Navigaziun principala

Cuntegn da la pagina

Interpellaziun concernent ina vasta basa legala dal concept directiv per l'economia

Sessiun: 08.10.2002
Enconuschentamain ha ina gruppa da persunas - en spezial or da l'economia, per part or da la politica - elavurà durant ils onns 1997/1998 il „Concept directiv per l'economia dal Grischun“. Ins ha renunzià ad ina consultaziun generala. En la resposta al postulat Arquint ha la regenza constatà expressivamain ch'i na sa tracta betg d'in concept directiv da la regenza, mabain d'in da l'economia grischuna.

Ils interpellants constateschan ussa en il rom da la procedura da consultaziun tar la nova lescha davart il promover l'economia publica ch'il concept directiv per l'economia ha gronda paisa en quella. En spezial vegni menziunà sin pagina 44 dal rapport accumpagnant che „la preferenza unilaterala da territoris debels na stettia betg en accordanza cun las miras dal concept directiv per l'economia“. Medemamain vegni recumandà d'abolir la cumissiun consultativa per dumondas economicas d'enfin ussa, tranter auter cun l'indicaziun a la „Cumissiun accumpagnanta dal concept directiv per l'economia“ sco er dal forum economic.

Igl è dentant nunsustegnibel che la politica economica dal Grischun duai sa drizzar suenter in concept directiv ch'è vegnì elavurà mo da l'economia grischuna areguard debels territoris economics. Cumbain ch'ils interpellants sustegnan senz'auter in rinforzament dals centers economics en il chantun Grischun, na dastgan ins betg simplamain da bell'entschatta laschar crudar e dischavantagiar territoris d'economia debla. Quai na correspunda ni a l'idea d'ina urbanisaziun decentrala tenor la constituziun federala ni al program da la regenza 2001-2004.

Correspundentamain fan ils interpellants las suandantas dumondas a la regenza:

1. Tge paisa ha il concept directiv per l'economia en il rom da la politica per promover l'economia dal chantun?

2. Pertge considerescha la regenza il concept directiv per l'economia ch'è vegnì fatg ils onns 1997/1998 quasi tut sulet da l'economia grischuna sco basa per ils conclus da la politica da structura e per las mesiras da promoziun da l'economia. Na presupponiss l'elavuraziun d'ina basa da tal'impurtanza betg er la collavuraziun da las vischnancas, da las regiuns e da las partidas politicas?

3. N'è la regenza betg er da l'avis ch'en il rom d'in concept directiv per l'economia vegnan resguardads ils aspects spezials da tut las regiuns e las zonas periferas dal chantun? Co pensa la regenza da satisfar a questa dumonda?

4. Il concept directiv per l'economia vegn repassà il mument: Na considerescha la regenza betg sco inditgà e necessari da far ina vasta procedura da consultaziun davart il concept directiv per l'economia, quai en il senn d'avair ina vasta basa per quest instrument da direcziun impurtant?

5. È la regenza pronta da preschentar al cussegl grond per l'approvaziun la proposta definitiva dal concept directiv per l'economia ch'è vegnì repassà?

Cuira, ils 8 d'october 2002

Name: Cathomas, Brüesch, Lardi, Arquint, Battaglia, Berther (Mustér), Bezzola, Biancotti, Bucher, Capaul, Casanova (Vignogn), Cavegn, Caviezel (Cuira), Cavigelli, Christoffel, Crapp, Dalbert, Dermont, Fallet, Flütsch, Geisseler, Giacometti, Giuliani, Hanimann, Hardegger, Hartmann, Jäger, Keller, Lemm, Loepfe, Luzio, Maissen, Meyer, Montalta, Parolini, Parpan, Patt, Pedrini, Peretti, Pfenninger, Pfiffner, Portner, Quinter, Ratti, Stiffler, Tremp, Trepp, Tuor (Mustér), Tuor (Trun), Zegg

Session: 8.10.2002
Vorstoss: rg Interpellation

Resposta da la regenza

1. Il concept directiv per l'economia dal Grischun è vegnì elavurà l'onn 1997 dal departament da l'intern e da l'economia publica ensemen cun il forum economic e cun persunalitads da l'economia, da la furmaziun e da la politica. Singuls temas èn vegnids approfundads en collavuraziun cun differentas instituziuns e posts d'administraziun. Correspundentamain n'è il concept directiv per l'economia dal Grischun betg in concept directiv da la regenza mabain in da l'economia grischuna. La regenza sustegna però la mira, tenor la quala il chantun Grischun duai exister sco spazi economic e da viver ch'è attractiv e che po agir independentamain. La strategia sviluppada persuenter sa basa sin l'enconuschientscha ch'ina posiziun cun success dal plaz economic dal Grischun en la concurrenza globala pretenda da focussar las atgnas fermezzas.

En il rom da la resposta dal postulat Arquint ha la regenza tranter auter menziunà il december 1997 ch'il concept directiv per l'economia saja ina basa da la politica economica e ch'ella veglia integrar cun mesira centers da gravitad ed instradar la realisaziun da diversas mesiras dal concept directiv, las qualas paran a basa dal program da la regenza d'esser zunt impurtantas. La tenuta da la regenza exprimida da lezzas uras vala er anc oz.

2. Il concept directiv per l'economia dal Grischun mussa mo ina da las differentas basas per prender decisiuns per promover l'economia e per la revisiun da la lescha davart il promover l'economia publica. La realisaziun da las mesiras dal concept directiv succedan sulettamain cun la procedura ordianaria. Quai vul dir, sche vischnancas e regiuns èn pertutgadas d'ina mesira, vegnan ellas er integradas per realisar quellas.
Las finamiras e las mesiras dal concept directiv per l'economia da l'onn 1997 duain ussa vegnir repassadas. L'existenta gruppa accumpagnanta sco er in circul extendì da participants duain giuditgar e reelavurar quella. Ina vasta procedura da consultaziun n'è il mument betg prevesida.

3. La regenza sustegna l'idea ch'ils aspects spezials da las regiuns vegnan conresguardads e dat al departament da l'intern e da l'economia publica l'incumbensa d'integrar ils circuls correspundents en il rom da la repassada dal concept directiv.

4./5. Ina vasta procedura da consultaziun n'è mumentan betg previsa. Il concept directiv elavurà duai vegnir suttamess a la regenza. I duai alura vegnir decis, sche la regenza prenda il concept directiv mo per conuschientscha - sco 1997 - u sch'ella l'approva. Correspundentamain vegn la regenza er a fixar l'ulteriura procedura e l'integraziun dal cussegl grond. La davosa giada è vegnida realisada latiers in'occurrenza speziala ordaifer dals affars effectivs dal cussegl.

Datum: 29 d'october 2002