Navigaziun principala

Cuntegn da la pagina

Postulat concernent promover las rutas da velo en il Grischun

Sessiun: 26.11.2002

Ils amis dal ciclissem enconuschan las rutas uffizialas da velo da „La Svizra cun velo“. Sco facturs impurtants per il lieu enconuschan questas rutas medemamain noss turistichers indigens. Natiralmain na po il Grischun betg offrir vias da velo uschè cumadaivlas, sco p.ex. quellas da la Svizra bassa. Sin trajects pli curts pon ins dentant far er tar nus differentas spassegiadas cun velo ch'èn relativamain cumadaivlas ed adattadas per famiglias.
Dentant datti trajects da vias da velo sin la rait grischuna che sumeglian pli fitg ad in meglier letg da l'aua che ad ina via da velo (p.ex. intgins trajects da la via da Zernez fin a Martina). Quai deriva surtut dal fatg, ch'en noss chantun èn las vischnancas responsablas per il mantegniment da las vias. Igl è lev da chapir ch'ina pitschna vischnanca cun forsa in lung traject da via da velo è finanzialmain spert surdumandada u sto metter autras prioritads per motivs evidents.
Il chantun sto avair in grond interess per questa branscha dal turissem da stad. Questa branscha economica munta in'auta valur agiuntada, e quai en in sectur persistent. La contribuziun marginala actuala dal chantun a las vias da velo duess perquai vegnir augmentada cleramain.
Nus supplitgain la regenza d'augmentar considerablamain la contribuziun actuala a las vias da velo. Quests daners duain vegnir impundids surtut er per meglieraziuns qualitativas. Latiers tutga er la concepziun da novas rutas, là nua ch'existan oz vias memia maltscheccas ch'èn absolutamain nunadattadas per famiglias.

Cuira, ils 26 da november 2002

Nome: Frigg, Jäger, Trepp, Arquint, Bucher, Caviezel (Cuira), Locher, Looser, Meyer, Noi, Pfenninger, Pfiffner, Schmutz, Schütz, Zindel

Session: 26.11.2002
Vorstoss: rg Postulat



Resposta da la regenza

Dapi l'avertura da las vias da velo svizras l'onn 1998 è il traffic turistic da velos s'augmentà cleramain er en il Grischun. Tras noss chantun mainan las rutas 2 e 6 ch'èn fitg attractivas dal puntg da vista da la cuntrada e da la cultura. Ellas èn la pitga principala da l'avertura cun vias da velo en il Grischun. Dasperas datti differentas rutas regiunalas da velo ed in grond dumber da rutas da bikes. Las retschertgas da la fundaziun La Svizra cun velo da l'onn 2001 mussan che la ruta nr. 2, la ruta dal Rain, è la ruta da velo la pli frequentada da las 9 rutas naziunalas. En l'entira Svizra vegnan generads annualmain var 680'000 pernottaziuns ed ina svieuta da 170 milliuns francs che van per part er en favur da las interpresas da turissem dal Grischun. En il rom da sias pussaivladads legalas ha il chantun sustegnì e realisà da l'entschatta ennà l'idea da La Svizra cun velo. L'uffizi da planisaziun ha planisà e producì la signalisaziun en collavuraziun cun la fundaziun La Svizra cun velo. Er vinavant vegn el ad esser cumpetent per survegliar il stadi da las vias ed il medem mument il post da consultaziun per las dumondas da contribuziun che vegnan inoltradas da las vischnancas per lur projects d'amplificaziun. Differents trajects critics da las vias da velo svizras èn pia er vegnids sanads ils davos onns da las vischnancas cun contribuziuns chantunalas. Deplorablamain sa mussi ch'i resultan limitas adina pli stretgas per las pussaivladads finanzialas da las vischnancas. Er projects subvenziunads dal chantun per vias da velo ston vegnir suspendids. Correspundentamain han ins pudì duvrar ils meds previs per l'onn 2002 mo a mesadad, e quai pervia da mancanza d'ina facturaziun tras las vischnancas.

Sin fundament da las cundiziuns generalas legalas e da la sco ch'ins sa situaziun finanziala actualmain fitg precara, èn ulteriuras activitads dal chantun er en il sectur dal traffic plaun pussaivlas mo a moda fitg restrenschida. Surtut èsi en quest mument nunpussaivel da s'imaginar in augment da la tariffa da contribuziun. D'in tal augment profitassan er mo quels projects che servan, tenor l'art. 87 da la lescha davart las vias, a distgargiar las vias chantunalas.

La regenza è da princip pronta da dar dapli paisa als interess dal turissem cun realisar il concept da las vias da velo. La tariffa maximala da contribuziun da 50 pertschient duai vegnir mantegnida, dentant resguardond la situaziun da las finanzas chantunalas. En il rom da la proxima revisiun da la lescha davart las vias vegnan ins a stuair manar ina discussiun da princip davart la valur dal traffic plaun en il Grischun en cumparegliaziun cun auters meds da transport. En cas da basegn ston ins adattar correspundentamain il champ d'incumbensas dal chantun.

Il postulat na vegn en quest senn betg acceptà.


Datum: 11 da favrer 2003