Navigation

Inhaltsbereich

Interpellaziun concernent las consequenzas dal cas d'anaplasmosa a Cuira

Sessiun: 08.10.2002
La stad/l'atun 2002 è l'entira agricultura da noss chantun vegnida pertutgada fermamain da las consequenzas da la malsogna anaplasmosa che blers arments en il manaschi d'in martgadant da muvel grond a Cuira han gì. La malsogna d'arments menziunada n'era fin uss strusch enconuschenta en Svizra. Surtut n'è ella anc betg sa mussada en ina tala furma epidemica. La fin d'avust han stuì vegnir mazzads passa 300 animals malsauns u pertutgads da la malsogna en la muaglia (ca. 30 animals eran gia morts avant da la malsogna).

En il decurs da l'elavuraziun epidemologica dal svilup da la malsogna èn vegnids constatads agents infectus IBR tar surprendentamain bleras emprovas da sang dals animals mazzads. Quai ha gì tranter auter per consequenza che l'uffizi chantunal da veterinari ha serrà transitoriamain las alps da singulas vischnancas. Nuncuntentaivla è stada en quest connex tranter auter la circulaziun d'infurmaziuns. Uschia han las autoritads da quellas vischnancas, da las qualas las alps eran vegnidas serradas, intervegnì per exempel che la bloccada era vegnida decretada mo tras las medias.

Tant dals uffizis chantunals sco er dals veterinaris involvids directamain vegni pretendì fitg bler per dumagnar quest grond cas da donn. Malgrà la lavur professiunala da quests spezialists èsi da far oz differentas dumondas:

1. È er la regenza da l'avis ch'en in cas sumegliant fissi da furmar en il futur in veritabel stab da crisa?

2. Quals uffizis fissi d'integrar en quest stab da crisa?

3. Co pon ins meglierar l'infurmaziun? È er la regenza da l'avis ch'en in stab da crisa stuess in spezialist esser cumpetent exclusivamain per la lavur da medias e per l'ulteriura infurmaziun?

4. È la regenza pronta d'examinar, sco ina da las pussaivlas consequenzas da quest cas, la dumonda, sche l'uffizi da veterinari sco part dals „fatgs da sanadad“ da noss chantun na stuess en il proxim futur betg vegnir transferì dal departament da l'intern e da l'economia publica al departament da giustia, polizia e sanitad?

5. Tgenins motivs cumprovan ord vista actuala in tal transfer, tgenins betg?

6. Tge conclusiuns tira la regenza da las experientschas fatgas (mesiras urgentas necessarias, adattaziun da las prescripziuns per la chargiada d'alp, e.u.v.)?

7. Tge consequenzas ston ils responsabels per las alps grischunas prender en connex cun la midada dal martgà da muvel?

8. Quant lunsch pudessan manaschis da commerzi a l'engrossa (sco per exempel il manaschi agricul pertutgà da la fatschenta actuala ch'è circundà da tuttas varts d'axas da traffic fermamain frequentadas) vegnir serrads effectivamain en il cas d'epidemias d'animals contagiusas (p.ex. zoppina)?

Cuira, ils 8 d'october 2002

Name: J ä g e r, Frigg, Hanimann, Ambühl, Arquint, Bär, Bezzola, Biancotti, Bischoff, Bucher, Büsser, Cathomas, Caviezel (Cuira), Farrér, Geisseler, Hess, Kehl, Keller, Locher, Looser, Luzio, Marti, Meyer, Monigatti, Nick, Noi, Parolini, Patt, Pedrini, Pfenninger, Pfiffner, Portner, Sax, Scartazzini, Schmid (Val S. Pieder), Schmutz, Schütz, Suter, Tramèr, Tremp, Trepp, Walther, Wettstein, Zanolari, Zindel

Session: 8.10.2002
Vorstoss: rg Interpellation


Resposta da la regenza

1. En il cumbat cunter epidemias d'animals vegni distinguì tranter epidemias d'animals fermamain contagiusas (p.ex. la zoppina) e las autras epidemias d'animals, da las qualas la IBR/IPV fa era part sco empidemia d'animals ch'igl è d'extirpar. La basa per questa divisiun èn tant il cumportament dal scherm infectus (tendenza da derasaziun) sco era las mesiras da cumbat adattadas. Sche las epidemias d'animals fermamain contagiusas cumparan ston ins pudair prender regress sin in stab da crisa. Cun il conclus dals 6 da mars 2001 ha la regenza numnà preventivamain in stab da crisa che sa cumpona d'ina part dal stab directiv chantunal. Ella ha fatg quai pervia da l'anteriura problematica cun la zoppina en Gronda Britannia. A basa da las mesiras ch'igl è stà da prender per cumbatter l'epidemia en l'actual cas d'anaplasmosa e da IBR/IPV a Cuira n'èsi mai stà da pretender l'acziun dal stab da crisa. En il futur vegnan ins a stuair decider vinavant tenor il cas da donn, sch'ins duai engaschar in stab da crisa u betg.

2. En in eventual stab da crisa fissan da clamar sut la batgetta da l'uffizi chantunal da veterinari la polizia chantunala, il veterinari chantunal, l'uffizi per l'ambient, l'uffizi per la protecziun civila e l'agid en cas da catastrofas, il laboratori chantunal e la controlla da victualias sco er il schef dal servetsch veterinar da la brigada territoriala 12. Plinavant fissi da resguardar eventualmain era ina integraziun dal UAMM (partiziun agricultura).

3. En il cas d'anaplasmosa e IBR/IPV ha l'uffizi chantunal da veterinari pudì garantir da tuttas uras l'infurmaziun adequata tant envers ils singuls possessurs d'animals invulvids sco er envers las corporaziuns d'alp pertutgadas e las medias. Las disposiziuns da serrada decretadas transitoriamain èn vegnidas drizzadas en scrit als possessurs d'animals pertutgads u era als chaus d'alp responsabels. En in cas d'epidemia pli grond èsi senza dubi enendretg, sche l'infurmaziun vegn concentrada e succeda sur in/a spezialist/a.

4. En il rom dal project „verificaziun da las incumbensas“ ha la regenza prendì enconuschientscha ils 17 da zercladur 2002 dal rapport da l'uffizi da veterinari „Integraziun da la controlla da victualias en l'uffizi da veterinari (u viceversa)“ dals 29-05-2002 ed ella ha decis da persequitar quest project, uschespert che l'organisaziun e la surveglianza da la segirezza da las victualias vegnan fixadas definitivamain sin plaun federal. En quest senn è la regenza era pronta d'examinar ina midada dal departament per quests uffizis.

5. Sco part dal servetsch veterinar da la Svizra è l'uffizi chantunal da veterinari dal Grischun il center da cumpetenza sin plaun chantunal per la sanadad dals animals, la protecziun dals animals sco er per parts impurtantas da la segirezza da victualias da derivanza animalica sco era per il tractament dals medicaments d'animals. L'emprima prioritad ha la protecziun da la sanadad da l'uman e da l'animal. Per pudair ademplir questas incumbensas è l'uffizi da veterinari dependent da la collavuraziun da plirs uffizis en differents departaments. Igl è evident che la collavuraziun d'uffizis che tutgan tar il medem departament funcziuna cun pli paucs incaps. Ma perquai che l'uffizi da veterinari collavura cun plirs uffizis en differents departaments, èsi inditgà d'attribuir l'uffizi da veterinari a quel departament, en il qual igl è da spetgar il pli grond potenzial da sinergias e la pli gronda effizienza. La pli raschunaivla integraziun sto vegnir elavurada en il rom dal project surmenziunà.

6. Las experientschas dal davos cas vegnan integradas en in'analisa da las fermezzas e da las flaivlezzas che curra actualmain. Da questa analisa vegnan a resultar eventualas mesiras e recumandaziuns co ch'igl è per exempel d'adattar las prescripziuns per la chargiada d'alp. Mesiras urgentas n'èn betg necessarias.

7. Pervia da l'alpegiada durant la stad ch'è fitg derasada ed impurtanta en il chantun Grischun fan ils organs responsabels permanentamain stimaziuns da las ristgas areguard las epidemias d'animals e resguardan talas cun decretar las respectivas prescripziuns chantunalas per la chargiada d'alp. La sanadad dals animals è ina finamira da las prescripziuns per la chargiada d'alp. Questa finamira pon ins dentant mo cuntanscher, sch'ils responsabels per l'alp adempleschan e realiseschan dal tuttafatg per lur manaschis d'alp las ordinaziuns cuntegnidas en quellas. Per ch'ins possia garantir quai vegnan purschids annualmain curs per chaus d'alp en furma da segments da scolaziun.

8. Tras la cumposiziun dal stab da crisa menziunà e cun l'infrastructura existenta (dustanza cunter epidemias d'animals) vegni garantì che la vasta serrada necessaria en il cas d'epidemias d'animals fermamain contagiusas po succeder fitg spert. Per quest intent datti era vairs scenaris d'urgenza. Cun serrar stallas d'animals da niz che sa chattan en vischinanza d'axas da traffic fermamain frequentadas resulta inevitablamain ina restricziun dal traffic. Perquai èsi da prender las mesiras adattas al cas e tenor la situaziun.

Datum: 29 d'october 2002