Navigaziun principala

Cuntegn da la pagina

Interpellaziun concernent la biblioteca chantunala grischuna

Sessiun: 28.05.2002
En la biblioteca chantunala sto vegnir remplazzà il sistem EED per bibliotecas Dobis/Libis fin l'onn 2004, perquai che quest sistem vegn sustegnì dal producent be anc fin a quel termin e na correspunda ultra da quai betg als basegns da la politica da furmaziun. Per la projectaziun e la substituziun han ins dà congedi als responsabels da la EED da la biblioteca.

Per cuntanscher questas capacitads dal persunal han ins reducì dapi il 1. da fanadur 2001 las uras d'avertura da la biblioteca chantunala. Dapi alura è la biblioteca serrada il glindesdi. Sco quai che vegn mussà en il rapport annual 2001 è il dumber dals utilisaders sa sbassà correspundentamain. La reducziun da 13% è marcanta. La biblioteca chantunala è d'impurtanza surordinada en noss chantun. Ella fa part dal "service public". Ella na serva betg sulettamain sco emprest da cudeschs vers l'exteriur, mabain ella vegn er tschernida gugent sco lieu da studi da noss scolars e students, tant dapli ch'ils problems da plazza a la scola chantunala sforzan da chattar autras soluziuns. La serrada da glindesdi è ultra da quai fitg malpratica per ils utilisaders da la biblioteca pastorala.

Ils interpellants speran che questa situaziun pauc cuntentaivla a la biblioteca chantunala grischuna possia vegnir eliminada il pli spert pussaivel e dumondan perquai:

1. Èsi pussaivel d'avrir puspè la biblioteca surtut il glindesdi ed a partir da cura?

2. A partir da tge data po la biblioteca puspè vegnir messa a disposiziun al public durant las uras d'avertura usitadas?

Cuira, ils 28 da matg 2002

Name: Claus, Augustin, Ambühl, Biancotti, Bischoff, Brüesch, Brunold, Bucher, Büsser, Cahannes, Casanova (Cuira), Catrina, Caviezel, Cavigelli, Christ, Christoffel, Donatsch, Farrér, Feltscher, Giacometti, Hanimann, Hardegger, hartmann, Hess, Jenny, Joos, Koch, Lardi, Lemm, Loepfe, Luzio, Marti, meyer, Nick, Nigg, Parolini, Peretti, Pfiffner, Plozza, Portner, Quinter, Robustelli, Roffler, Sax, Scharplatz, Schmid (Val S. Pieder), Suenderhauf, Suter, Thomann, Tramèr, Tuor (Mustér), Valsecchi, Walther, Wettstein, Zanolari, Zarro, Zegg, Zindel, Zinsli

Session: 28.05.2002
Vorstoss: rg Interpellation


Resposta da la regenza


Sch'ins guarda il svilup da las incumbensas da la biblioteca chantunala grischuna datti en egl spezialmain ina chaussa: il temp tranter il mantegniment da l'inventari „vegl“ e l'integraziun da novas incumbensas vegn pli e pli grond. Dad ina vart èsi urgent da prender mesiras per mantegnair la collecziun a lunga durada e da l'autra vart ston vegnir integrads en la purschida novs purtaders e novs chanals d'infurmaziun. Il mantegniment dal vegl e l'integraziun dal nov han la medema impurtanza. Be la cumbinaziun da la memoria istorica cun la savida e la tecnologia dad oz pussibilitescha in servetsch attractiv e porscha la garanzia per ina biblioteca chantunala che correspunda a las pretaisas d'ina societad scientifica.

Dapi il 1. da fanadur 2001 è la biblioteca chantunala serrada il glindesdi per la clientella. En l'administraziun vegni lavurà sco usità. La regenza va perina cun ils interpellants ch'ina biblioteca publica serrada cun localitads attractivas è da princip in stgandel. Igl è sta necessari da serrar la biblioteca il glindesdi sco ch'i stat cun raschun en l'interpellaziun per pudair realisar cun agens meds las lavurs en connex cun la substituziun dal sistem EED en la cuminanza da bibliotecas dal Grischun. Il temp d'avertura pon ins midar adina puspè. Ma spargnar tar il mantegniment da la collecziun po far donns irrevisibels. Dentant l'impressiun che l'interpellaziun sveglia, che la bibilioteca chantunala disponia da plirs respunsabels per l'EED, n'è betg giustifitgada en quest connex; per la surveglianza dal sistem EED e da la cuminanza da bibliotecas stat a disposiziun sulettamain ina persuna cun in pensum parzial da 50 pertschient.

Il project EED ha success e sa chatta per il mument en ina fasa da realisaziun. Davent da Pasca 2003 vegn la cuminanza da bibliotecas dal Grischuna a posseder ina plattafurma d'EED ch'è cumpatibla cun ils chantuns vischins sco Tessin, Son Gagl e cun las bibliotecas impurtantas da la Bassa. La nova schliaziuns pussibilitescha ultra da quai l'integraziun da purschidas digitalas en la biblioteca.

Resposta a las dumondas:

- I correspunda al giavisch da la regenza e da la direcziun da la bibilioteca d'avrir puspè la biblioteca chantunala il glindesdi almain per part. Il motiv direct per serrar la biblioteca il glindesdi la substuituziun da la software da la biblioteca Dobis/Libis en la cuminanza da biblioteca dal Grischun dura anc fin la mesadad d'avrigl 2003. A Pasca dal 2003 vegn tenor il plan dal project cumenzada la lavur cun il nov sistem ALEPH. La biblioteca chantunala quinta cun in ulteriur mez onn fin ch'il manaschi è sa normalisà.

- La bibliotca chantunala sa restructurescha per il mument: dapi l'atun 2001 lavura il manaschi cun ina nov'organisaziun dal persunal. Per il 1. da schaner 2002 occupa la biblioteca in'ulteriura plazza. La fin dal 2002 vegn schlià il sectur da documentaziun da pressa ed en ses lieu vegn stgaffì per l'emprima giada in scretariat nua che pliras collavuraturas pon surdar incumbensas. En il sectur d'EED vegn en avegnir acquistada ina part da la surveglianza dal sistem tar il chantun Son Gagl. Ina segunda collavuratura interna duai vegnir scolada pli intensivamain per lavurs spezificas d'EED. Questas restructurisaziuns cumplexas vegnan a sa stabilisar probablamain la fin dal 2003. Per la regenza para perquai la primavaira 2004 il mument adattà per giuditgar puspè la situaziun e per examinar ils temps d'avertura da la biblioteca chanutnala da novamain.

Datum: 13 d'avust 2002