Navigation

Inhaltsbereich

Postulat concernent l'engaschament da medias spezialistas e da medis spezialists a l'ospital

Sessiun: 27.08.2002
La reducziun dals temps da lavur per medi(a)s assistent(a)s e medi(a)s superiur(a)s daventada necessaria per lescha - auza il basegn da questa categoria da medis e maina latiers che medias e medis han da vegnir scolads pli savens ed er sco gia enfin ussa han da vegnir clamads da l'exteriur. Tuts dus han consequenzas negativas sin la densitad dals medis ed uschia sin l'auzament dals custs en il sectur da la sanadad. Per impedir quest svilup negativ sto la structura dals medis en ils ospitals vegnida adattada a las pretaisas d'ozendi.

Entras medis spezialists da l'ospital che pon en emprima lingia sa concentrar sin il servetsch per las pazientas ed ils pazients, po vegnir reducì il basegn supplementar da las plazzas d'assistents cun scolaziun supplementara ch'èn limitadas temporalmain. En cumparaziun cun il sistem d'ozendi mussan quints da model d'ospitals turitgais impressiunantamain che talas plazzas pon vegnir finanziadas senza custs supplementars malgrà in augment d'effizienza e cun correspundenta paja. En insaquants chantuns èn gia vegnidas fatgas bunas experientschas cun questa nova categoria da medi(a)s spezialist(a)s da l'ospital.

Entras stgaffir medi(a)s spezialist(a)s a l'ospital po vegnir reducì il squitsch per ils medis assistents e las medi(a)s superiur(a)s d'ir suenter la scolaziun a l'ospital usitada che cuzza 8 10 onns en la lavur pratica. Quai reducescha probablamain la denstitad dals medis en la pratica en ina moda e maniera pli effizienta ch'il stop da medis relaschà avant pauc temp ed ha medemamain l'effect da sbassar ils custs en il sectur da la sanadad.

Las structuras d'ozendi cundiziuneschan ultra da quai ina frequenta midada dals medis assistents quai che maina savens tar grondas inquietezzas sin las partiziuns. Entras medis spezalists a l'ospital emploiads fixs po vegnir stgaffì ina continuitad cun effect positiv sin la furmaziun interdisciplinara dal team e sin ina stretga collavuraziun tranter il persunal da tgira ed ils medis.

Ils sutsegnads dumondan la regenza da stgaffir en moda adattada la basa perquai ch'ins possia introducir questa furma da medi(a)s spezialist(a)s a l'ospital, en stretga consultaziun e collavuraziun cun ils responsabels per ils ospitals, er en il Grischun.

Cuira, ils 27 d'avust 2002

Name: Trepp, Bucher, Luzio, Ambühl, Augustin, Barandun, Berther (Sedrun), Birrer, Brasser, Bühler, Casanova (Chur), Cathomas, Catrina, Caviezel (Chur), Cavigelli, Darms, Frigg, Giuliani, Hanimann, Hardegger, Jäger, Janett, Joos, Kehl, Kessler, Krättli, Locher, Loepfe, Looser, Marti, Meyer, Nick, Noi, Pfenninger, Pfiffner, Plozza, Robustelli, Scharplatz, Schmutz, Schütz, Suenderhauf, Suter, Vincenz, Wettstein, Zanolari, Zindel

Session: 27.08.2002
Vorstoss: rg Postulat


Resposta da la regenza

1. Per medi(a)s spezialist(a)s che na vulan betg u na pon betg surpigliar en in ospital ina funcziun sco medi(a) directiv(a) n'exista, auter che sco medi(a) superiur(a), nagina pussaivladad da lavurar sco medi(a) en plazza fixa. Quai maina ad in creschent dumber da medi(a)s en la pratica libra. Visavi a quella circumstanza stat in augment dal burdi da lavur da las/ils medi(a)s en ils ospitals. Raschuns per quai èn tranter auter la dimora pli curta dals pazients, las metodas da tractament ch'èn adina pli cumplexas, la pressiun progressiva dals custs e l'augment da las expensas administrativas. A basa da la mancanza almain da medi(a)s assistent(a)s indigen(a)s e per part da medi(a)s superiur(a)s po il burdi da lavur creschent da las/dals medi(a)s en ils ospitals mo vegnir levgià reschtrenschidamain cun crear plazzas d'assistent(a)s e plazzas da medi(a)s superiur(a)s.

2. Entras l'engaschament da medi(a)s spezialist(a)s d'ospital han ins per l'ina en mira da stgaffir per medi(a)s spezialist(a)s plazzas stablas a l'ospital cun cundiziuns d'engaschament attractivas e per l'autra da far frunt a las stretgas da persunal en ils ospitals. Per l'ospital po ultra da quai sa resultar or da la fluctuaziun reducida en il sectur da las/dals medi(a)s ina meglra cuntinuitad da l'assistenza medicala.

Tenor ils models preschents è la/il medi(a) spezialist(a) cumpetent(a) en atgna respondabladad en spezial per l'assistenza medicala, per la prescripziun da medicaments e per las terapias da las/dals patient(a)s. Las/ils pazient(a)s e las/ils tgirunz(a)s da lur vart disponan uschia sur d'ina persuna da contact medicala cun experientscha. Las/ils medi(a)s spezialist(a)s n'han da princip naginas incumbensas directivas u da furmaziun supplementara e pon uschia sa deditgar surtut a l'assistenza da las/dals pazient(a)s. Il temp da lavur correspunda da princip a quel d'autras/auters emploiadas/-ads da l'ospital.

3. En il rom da la consultaziun davart il postulat preschent èn s'exprimidas tant la federaziun ospitals e chasas sco er l'uniun grischuna dals medis d'ospital da suttametter la dumonda d'introducziun da medi(a)s spezialist(a)s en ils ospitals publics dal chantun ad in'examinaziun intensiva. Sper ils avantatgs positivs che sa resultan previsiblamain or da l'introducziun da las/dals medi(a)s spezialist(a)s d'ospital fan ils dus consultents er attent als gronds problems en connex cun l'introducziun. Dubis vegnan alura fatgs concernent la finanziaziun senza custs supplementars per l'introducziun da la nova categoria da medis d'ospital, da la quala i vegn partì en las disposiziuns dal postulat.

4. La decisiun, sch'i duaja vegnir stgaffì plazzas per medi(a)s spezialist(a)s d'ospital e pertutgant l'integraziun ierarchica dals medi(a)s d'ospital sco er davart la concepziun detagliada da lur funcziun (carnet da duairs) è da princip en la cumpetenza dals singuls ospitals.

Co i sa resulta or da las consultaziuns da la federaziun ospitals e chasas dal Grischun e da l'uniun grischuna dals medis d'ospital n'èn ils opitals a basa dal stan d'infurmaziun actual betg abels da prender ina decisiun davart l'introducziun da medi(a)s spezialist(a)s. Avant la decisiun è correspundentamain d'elavurar in concept general per la funcziun da las/dals medi(a)s als ospitals publics dal chantun. L'elavuraziun da quest concept general succeda cunvegnentamain en il rom d'ina gruppa da lavur che sa cumpona da represchentant(a)s dal departament correspundent, da l'uniuin grischuna dals medis d'ospitals e da las/dals directur(a)s d'ospitals.

La regenza è pronta d'acceptar il postulat en il senn da las explicaziuns precededentas.

Datum: 22 d'october 2002