. Ina analisa da la promoziun chantunala dal sport fa attent ch'existan gia numerus chanals, sur ils quals il sport vegn sustegnì.
In'inoltraziun dal postulat senza resalvas cuntegness il privel da laschar cular novs daners en il sport senza resguardar ils secturs da promoziun existents resp. senza enconuscher e survesair tals.

Midadas en reguard a l'onn 2003 paran a la regenza prematurs e na duessan betg succeder senza in'analisa precedenta. Mumentan n'èn importantas cundiziuns da basa pertutgant la repartiziun dals meds finanzials betg anc scleridas a la fin. En spezial vali d'examinar sche las modalitads per l'examinaziun da las dumondas e da la repartiziun dals meds finanzials da promoziun na duessan betg vegnir adattadas a quellas da la promoziun da cultura sinaquai ch'ils meds finanzials possian vegnir duvrads anc pli sistematicamain. Enfin che questa analisa exista na duess la part dals meds finazials per il sport, indepententamain dal svilup tar la lottaria naziunala interchantunala, la societad da lottaria SEVA e la societad da sport-toto, betg vegnida midada essenzialmain. En general duai però vegnir tegnì ferm ad in engaschament orientà al basegn da l'adiever dals meds finanzials da promoziun. Igl è però il giavisch da la regenza ch'il sport na survegnia era sut las novas relaziuns en nagin cas damains pussaivladads mabain daplis ch'enfin ussa.

Tenor il menziunà dumonda la regenza d'assegnar il postulat cun l'incumbensa generala d'analisar e d'examinar da princip il status quo da la finanziaziun monentana dal sport da dretg privat sur il maun public e sur il fond da sport- toto quant lunsch ch'il basegn d'agir è dà. Tenor tal èsi d'elavurar in concept che permetta en il futur ina clera politica sin il champ da la promoziun da sport, trair a niz sinergias ed evitar duplicitad. En quest connex è era da tractar la dumonda dals meds finanzials e dals fonds da reservas. La mira sto esser da cuntanscher ina meglieraziun da la situaziun tar la promoziun dal sport senza ina midada da lescha.

Datum: 13 d'avust 2002