Navigation

Inhaltsbereich

Moziun concernent separar la fixaziun dal pe da taglia da persunas natiralas e giuridicas

Sessiun: 29.05.2002
L'economia grischuna è stada exponida durant ils davos onns ad ina pressiun pli gronda da la concurrenza. Il studi publitgà dal forum economic mussa ch'ins ha reducì durant ils davos onns plazzas da lavur en il Grischun a moda massiva ha chaschunà vastas discussiuns ed ha er ventilà la dumonda, sch'il Grischun sco lieu da staziunament saja attractiv avunda. La grevezza da taglia è in factur impurtant. Las pli differentas analisas mussan ch'il Grischun posseda ina grevezza da taglia che sa chatta aut sur la media en il sectur da l'imposiziun da taglia da persunas giuridicas, numnadamain la segund auta en la cumparegliaziun interchantunala. Quest fatg è in factur negativ per il lieu da staziunament ed impedescha la cumpetitivitad da l'economia indigena.

A basa da la situaziun finanziala ch'è da preschent betg ideala na pon ins tenor la regenza betg pli excluder in auzament da la taglia. Quai pregiuditgass anc dapli la cumpetitivitad da las persunas giuridicas situadas en il Grischun, malgrà ch'ins aspira plitost ina reducziun da la grevezza da taglia da las persunas giuridicas. Questa finamira na po betg vegnir cuntanschida sch'il pe da taglia vegn er en il futur fixà communablamain per persunas natiralas e persunas giuridicas. L'art. 3 da la lescha da taglia prevesa numnadamain be ch'il cussegl grond ha da fixar annualmain il pe da taglia en pertschient da la taglia chantunala simpla, senza separar il pe da taglia per persunas natiralas e persunas giuridicas.

Ils moziunaris pretendan perquai che la legislaziun da taglia vegnia adattada correspundentamain e ch'il cussegl grond possia decider en il futur separadamain davart la fixaziun dal pe da taglia per persunas natiralas e persunas giuridicas. A medem temp pretendan els che la grevezza da taglia sin gudogn e chapital (inclusiv la taxa speziala sin la facultad) vegnia reducida, uschia che la grevezza cumplessiva da taglia da las persunas giuridicas s'approximescha a lunga vista a la media dals chantuns da la Svizra tudestga, quai che po be vegnir cuntanschì cun ina revisiun da la lescha.

Cuira, ils 29 da matg 2002

Name: Hess, Walther, Tscholl, Ambühl, Bachmann, Bär, Barandun, Battaglia, Bischoff, Casanova (Cuira), Catrina, Caviezel, Cavigelli, Christ, Christoffel, Claus, Comazzi, Crapp, Demarmels, Donatsch, Federspiel, Feltscher, Geisseler, Giuliani, Hanimann, Hardegger, Hartmann, Jenny, Juon, Kehl, Kessler, Lardi, Loepfe, Luzio, Maissen, marti, Montalta, Nick, Portner, Robustelli, Roffler, Stiffler, Suênderhauf, Suter, Thomann, Tramèr, Wettstein, Zarro, Zegg, Zinsli

Session: 29.05.2002
Vorstoss: rg Motion


Resposta da la regenza

La moziun cuntegna dus pretensiuns differentas. D'ina vart duai il pe da taglia per persunas giuridicas vegnir fixà independentamain da quel da las persunas natiralas. Da l'autra vart duai la taglia sin il gudogn e la taglia sin il chapital vegnir reducida uschè lunsch che la chargia da la taglia totala da las persunas giuridicas s'avischina a lunga vista a la media dals chantuns da la Svizra tudestga.

La regenza è be per part da l'idea dals moziunaris, che pretendan che la grevezza fiscala da las persunas giuridicas saja memia auta en cumparaziun interchantunala. Diversas calculaziuns davart la grevezza fiscala da las persunas giuridicas en il Grischun han numnadamain mussà che la grevezza fiscala da la maioritad da las persunas giuridicas fa en comperaziun traversala cun l'entira Svizra buna enfin fitg buna figura. Ina part da las fatschentas per encunter vegn chargiada fiscalmain ferm enfin fitg ferm. Questas fatschentas genereschan er la gronda part da las entradas fiscalas. Schizunt sche be ina part da las persunas giuridicas vegn chargiada fiscalmain fitg ferm, na vegni betg differenzià en l'opiniun publica. Da quai patescha il lieu da fatschenta Grischun. Plazzas da lavur existentas èn per part periclitadas e novas plazzas da lavur vegnan be stgafidas cun retegnientscha. Ina reducziun da la grevezza fiscala da la gruppa correspundenta da persunas giuridicas è per questa raschun inditgada. Distgargias fiscalas ston però adina er vegnidas planisadas e realisadas cun in egliada sin las pussaivaldads finanzialas dal chantun e da las vischnancas. La situaziun finanziala dal chantun Grischun è actualmain ed en il proxim futur plitost greva. Il cussegl grond ha d'examinar en la sessiun da november, sch'i sto vegnir decidì schizunt in augment da taglia per pudair resguardar la directiva dal budget. Er la situaziun finanziala da las vischnancas è en numerus cas fitg precara.

Distgargias fiscalas vegnan en mintga cas be en dumonda per quella gruppa da las persunas giuridicas ch'èn vairamain chargiadas fitg ferm. La dumonda sch'ins è bun da supportar quai predominescha. La mira d'ina distgargia sto esser, d'evitar l'emigraziun d'interpresas u il transferiment da plazzas da lavur. Ina reducziun da la grevezza fiscala sin la media dals chantuns da la Svizra tudestga tar la gruppa da persunas giuridicas menziunada giascha tenor l'opiniun da la regenza actualmain ed en il futur ordaifer las pussaivladads finanzialas. La perdita da taglias che resultescha londeror na savess betg vegnir supportada senza ina reducziun da prestaziun evidenta resp. chaschunass in indebitament massiv dal maun public.

La separaziun dal pe da taglia da las persunas natiralas e giuridicas è vegnì discussiunà a chaschun da la revisiun parziala da la lescha da taglia l'onn 1996. Sin fundament da calculaziuns concretas davart las consequenzas da questas mesiras è la cumissiun predeliberanta dal cussegl grond da quel temp vegnida a la conclusiun che la separaziun dal pe da taglia n'haja betg l'effect sperà. Per questa raschun è il project vegnì dà si.

La regenza è pronta da prender encunter la moziun Hess en furma d'in postulat. Suenter ina decisiun correspundenta po vegnir suttamess al cussegl grond gia en l'onn vegnent in messadi en il qual ina reducziun commensurada da la grevezza fiscala per las persunas giuridicas vegn examinada ed ils avantatgs e dischavantatgs da la separaziun dal pe da taglia vegnan preschentads.

Datum: 26 d'avust 2002