Navigation

Inhaltsbereich

Postulat concernent la coordinaziun da la scolaziun d'informatica

Sessiun: 08.10.2002
En las scolas svizras tutgan ils computers oz en moda fitg differenta per gronda part a l'equipament da basa. Tant en la scola populara sco er en tut las scolas da cuntinuaziun (scolas medias, scolas professiunalas) vegni instruì informatica. Il chantun Grischun manava per exempel il rom obligatori „enconuschientschas da basa da l'informatica“ sin il stgalim secundar I. En las scolas professiunalas sa drizza l'instrucziun d'informatica tenor ils basegns dals singuls champs professiunals. Las prescripziuns per quest intent dat il UFFT. Il medem mument obligheschan las prescripziuns pertutgant la furmaziun generala en il plan d'instrucziun da basa las scolas professiunalas d'instruir a tut las persunas ch'emprendan ina professiun ils secturs „retschertga d'infurmaziuns“, „elavuraziun d'infurmaziuns“ e „segirezza d'infurmaziuns“. Ma er sin il stgalim da la scola primara vegnan actualmain planisadas resp. evaluadas per part cun grond entusiassem novas pussaivladads per duvrar il computer en l'instrucziun. La sperta introducziun dals meds auxiliars e da l'instrucziun d'informatica sin tut ils stgalims lascha dentant prest per forza manchentar ina coordinaziun dals cuntegns da l'instrucziun che va tras ils stgalims da scola.

Durant la sessiun da matg 2001 ha il cussegl grond acceptà cun 73:0 vuschs in postulat Zanolari concernent l'offensiva d'internet en las scolas, e quai en il senn da las explicaziuns en scrit da la regenza. Qua èsi vegnì rinvià tranter auter al project da pilot „novas medias en l'instrucziun da la scola primara“ e palesà l'intenziun da resguardar las pretensiuns per l'applicaziun da las tecnologias d'infurmaziun e communicaziun (TIC) cun repassar las directivas chantunalas per construcziuns novas e renovaziuns da chasas da scola.

Blers purtaders da scolas sa chattan oz effectivamain davant grevas decisiuns d'investiziun. In'acquisiziun cumplessiva da plirs computers en mintga stanza da scola e sin tut ils stgalims vegn a chaschunar custs excessivs, sch'ins calculescha seriusamain (amortisaziun, scolaziun da tut las persunas d'instrucziun, mantegniment da las installaziuns e.u.v.). Auters chantuns han gia fatg experientschas en quests secturs. Savens suonda a l'entusiassem ina clera dischillusiun. Tenor ina retschertga da l'uffizi federal da statistica (UFS) avessan bain gia installà en Svizra 82 % da tut las scolas popularas computers per lur scolaras e scolars. Tuttina duvrassan mo stgars in tschintgavel da questas classas ils computers pliras giadas ad emna.

En vista a questa situaziun vegni ad esser util per ils purtaders grischuns da scola, sche las incaricas cuntegnidas en la surmenziunada resposta da la regenza al postulat Zanolari e drizzadas a la gruppa da lavur vegnan cumplettadas cun il punct, tenor il qual ils programs d'emprender informatica vegnan coordinads stringentamain per tut las scolas (scola populara, incl. scolas da cuntinuaziun). Latiers sa tracti da la separaziun tranter la scola primara ed il stgalim secundar I sco er tranter la scola populara e las scolas professiunalas resp. il stgalim secundar II. I duai vegnir fixà tge enconuschientschas ed abilitads minimalas che duain vegnir cuntanschidas sin tge stgalim.

Nus envidain la regenza da cumplettar en quest senn las incaricas da la gruppa da lavur.

Cuira, ils 8 d'october 2002

Name: J ä g e r, Zanolari, Butzerin, Arquint, Barandun, Beck, Berther (Mustér), Biancotti, Bisculm, Brunold, Bucher, Bühler, Casanova (Cuira), Casanova (Vignogn), Caviezel (Cuira), Dalbert, Dermont, Farrér, Frigg, Gartmann, Giuliani, Lardi, Locher, Looser, Luzio, Meyer, Michel, Monigatti, Montalta, Noi, Pedrini, Peretti, Pfenninger, Pfiffner, Portner, Quinter, Scartazzini, Schmid (Val S. Pieder), Schmutz, Schütz, Suter, Tremp, Trepp, Tuor (Mustér), Zindel

Session: 8.10.2002
Vorstoss: rg Postulat


Resposta da la regenza

Cun tractar il postulat Zanolari ha la regenza punctuà l'impurtanza da l'applicaziun da las tecnologias d'infurmaziun e communicaziun (TIC) en las scolas sco er tar la scolaziun e furmaziun supplementara da las persunas d'instrucziun. Quai resguardond il sboz da la lescha federala davart la promoziun da l'applicaziun da las tecnologias d'infurmaziun e communicaziun (TIC) en las scolas ch`è entrada en vigur ils 1. d'avust 2002. Ella s'è mussada pronta da prender mesiras per promover TIC en las scolas. Ultra da quai postulescha il program da regenza 2001 fin 2004 en la finamira nr. 42 la promoziun da tecnologias d'infurmaziun e communicaziun per augmentar l'attractivitad dal lieu.

En connex cun la realisaziun dal postulat Zanolari ha la regenza prendì conuschientscha ils 9 da fanadur 2002 dal rapport „Public Private Partnership, scolas en la rait (PPP-SeR) per il chantun Grischun“ sco lavur da basa. Quest rapport cuntegna oravant tut in'analisa da la situaziun ed in concept da svilup TIC 2003 fin 2007 per il Grischun. Il medem mument ha la regenza approvà da princip l'installaziun d'in center interdisciplinar TIC da la scol'auta per tecnica ed economia STE e da la scol'auta professiunala da pedagogia SAP en il senn dal rapport e da la strategia generala TIC. Sch'ils meds necessaris per l'installaziun da quel center pon vegnir mess a disposiziun, èsi prevesì che la regenza stipulescha cun la STE e cun la SAP ina cunvegna da prestaziun concernent l'installaziun, la gestiun e la finanziaziun dal center TIC per che quel center possia cumenzar uffizialmain cun sia lavur ils 1. da schaner 2003. Il cussegl grond vegn a stuair decider, en il rom dal preventiv 2003, davart il diever dals meds per il center da cumpetenza TIC. La regenza metta en discussiun ina eventuala suspensiun dal project, e quai sco element da sia strategia per cuntanscher puspè l'equiliber da las finanzas.
La regenza chapescha e parta ils dubis exprimids da las postulantas e dals postulants sco er la valitaziun ch'ina vaira euforia è deplazzada. Effectivamain na vegni betg ad esser pussaivel en emprima lingia ord ponderaziuns finanzialas d'equipar cun computers tut las stanzas da scola da tut ils stgalims. Tenor las enconuschientschas dad oz e sin fundament da las experientschas en auters chantuns na fiss ina tala finamira era betg da considerar sco raschunaivla. Igl è era

da tegnair quint che la scolaziun e la furmaziun supplementara cun cleras finamiras da las persunas d'instrucziun vegn a duvrar intgins onns e - sch'ins vuless agir en l'entir chantun - vegniss a duvrar memia bleras resursas. Perquai vegni ad esser inevitabel da far exactas analisas dals custs e dal niz sin plaun chantunal e spezialmain sin plaun dals purtaders da scola, e quai per garantir in diever confurm al basegn dal computer en scola. Era en connex cun il concept da svilup TIC 2003 fin 2007 parta pia la regenza dal fatg, ch'il comupter na duaia insumma betg vegnir duvrà en scolina ed en il stgalim inferiur e duaia vegnir duvrà mo cun fitg grondas resalvas. Ella parta plinavant dal fatg ch'in augment dal dumber da lecziuns en la scola populara na fiss strusch realisabel, perquai che la chargia actuala da las scolaras e dals scolars vegn valitada sco auta. Ord questas ponderaziuns èsi da grond basegn da coordinar ils programs d'emprender informatica per il stgalim da la scola populara e per las scolas che mainan vinavant. Ina coordinaziun a temp e cun cleras intenziuns duai impedir in dumber nunsurvesaivel da programs d'emprender informatica ed ella duai definir qualas enconuschientschas ed abilitads che ston vegnir cuntanschidas sin mintga stgalim. Ma las lavurs da coordinaziun na dastgan betg sa restrenscher mo sin la situaziun e sin il svilup entaifer il chantun. Plitost èsi d'observar era las tendenzas da svilup en auters chantuns.

En il senn da questas explicaziuns è la regenza pronta d'acceptar il postulat e da resguardar il giavisch da quel en la cunvegna da prestaziuns da la regenza cun la STE e cun la SAP concernent l'installaziun, la gestiun e la finanziaziun dal center TIC.

Datum: 29 d'october 2002