Navigation

Inhaltsbereich

Postulat concernent la revisiun da la lescha davart il promover la tgira da malsauns e l'assistenza da persunas attempadas e da persunas che basegnan tgira (lescha davart la tgira da malsauns)

Sessiun: 09.10.2002
La lescha davart la tgira da malsauns regla la cussegliaziun, la coordinaziun e la concessiun da contribuziuns per il provediment, la tgira sco er l'assistenza da malsauns, da pazients stabels e da persunas attempadas en il chantun Grischun.

Entras las numerusas revisiuns parzialas dals davos onns n'è la lescha davart la tgira da malsauns betg pli uschè survesaivla e chapibla. Uschia vegn per exempel perfin reglà il servetsch da salvament en la lescha davart la tgira da malsauns. Ina correctura formala e dal cuntegn da questa lescha daventa necessaria per ils suandants motivs:

1. La lescha sto vegnir concepida a moda cunvegnenta al applitgader.

2. En il program da la regenza è previsa la nova regulaziun da la finanziaziun dals ospitals. La reordinaziun da la finanziaziun dal spitex è medemamain necessaria. Igl è d'examinar, sche la problematica da la finanziaziun po succeder en il rom d'ina revisiun totala.

3. La lescha sto vegnir concepida formalmain uschia che futuras adattaziuns che sa mussan sin il plaun federal (p. ex. LAM II-revisiun) possian vegnir transfurmadas senza problems e svelt sin il plaun chantunal.

En quest connex ston ins sclerir eventualas intersecziuns cun la lescha davart ils fatgs da la sanadad dal chantun Grischun (lescha da sanadad).

Ils postulants envidan la regenza da suttametter la lescha davart il promover la tgira da malsauns e l'assistenza da persunas attempadas e da persunas che basegnan tgira (lescha davart la tgira da malsauns) ad ina revisiun totala e da la concepir a moda progressiva.

Cuira, ils 9 d'october 2002

Name: Nick, Cavigelli, Valsecchi, Bär, Barandun, Bezzola, Biancotti, Bisculm, Bischoff, Casanova (Cuira), Catrina, Cavegn, Caviezel (Pitasch), Christ, Christoffel, Claus, Frigg, Furrer, Gartmann, Giacometti, Giuliani, Guetg, Hartmann, Hess, Hübscher, Jäger, Jeker, Joos, Kehl, Kessler, Lardi, Luzio, Märchy, Marti, Michel, Monigatti, Nigg, Pfiffner, Portner, Robustelli, Scartazzini, Schmid (Sedrun), Schmid (Val S. Pieder), Schütz, Stiffler, Suter, Tuor (Mustér), Tuor (Trun), Turnell, Walther, Wettstein, Zanolari, Zegg

Session: 9.10.2002
Vorstoss: rg Postulat


Resposta da la regenza

La lescha davart la tgira da malsauns è vegnida acceptada dal pievel ils 2 da december 1979. Dapi alura è ella vegnida suttamessa diversas giadas ad ina revisiun parziala. Las midadas pertutgan principalmain ils suandants secturs:

- tgira ed assistenza a chasa (spitex)
- scolas da la sanadad publica
- servetsch da psichiatria per uffants e giuvenils
- servetsch da salvament
- tgira ed assistenza da persunas attempadas e da persunas che basegnan tgira
- attribuziun dals ospitals al stgalim da provediment / mandats da prestaziun individuals per ospitals

Questas differentas revisiuns parzialas han gì per consequenza che la lescha davart la tgira da malsauns è vegnida d'ina vart pli vasta e da l'autra vart ha ella pers sia survesaivladad.

Correspundentamain è la regenza pronta d'acceptar il postulat e da suttametter a temp vulì al cussegl grond ina proposta per ina revisiun totala da la lescha davart la tgira da malsauns. Ella fa en quest connex attent che la proposta per ina nova concepziun da la finanziaziun dals ospitals e previsiblamain er la proposta per ina nova concepziun da la finanziaziun chantunala da spitex vegnan ord motivs da temp suttamessas al cussegl grond avant la revisiun totala da la lescha davart la tgira da malsauns.

Datum: 29. d'october 2002