Navigation

Inhaltsbereich

Interpellaziun cncernent las consequenzas da la sanadad pervi da la translocaziun dal traffic sin la ruta dal San Bernardin

Sessiun: 29.05.2002

La populaziun per lung da las rutas da transit è disada ils davos onns en differents reguards che lur qualitad da viver è disturbada pervi dal traffic da camiuns pesants. Cun la bloccada dal Gottard e cun il transferiment dal traffic sin la ruta dal San Bernardin è s'augmentada supplementarmain la canera e la contaminaziun da l'aria, da maniera che la sanadad da la populaziun è periclitada.
Ils chantuns Grischun, Tessin ed Uri sco er l'UFAGC han publitgà il matg 2002 in studi che s'occupa da la dumonda da las consequenzas dal transferiment dal traffic sin l'impestaziun da l'aria e las mulestas da la canera en ils trais chantuns menziunads. Ils fatgs èn sin maisa. Ma be cun il rapport n'èsi betg fatg . Tenor in'ulteriur studi, en il qual la Svizra ha includì er la Frantscha e l'Italia, ha mussà che 3'300 persunas moran annualmain en Svizra per consequenzas da la contaminaziun da l'aria. 4 000 persunas ston vegnir manadas a l'ospital. Cun auters pleds, ils problems da la sanadad da la populaziun vegnan a lunga vista a s'augmentar en ils territoris numnads tras la canera dal traffic e la contaminaziun da l'aria. I na dastga betg esser che la populaziun stoppia pajar per il spir pensar da profit per l'industria e l'economia e mettia en privel sia sanadad.

En quest connex sa tschentan las suandantas dumondas:

1. Tge mesiras pon ins introducir immediatamain per mantegnair la sanadad da la populaziun?

2. Tge mesiras da construcziun pon vegnir realisadas a curta vista?

3. Tge mesiras intenda la regenza da prender per l'avegnir?

Cuira, ils 29 da matg 2002

Name: Schütz, Zarro, Stoffel, Arquint, Berther (Mustér), Camazzi, Catrina, Cavegn, Frigg, Hess, Jäger, Joos, Koch, Loepfe, Looser, Meyer, Noi, Pfenninger, Pfiffner, Righetti, Robustelli, Schmutz, Trepp, Zanolari, Zarro, Zindel

Session: 29.05.2002
Vorstoss: rg Interpellation

Resposta da la regenza

Resposta da la regenza

La ruta dal San Bernardino (A 13) ha transpurtà l'onn 2000 areguard il traffic da camiuns pesants en media ca. 680 camiuns per di, la ruta dal Gottard (A2) en il medem temp ca. 3840. Cumpareglià cun l'exteriur ha mussà il Brenner 20% dapli traffic da camiuns pesants che tut il transit tras la Svizra. Durant ch'il tunnel dal Gottard è sta serrà per dus mais han ca. 60% dals camiuns che passevan normalmain la A2 prendì la via dal San Bernardino. Quatras è s'augmentà il traffic da mintgadi a 2920 camiuns al di. Suenter la reavertura dal tunnel dal Gottard è sa stabilisà il traffic a ca. 1200 camiuns al di. Il sistem da dosar ha en mira ina limitaziun da 1000 camiuns al di.

L'impestaziun da l'aria cun dioxid da nitrogen (NO2) era avant ch'il Gottard è vegnì serrà tar la A13 (staziun da mesiraziun Roveredo), cumpareglià cun las staziuns da mesiraziun tar la A2 ca. 30% pli bassa e la contaminaziun cun PM10 era ca. tuttina. Il limit d'immissiuns per NO2 per lung da la A13 è vegnì respectà, quel da PM10 è vegnì surpassà. Tenor in rapport communabel dals uffizis per l'ambient dal Tessin, Uri e Grischun èn augmentadadas las immissiuns da NO2 per lung da la A13 durant ch'il tunnel dal Gottard è stà serrà per 38% e quellas da PM10 per 32%. Ils limits d'immissiuns da NO2 en media per di ed onn èn tuttina vegnds respectads. Suenter la reavertura dal tunnel dal Gottard èn las immissiuns da PM10 e NO2 bain sa reducidas ma cun quai ch'il traffic da camiuns n'è betg ì enavos uschè ferm sco avant ch'il tunnel dal Gottard è vegnì serrà restan las immissiuns da questas duas substanzas nuschaivlas in pau pli autas che avant. Cumpareglià cun las regiuns per lung da la A2 èn ellas dentant anc adina cleramain pli bassas.

Las consequenzas per la sanadad chaschunadas tras las substanzas nuschaivlas en l'aria e tras la canera èn tenor las enconuschientschas scientificas d'ozendi malsognas da la via respiratoria e dal sistem da la circulaziun dal cor sco er cancer dal lom. Midadas da la frequenza da questas consequenzas per la sanadad n'han betg pudì vegnir fatgas sistematicamain en las praticas da medis u en ils ospitals durant ch'il tunnel dal Gottard era serrà perquai ch'il cas ha durà curt temp ed il dumber da la populaziun per lung da la A13 è memia pitschen per far constataziuns statisticas. Las consequenzas da la contaminaziun da l'aria per la sanadad èn dentant bain enconuschentas a maun da studias cun grondas gruppas da populaziun pli grondas (studia SCARPOL- e SAPALDIA, Svizra). Sch'ins quintass ils resultads cun las relaziuns per lung da la A13 s'augmentass cun ina contaminaziun da l'aria sco durant il temp ch'il Gottard era serrà il ristg relativ da mortalitad da cancer dal lom plaunet a 5%. La frequenza da tuoss irrtanta tar la populaziun s'augmentass da ca.15% sco fin ussa a ca. 20%. Cun las relaziuns actualas sco stadi da lunga durada fiss l'augment correspundent per tschintg giadas pli pitschen. Areguard ils effects da la sanadad pervi dal grond augment da traffic per curt temp durant ch'il tunnel dal Gottard è stà serrà na datti naginas studias. En general na dastgan ins betg emblidar che la qualitad da l'aria en ils territoris per lung da la A13 è anc relativmain buna cumpareglià cun blers auters lieus d'abitar en Svizra. La cumpetenza per mesiras che influenzeschan l'intensitad dal traffic sin las vias naziunalas ha la confederaziun. Il sistem da dosar existent per il traffic da camiuns pesants al San Bernardino preschenta en quest reguard ina mesira efficazia.

Resposta a las dumondas

- Il mantegniment dal sistem da dosar è la mesira la pli efficazia per reducir las substanzas nuschaivlas e per mantegnair la sanadad da la populaziun.

- Sco declerà tar la resposta da l'interpellaziun Hess concernent la protecziun cunter la canera per lung da la A13 (CR dals 26 da favrer 2002) examineschan l'uffizi per l'ambient e l'uffizi da construcziun bassa sch'ins pudess construir cun il consentiment da la confederaziun paraids da protecziun sco prevenziun cunter la canera.

- Tar la politica da traffic da la regenza concernent l'axa dal San Bernardino vegnan ad esser impurtantas tant las mesiras per meglierar la segirtad da traffic sco la qualitad da l'aria.


Datum: 13 d'avust 2002