Interpellaziun concernent l'avegnir dal center da posta da brevs a Cuira
Sessiun: 31.05.2002
Il mument ha la posta svizra 20 centers da brevs, repartids sin l'entira Svizra. Cun ses project REMA (Reengieneering Mailprocessing) introducescha la posta ina giada dapli ina cura radicala che pertutga questa giada ils centers da brevs e che prevesa ina reducziuns sin paucas u schizunt sin sulettamain 1 center da brevs per l'entira Svizra.
A Cuira en la Gürtelstrasse 11, amez il center da la citad exista il center da brevs per il chantun Grischun nua che tuttina ca. 150 persunas chattan lavur en l'assortida e la deviaziun. Quest center da brevs è fitg periclità tras il project REMA ed igl exista la ristga che bleras da questas plazzas da lavur mondian a perder resp. vegnan dischloccadas en ils centers da la Svizra bassa u en autras regiuns da la Svizra. Tar tut la chapientscha per il midament da structura ch'è necessari tar la posta exista ina giada dapli il privel che quai giaja sin donn e cust dal Grischun e da las regiuns periferas.
Sin fundament dal fastidi pertutgant la reducziun da las plazzas ed er pertutgant la sperdita da qualitad tar il „service public“ en las regiuns periferas sa tschentan las suandantas dumondas:
1. In center da posta da brevs è d'impurtanza en il chantun Grischun tant davart ils plazs da lavur sco er davart la segirezza d'in servetsch da posta da buna qualitad er en ils territoris perifers. N'è la regenza betg er da l'opiniun ch'i sajan necessari in engaschament spezial e mesiras spezialas per il mantegniment dal center da brevs?
2. Co vul s'engaschar la regenza per il mantegniment d'in center da brevs en il Grischun e tge pussaivladads utilisescha ella per cuntanscher quai?
3. Co valitescha la regenza las consequenzas d'ina eventuala partenza dal center da brevs or dal chantun en reguard da la qualitad dal servetsch da posta, cunzunt en las regiuns periferas da noss chantun?
4. Cun tge consequenzas persunalas stuessan ins quintar en connex cun la perdita dal center da brevs en auters secturs posteriurs, p.ex. il servetsch da transport?
Cuira, ils 31 da matg 2002
Name: Pfenninger, Schütz, Arquint, Bucher, Frigg, Jäger, Locher, Looser, Meyer, Pfenninger, Pfiffner, Schmutz, Trepp, Zindel
Session: 31.05.2002
Vorstoss: rg Interpellation
Resposta da la regenza
La posta svizra sa dat fadia d'esser er en il futur l'offerenta predominanta en in martgà deregulà. Ella vul render giustia a las pretensiuns pli e pli grondas da sia clientella entras servetschs da buna qualitad. Il parc da maschinas dal champ da brevs avant maun sto vegnir remplazzà en ils proxims 5 enfin 7 onns sin fundament da la durada da la vita tecnica, però er pervia dal svilup tecnic ch'è vegnì fatg en ils ultims onns. Per restar capabel da concurrer èsi necessari da nizzegiar ils potenzials da la sbassada dals custs ch'èn pussaivels entras novas tecnologias. Perquai ha la posta lantschà il project REMA (reengineering mailprocessing).
En il rom da quest project sa tracti da l'automatisaziun da la posta da brevs e da la reducziun dals centers da posta da brevs. I vegnan examinadas differentas variantas cun 1 enfin 12 centers da brevs futurs. Il dumber dals centers da brevs e lur lieu approximativ n'èn betg la finamira, mabain els vegnan ad esser il resutlat da las lavurs. En l'october 2002 vegn preschentà il rapport a la direcziun dal concern ed al cussegl administrativ da la posta. En quel mument vegn il dumber dals lieus e las regiuns correspundentas ad esser enconuschents. Alura vegnan er manads ils discurs cun las regiuns pertutgadas. En la primavaira 2003 pon vegnir skizzadas approximativamain las consequenzas per il persunal. La construcziun ed il manaschi d'in center pilot è previs per l'onn 2005. Probablamain vegn il project ad esser finì l'onn 2009.
Las dumondas pon vegnir respundidas suandantamain:
1. Il center da posta da brevs a Cuira è spezialmain da grond'impurtanza or da la vista dal mantegniment da las plazzas da lavur per la regiun da Cuira. Perquai è la regenza da l'opiniun che per il mantegniment dal center da posta da brevs saja inditgà in engaschament spezial.
2. Il departament da l'intern e da l'economia publica è en contact cun il cussegl da la citad da Cuira e cun il manader dal champ da fatschenta posta da brevs, Josef Bösch. Quel è da l'opiniun ch'intervenziuns dals chantuns e da las citads vegnan bain prendids en conuschientscha da la posta, che quels na vegnan però betg ad avair in'influenza sin las lavurs da project currentas. Perquai crai la regenza ch'i na saja per il mument betg adattà da sa volver uffizialmain a la posta, mabain ch'i saja meglier per contanscher la mira da mantegnair il contact informal existent cun il champ da fatschenta posta da brevs.
3. La segirada d'in service da la posta qualitativamain bun en l'entier chantun ha er per la regenza gronda prioritad. Quest service da la posta na dependa però betg sulettamain dal dumber dals centers da posta da brevs. La mira da purtar qualitativmain bunas prestaziuns da servetsch vala per la posta svizra er sen vinavant. Quant lunsch che la qualitad dal service da posta vegniss restrenschida entras l'aboliziun dal center da posta da brevs Cuira na sa la regenza betg examinar en detagl.
Pertutgant las consequenzas sin il champ posteriur n'èn naginas factas avant maun a la regenza. Sco gia explitgà vegnan spetgadas valurs fundamentalas concretas per il project pir l'atun da quest onn.
Datum: 26 d'avust 2002