Navigation

Inhaltsbereich

Sessiun: 29.05.2002
Malgrà ch'ins ha cumenzà a controllar ils parcadis ston vegnir mess a disposiziun anc blers e chars parcadis per l'administraziun chantunala. Savens stattan sin quests parcadis autos che na vegnan betg duvrads dis a la lunga u ch'ils parcadis n'èn, causa absenza da quels che han il dretg da parcar, dis a la lunga betg occupads. Quai è fitg ineffizient e custa al chantun blers raps. Nus essan tuts dumandads da tschertgar novas schliaziuns innovativas.

Car-Sharing è ina tala schliaziun. Car-Sharing spargna custs ed ha anc senn ecologic. Il chantun Lucerna ha gia dapi il 1999 fatg per bunamain tut ils uffizis(da la tgira da monuments fin a l'universitad) contracts cun “l'Auto-Teilet-Genossenschaft”. L'uffizi per la protecziun da l'ambient dal chantun Lucerna posseda en il fratemp be pli anc dus autos da servetsch per 60 collavuraturs. Tenor ina nova retschertga pon ins spargnar custs enorms cun cumbinar il diever da Car-Sharing cun ils meds publics.

Sch'ins fa 5'000 km l'onn muntan ils custs totals da la mobilitad cun duvrar suletamain l'auto a ca. fr. 6'000.--, cun duvrar mintgamai 50 % Car-Sharing e traffic public custi ca. fr. 2'400.-- e cun duvrar 25 % Car-Sharing e 75 % ils meds publics perfin be fr. 1'700.--. Sch'ins fa 10'000 km l'onn muntan ils custs correspundents a ca. fr. 7'000.-- resp. ca. fr. 4'800.-- resp. ca. fr. 3'300.-- e sch'ins fa 15'000 km l'onn ca. fr. 7'900.-- resp. ca.fr. 7'100.-- resp. ca. fr. 4'900.--.

Ils sutsegnads dumondan la regenza d'elavurar in concept “Car- Sharing” cun in sistem interessant e favuraivel; en quel duai vegnir integrada er l'indemnisaziun dals kilometers sch'ins dovra l'auto privat. Quest concept po vegnir elavurà sa basond sin il sistem dal chantun da Lucerna. En il rom da la cussegliaziun dal budget 2004 duai il cussegl grond pudair decider concretamain davart la varianta d'ozendi ed il Car-Sharing.

Cuira, ils 29 da matg 2000

Name: Trepp, Pfenninger, Christoffel, Ambühl, Arquint, Bucher, Feltscher, Frigg, Hess, Jäger, Kessler, Locher, Looser, Meyer, Noi, Pfiffner, Scharplatz, Schmutz, Schütz, Wettstein, Zindel

Session: 29.05.2002
Vorstoss: rg Postulat


Resposta da la regenza


En connex cun quest postulat èsi vegni retschertgà tar 14 uffizis che dovran in (agen) auto per lur lavur. Spezialmain èn vegnids examinads la polizia chantunala, l'uffizi da construcziun bassa, ma er l'uffizi da chatscha e pestga ed auters. Tut en tut disponan quests uffizis da passa 234 vehichels. La gronda part da quests vehichels è equipada a moda speziala (equipament da servetsch, tracziun a quatter rodas, midada dals girs per la champagna, equipament per il transport da praschuniers e.u.v.) e n'èn perquai betg adattads per emprestar. Da tschella vart stuessan els er esser pronts per l'acziun da tuttas uras. In per paucs vehichels „normals“ vegnan emprestads gia oz ad auter uffizis, pèr part regularmain, per part sporadicamain.

Ils postulants dumondan la regenza d'elavurar in concept per in carsharing. Las indicaziuns davart ils custs totals per la mobilitad en il postulat laschan vegnir a la conclusiun che il postulat saja orientà tenor il model da l'interpresa „Mobility Carsharing Schweiz“ a Lucerna ( ). Ins po sa dumandar sche questas indica-ziuns èn duvrablas senz'auter er per il chantun Grischun e sche la realisaziun dal carsharing tenor quest model avess er avantatgs ecologics e finanzials e sche quella metoda fiss pli effizienta che quella d'ozendi. Be sche quai fiss il cas, pudess ins tenor las perspectivas dad oz giustifitgar in tal concept.
Oz è la regenza responsabla per acquistar e remplazzar autos da servetsch en il rom dal preventiv d'investiziun. Autos novs vegnan accordads be sch'i vegn fatg cun els en il cas concret almain 12'000 km l'onn. Sche quai n'è betg il cas sto vegnir dovrà l'auto privat. L'art. 52 da l'ordinaziun dal persunal prevesa perquai che collvuraturs possian vegnir obligads da duvrar lur auto privat per viadis da servetsch. Ils viadis da servetsch vegnan indemnisads cun fr. 0.60 per kilometer. Considerond las tariffas pon ins constatar ch'en collavuraziun cun Mobility Carsharing custass in auto cun ina prestaziun sin via d'almain 15'000 km l'onn er fr. 0.60 per kilometer. Per il chantun fissan pia ils custs ils medems. Er ecologicamain na purtassi nagut da remplazzar il servetsch cun ils autos privats cun Mobility Carsharing. En il Grischun pauc colonisà fissan ils lieus dals autos da mobility restrenschids en emprima lingia a Cuira resp. sin staziuns pli grondas en il chantun. Collavuraturs da l'uffizi da construcziun bassa en il Mesauc, guardiachatschas en la Surselva u collavuraturs da l'instituziun Realta be per numnar in pèr exempels fissan gia da bel principi exclaus d'in tal project. Er per ils uffizis d'administraziun situads pli damanaivel da Cuira reduciss il model da carsharing fermamain l'effizienza da la lavur. Per cumplettar ston ins anc menziunar che er sch'il traffic public en il Grischun funcziuna fitg bain, saja quai en l'interess dal chantun, sche viadis da servetsch pon vegnir fatgs cun ils autos privats, perquai che cun ils meds publics stuess ins impuder in temp sproporziunà.
L'uffizi da persunal e d'organisaziun ha examinà l'onn 1992il sistem da carsharing en collavuraziun cun il servetsch per il traffic public. Da quel temp è vegnì refusà in tal intent per motivs d'effizienza.
Questas explicaziuns mussan ch'in model da carsharing na fiss per il mument ni ecologicamain ni finanzialmain betg pli adattà che il sistem sco fin qua, ed er en vista a l'effizienza na po il model betg vegnir approvà. Il model che vegn applitgà oz, nua che viadis da servetsch vegnan fatgs - sche pussaivel e raschunaivel - cun ils meds publics, uschigliò dentant cun autos da servetsch u autos privats, è sa cumprovà en il chantun Grischun cun sia gronda surfatscha e per part pauca populaziun. Ins duai al mantegnair per entant. La regenza observa dentant detagliadamain il svilup dal models da carsharing e l'adiever da quel en l'administraziun publica dad auters chantuns.
En quest senn vegn il postulat refusà.

Datum: 9 da fanadur 2002