Dumonda en scrit concernent il scumond da charrar sin la via locala Klus
Sessiun: 26.08.2002
La via chantunala A 28 en il Partenz maina dapi onns tras il tunnel da la Klus. Quatras na vegn la via veglia chantunala da la vart dretga da la Landquart betg pli duvrada per il traffic da transit.
Quest fatg ha per consequenza che la via veglia chantunala vegn duvrada adina pli savens da famiglias e sportists. La via uffiziala per velos da Landquart a Tavau è la via veglia chantunala. Ma er la SA „Freizeit Graubünden“ propaghescha la via veglia chantunala sco via dad inline per pitschen e grond.
Deplorablamain n'exista dentant sin quest traject nagin scumond per autos e motos, sco quai ch'i exista sin auters trajects (p.ex. Grüsch-Schiers).
Per motivs da la segirezza dal traffic dals l'utilisaders da la via pli flaivels fissi perquai giavischaivel, sch'i vegniss introducì er sin questa via locala in scumond da charrar per autos e motos. Uschia pudess ins evitar situaziuns privlusas ed accidents.
Natiralmain ch'il servetsch d'apport per las interpresas industrialas, dentant er il diever da la via locala en cas d'accidents u da lavurs da revisiun en il tunnel restan garantids er vinavant.
Jau supplitgesch perquai la regenza da respunder las dumondas sequentas:
1. Pertge n'ha questa via locala anc betg in scumond da charrar per autos e motos?
2. È la regenza er da l'idea che questa via locala pudess vegnir serrada per il traffic a motor, e quai en l'interess da la segirezza dal traffic, ma er per motivs turistics?
Cuira, ils 26 d'avust 2002
Name: Looser
Session: 26.08.2002
Vorstoss: rg SchriftlicheAnfrage
Resposta da la regenza
1. Sin il traget problematic n'è in scumond da charrar per vehichels a motor betg pussaivel senza admetter permissiuns excepziunalas, perquai che l'access per il servetsch d'apport sco er per il traffic agricul e forestal sto vegnir garantì en mintga cas. Quai avess per consequenza che la regulaziun dal traffic prendida en mira na purtass betg la segirezza giavischada per las velocipedistas e per ils velocipedists. In scumond be parzial pudess perfin augmentar il privel. In scumond da traffic per vehichels a motor po surmanar a velocipedistas e velocipedists, spezialmain a gruppas ed a famiglias, da betg resguardar il cumond dad ir a dretga sin la via stretga malgrà ch'i po eventualmain er dar traffic en direcziun cuntraria. Mintga excepziun mettess puspè en dumonda la protecziun da las velocipedistas e dals velocipedists.
Ultra da quai sto pudair vegnir svià il traffic da transit da la via dal Partens (via naziunala) en cas nunprevisibels, accidents, pannas etc. a curta vista sin la via locala. Ils meds persunals per ina regulaziun transitoria dal traffic, er quai a favur da la segirezza da las velocipedistas e dals velocipedists, n'èn per gronda part betg avan maun. Er en talas situaziuns ston ins temair che las velocipedistas ed ils velocipedists pudessan sa crair en faussa segirezza.
Per quests motivs ha il departament da giustia, polizia e sanitad stuì dar respostas negativas a sumegliantas dumondas gia en ils onns 1991 e 1994, e suenter che la via chantunala veglia da la Klus è stada suttamessa ad ina expertisa pertutgant la tecnica stradala.
2. En vista a las ponderaziuns explitgadas areguard la dumonda precedenta ha l'aspect „segirezza per tut las participantas e tut ils participants dal traffic“ emprima prioritad. A questa dumonda stuain nus per consquenza dir na ord vista da la polizia da traffic. Motivs turistics na pon betg cumpensar ils ristg d'ina tala bloccada, gist en l'interess da la segiradad dal traffic.
Datum: 1.d'october 2002