Navigaziun principala

Cuntegn da la pagina

Postulat concernent il rapport da famiglia dal Grischun

Sessiun: 28.05.2002
Politica da famiglia è ina politica classica da tagl traversal che cumpiglia ils differents aspects surtut or dals secturs spezials sco politica da finanzas, politica dal martgà da lavur, politica sociala, politica da furmaziun, politica da sanadad (p.ex. RIP) ed uschia vinavant. Ina politica da famiglia cun finamira è urgentamain necessaria en noss chantun. Pertge? Per differents motivs èn las famiglias adina dapli sut pressiun.

Uffants ch'eran pli baud ina garanzia per la segirezza sociala ed ina reputaziun entaifer la societad furman oz il pli grond potenzial da povradad per ina famiglia. Ins discurra da la trapla da famiglia. Surtut persunas ch'educheschan sulettas han ina ristga da crudar sut il cunfin da povradad ch'è 2.18 giadas pli auta che la media da la populaziun.

Las valurs da la societad èn sa midadas. Dunnas realiseschan il giavisch legitim da colliar la famiglia e la professiun. Ultra da la famiglia classica, nua che la lavur da gudogn e da famiglia vegn repartida tranter ils geniturs (per regla a moda specifica tenor las schlattainas), datti er la famiglia cun domadus geniturs che lavuran. Tgira d'uffants professiunala che cumplettescha la famiglia daventa necessaria. Latiers èsi da remartgar che las entradas dublas dals geniturs èn absolutamain indispendablas per blers tegnairchasas (working poor).

Pervia da divorzis èn naschidas ulteriuras furmas da famiglias (famiglias da patchwork). Il dumber da las persunas ch'educheschan sulettas s'augmenta permanentamain.

L'evidenza per in pèr d'avair uffants è daventada opziunala. Uschia vegn repartida sin adina pli paucs la responsabladad principala e la grevezza principala per la generaziun futura. A nossa societad vegn a mancar la descendenza. La rata da reproducziun munta a 1.2 uffants sin in pèr, ina quantitad da 2.1 fiss necessaria per in svilup demografic stabil. Tar insaquants pèrs è il giavisch d'avair uffants pli aut ch'il dumber actual d'uffants che resta pitschen per motivs finanzials.

A basa da questas observaziuns dovri ina politica da famiglia sistematica e coerenta. Latiers duai la dumonda da la famiglia betg vegnir tractada a moda ideologica, mabain a moda pragmatica, cun dar dapli impurtanza politica a la solidaritad vers engiu per las furmas multifaras da convivenza tranter creschids ed uffants.

Las postulantas ed ils postulants pretendan ina politica da famiglia moderna en il Grischun che rinforza e promova egualmain tant la famiglia "classica" sco er furmas pli novas da famiglia.

Quai pretenda d'ina vart ina conuschientscha exacta dal "stadi actual" en noss chantun en quai che reguarda la situaziun da las famiglias, da l'autra vart ina strategia clera da la politica da famiglia.

Las postulantas ed ils postulants pretendan analogamain al model directiv per ils attempads ("Daventar vegl en il Grischun") in rapport da famiglia dal Grischun ch'infurmescha surtut davart las sequentas dumondas:

1. Basa statistica davart la situaziun da las famiglias en il Grischun (dumber da persunas ch'educheschan sulettas en il Grischun, mammas cun acquist da gudogn, rata dals divorzis, tips da tegnairchasa, classas da salarisaziun e.u.v.).

2. Catalog da mesiras cun glista da prioritads per rinforzar e promover las famiglias ("famiglia classica", persunas ch'educheschan sulettas, famiglia cun geniturs che lavuran a temp parzial u a temp cumplain).

Cuira, ils 28 da matg 2002

Name: Zindel, Zanolari, Meyer, Ambühl, Arquint, Augustin, Bachmann, Barandun, Battaglia, Berther (Sedrun), Birrer, Brüesch, Bucher, Bühler, Capaul, Cathomas, Cavigelli, Christ, Christoffel, Giuliani, Hanimann, Hardegger, Hess, Jäger, Joos, Kollegger, Lardi, Locher, Loepfe, Looser, Luzio, Mani, Noi, Pfenninger, Pfiffner, Righetti, Robustelli, Roffler, Sax, Scharplatz, Schmutz, Schütz, Suter, Telli, Trachsel, Trepp, Tuor (Trun), Zarro, Zinsli

Session: 28.05.2002
Vorstoss: rg Postulat


Resposta da la regenza

La politica da famiglia è, sco preschentà correctamain en il postulat, in pensum da tagl a travers. Ella cuntegna ils pli differents secturs da politica sco politica da finanzas, dal martgà da lavur, sociala, da scolaziun e sanitara. La famiglia è uschia pertutgada bunamain tut las problematicas politicas.

En ils davos temps èn dumondas da politica da famiglia vegnidas pli e pli en il center dals interess politics. Motivs per quai èn tranter auter la paupradad da las famiglias che s'augmenta pli e pli sco er la creschenta participaziun creschenta da las dunnas al martgà da lavur. En quest connex vegnan pretais novs models per la tgira d'uffants. Plinavant èsi da registrar dapi insaquants onns ena diminuziun considerabla da las naschientschas, quai che vegn a purtar novs problems tant per la societad, per la segirtad sociala sco er per il martgà da lavur. Uschia stat la famiglia d'ozendi pli savens en il champ da tensiuns tranter sia dimensiun privata e sia significaziun sociala.

La politica da famiglia sa basa en Svizra tradiziunalmain sin il princip da l'atgna responsabladad. Las mesiras da politica da famiglia èn correspundentamain be vegnidas sviluppadas subsidiarmain. Da princip ins duai restar fidaivel a questa maxima er en l'avegnir. En vista da la muntada sociala da la famiglia e da las cundiziuns da basa, las qualas èn sa midadas, considerescha la regenza in sustegn rinforzà ed ina promoziun da la famiglia entras il maun public sin tut ils plauns dal stadi tuttina sco cumandà. Però sper las cundiziuns da basa per la famiglia ha sa midà er il maletg sez da la famiglia. Cuntrari a pli baud datti ozendi bleras famiglias cun be in genitur. Talas famiglias èn savens adina pli pauc ablas d'ademplir tut las incumbensas che la famiglia adempliva pli baud e duess ademplir anc oz. Quellas famiglias duessan pudair vegnir sustegnidas intenziunadamain.

En vista da la situaziun da partenza è la regenza pronta da prender encunter il postulat e da preschentar al cussegl grond in rapport da famiglia per il chantun Grischun. Quest rapport duai cuntegnair ina analisa da la situaziun da famiglia en Grischun, las miras da la politica da famiglia dal chantun per il futur sco er las mesiras previsas per la promoziun da la famiglia. Cunquai ch'en quest rapport duain vegnir resguardads opportunadamain ils resultats da la dumbraziun dal pievel da l'onn 2000 e las enconuschientschas dal rapport da famiglia federal, il qual vegn empermess per la fin da l'onn 2003, po quest rapport vegnir preschentà al cussegl grond il pli baud l'onn 2004.

Datum: 20 d'avust 2002