Navigaziun principala

Cuntegn da la pagina

Interpellaziun concernent emetturs da televisiun da lingua estra en il Grischun

Sessiun: 09.10.2002
Igl è enconuschent che pervia da la midada dals emetturs da televisiun da la SRG-SSR da la derasaziun analoga a la derasaziun digitala per tut las chasadas che na disponan betg d'in receptur da satellit u che n'èn betg colliadas cun ina rait da cabel, na pon ils quatter emetturs naziunals „da lingua estra“ TSI 1 e 2 sco er TSR 1 e 2 tut tenor regiun betg pli vegnir recepids. Persunas ch'èn dependentas d'ina recepziun directa (antenna da stanza u antenna da chasa) han sin ils emetturs svizzers da lingua estra mo in televisur. Quai è ina gronda restricziun da la Idée Suisse, gist en noss chantun triling. L'emprim han ins discurrì d'in temp da midada da trais onns, ussa quintan ins gia cun tschintg onns.

Las interpellantas ed ils interpelladers dumondan a la regenza:

1. Co giuditgescha la regenza l'agir da la SRG SSR Idée Suisse?

2. Co po la regenza grischuna far dapli pressiun per ch'il temp da midada possia vegnir scursanì?

Cuira, ils 9 d'october 2002

Name: Zanolari, Lardi, Keller, Beck, Berther (Mustér), Bezzola, Biancotti, Bisculm, Brüesch, Büsser, Capaul, Casanova (Vignogn), Caviezel (Cuira), Cavigelli, Crapp, Demarmels, Gartmann, Geisseler, Giacometti, Giuliani, Jäger, Lemm, Loepfe, Maissen, Nick, Patt, Pedrini, Peretti, Perl, Pfenninger, Portner, Scartazzini, Sax, Stiffler, Toschini, Tramèr, Tuor (Trun), Turnell, Zegg, Zinsli

Session: 9.10.2002
Vorstoss: rg Interpellation


Resposta da la regenza

La societad svizra da radio e televisiun, SSR Idée Suisse, (SSR) dovra en il futur per la derasaziun da ses programs la tecnica digitala (DVB-T). Cun l'introducziun da la televisiun digitala vegni pussibilità al public da retschaiver entras in'antenna da stanza u in'antenna da tetg considerablamain dapli programs ch'enfin ussa. En connex cun la midada da la derasaziun analoga a la derasaziun digitala èn durant l'emprima mesadad da zercladur da quest onn vegnids interruts differents emetturs da televisiun analogs. Quai ha manà latiers ch'en grondas parts dal chantun Grischun na pon ins terrestramain (cun in'antenna da stanza u in'antenna da tetg) betg pli retschaiver ils programs da la Televisione Svizzera di Lingua Italiana (TSI) e da la Télévision Suisse Romande (TSR). Quel che na vul betg renunziar d'in da quels programs è dependent da l'attatg da cabel u d'ina colliaziun tras satellit.

Cun la brev dals 12 da mars 2002/protocol nr. 309 ha la regenza grischuna protestà vehementamain encunter l'interrupziun da programs da televisiun or d'autras regiuns linguisticas e fatg attent il schef dal departament federal per ambient, traffic, energia e communicaziun (DATEC) che questa reducziun da prestaziuns per las minoritads da lingua taliana, las qualas vegnan pertutgadas da quai en furma speziala, na possia betg vegnir pretendida. En sia resposta demussa cusseglier federal Leuenberger chapienstscha per la situaziun speziala dal chantun Grischun, considerescha però l'interrupziun temporara per introducir la nova tecnologia sco indesistibla.

La regenza crai ch'il provediment per tut la surfatscha dal chantun cun la televisiun digitala saja da princip raschunaivel e necessari. Il provediment optimal per tut la surfatscha dal chantun cun „DVB-T“ maina ad in'access segir a questas medias e promova l'attractivitad dal lieu.

En vista a quests fatgs sa laschan las dumondas dals interpellants respunder suandantamain.

Dumonda 1:
La regenza deplorescha ch'il public è vegnì infurmà insuffizientamain entras la SSR avant las interrupziuns. Sper il fatg en sasez è quai stà il motiv principal per la malcuntentientscha da blers aspectatur(a)s ch'èn sa sentid(a)s ignorad(a)s e che na san betg chapir il proceder da la SSR. La regenza spetga da la SSR ch'ella prenda serius sias/ses cliaint(a)s e ch'ella infurmescha a temp sur da las planisaziuns dal schlargiament.

Dumonda 2:
La regenza ha sco menziunà gia intervegnì durant il mars tar il responsabel departament per ambient, traffic, energia e communicaziun. En il rom d'ina seduta cun represchentants da la SSR e da la Tele-Rätia AG èsi vegnì concludì da chattar ina soluziun transitoria per il temp da transiziun. En il fratemp èsi però sa mussà ch'ina tala soluziun n'è betg realisabla. I vala ussa da chattar la pli svelta via co ch'il nov plan da rait d'emetturs per la televisiuns digitala dal chantun Grischun possia vegnir introducì. En quest senn sustegna la regenza il scenari da cumplettaziun previs dal DATEC, suenter il qual las regiuns en il chantun Grischun, en il Tessin ed en la Svizra romanda duajan pudair profitar l'emprim da la nova tecnologia digitala. Questas regiuns èn messas deblamain en cabel e pertutgadas il pli ferm entras l'interrupziun dals emetturs da televisiun da la SSR. La regenza vegn a s'engaschar tant tar la SSR sco er tar il DATEC cun tut ils meds che stattan a disposiziun ad ella per cuntanscher ch'il chantun Grischun vegnia tractà prioritaramain. Igl è en l'interess da tut ils paticipads (chantun, SSR, Swisscom e public) ch'i vegnia chattà svelt ina soluziun per introducir speditivamain la televisiun digitatala terrestera.

Datum: 29 d'october 2002