Dumonda en scrit concernent l'abrogaziun da la categoria C 1 dal permiss dad ir cun auto
Sessiun: 07.10.2002
Cun il conclus d'abrogar la categoria C 1 dal permiss dad ir cun auto sin il 1. d'avrigl 2003 chaschuna il cussegl federal gronds problems als corps da pumpiers.
I dat problems da recrutaziun, pertge tgi è en il futur pront (per motivs da temp) d'impunder sforzs per ina tala furmaziun?
En las vischnancas grischunas fan ins quint cun custs supplementars da ca. 2 milliuns francs. La scola d'ir cun auto e l'examen vegnan a custar a las vischnancas tranter fr. 5000.-- e fr. 7000.--.
Dapi che la pratica cun la categoria C 1 è sa cumprovada per ils corps da pumpiers e ch'i n'ha er betg dà accidents, ma dumond jau, tge ch'il cussegl federal ha studegià cura ch'el ha prendì questa decisiun.
Jau fatsch perquai las sequentas dumondas a la regenza:
1. Tge posiziun prenda uss la regenza grischuna envers questa decisiun?
2. Tge quinta ella da far?
3. Datti ina schanza da pudair annuallar questa decisiun?
Cuira, ils 7 d'october 2002
Name: H a r t m a n n
Session: 7.10.2002
Vorstoss: rg SchriftlicheAnfrage
Resposta da la regenza
1. Ordavant èsi da menziunar che la nova regulaziun concludida dal cussegl federal na vala betg per possessurs odierns dal permiss dad ir cun auto categoria C1. Era persunas che survegnan ina permissiun d'emprender ad ir cun auto per questa categoria avant il 1. d'avrigl 2003 vegnan a pudair far l'examen d'ir cun auto tenor il vegl dretg.
Il departament da giustia, polizia e sanitad ha tuttina rinvià expressivamain al fatg, en il rom da la procedura da consultaziun tar la revisiun da l'ordinaziun davart l'admissiun da persunas e vehichels al traffic sin via (OAT; CS 741.51), che l'abrogaziun da la categoria C1 dal permiss dad ir cun auto chaschunia considerablas chargias supplementaras finanzialas e problems da recrutaziun tar ils corps da pumpiers voluntaris. Correspundentamain ha el proponì da tschertgar ina schliaziun individuala almain per ils autos-cisterna dals pumpiers. Sco che la regenza ha uss deplorablamain stuì prender enconuschientscha, ha il cussegl federal dà dapli paisa als interess d'ina armonisaziun cun la UE che als problems respectivs dals pumpiers da milissa.
2. En il fratemp ha cusseglier federal Leuenberger incumbensà ina gruppa da lavur sut la direcziun da l'uffizi federal da vias (ASTRA) d'examinar ils problems che resultan da la nova regulaziun. Da questa gruppa da lavur ch'è sa radunada ils 10 d'october 2002 per l'emprima giada fan part tranter auter era represchentants dals pumpiers. Perquai na vesa la regenza nagina raschun da daventar activa en chaussa.
3. Da respunder a questa dumonda vuless dir da far speculaziuns, perquai che la decisiun d'annullaziun stat medemamain en la cumpetenza dal cussegl federal.
Datum: 29 d'october 2002