Navigaziun principala

Cuntegn da la pagina

Moziun concernent ina cumplettaziun dal reglament da gestiun CdG

Sessiun: 26.11.2002
Igl è da constatar che oz occupan differents commembers da la CdG il medem mument er in mandat en cussegls administrativs. Uschia per exempel en il cussegl administrativ da la banca chantunala grischuna u da l'institut d'assicuranza d'edifizis. Per mandat dal cussegl grond fa dentant la CdG controllas da questas instituziuns. Uschia vegn violà il princip d'independenza; in fatg che na po betg vegnir acceptà. Quai fiss per exempel il medem, sco sch'in cusseglier administrativ d'ina SA adempliss il medem mument er l'uffizi dal post da revisiun.
Las moziunarias ed ils moziunaris pretendan perquai ina cumplettaziun dal reglament da gestiun da la CdG en quel senn che sias commembras e ses commembers na dastgan betg occupar il medem mument in mandat en cumissiuns administrativas / cussegls da banca ch'els controllan sezs.

Cuira, ils 26 da november 2002

Nums: Tscholl, Feltscher, Suenderhauf, Arquint, Bär, Battaglia, Beck, Berther (Mustér), Berther (Sedrun), Biancotti, Bischoff, Brüesch, Brunold, Bucher, Büsser, Butzerin, Capaul, Casanova (Cuira), Casanova (Vignogn), Cathomas, Catrina, Caviezel (Cuira), Christ, Christoffel, Claus, Crapp, Dalbert, Darms, Dermont, Donatsch, Farrér, Frigg, Giuliani, Göpfert, Hanimann, Hardegger, Hartmann, Heinz, Hess, Hübscher, Jäger, Jeker, Joos, Juon, Koch, Looser, Luzi, Luzio, Meyer, Nick, Noi, Parolini, Patt, Pfiffner, Pleisch, Ratti, Righetti, Robustelli, Sax, Scharplatz, Schütz, Stiffler, Stoffel, Thomann, Tramèr, Tremp, Trepp, Tuor (Mustér), Vetsch, Zarro, Zinsli

Session: 26.11.2002
Vorstoss: rg Motion



Resposta da la regenza

Ils moziunaris crititgeschan ch'actualmain occupan differents commembers da la cumissiun da gestiun dal cussegl grond (CdG) il medem mument in mandat en cumissiuns administrativas d'instituts chantunals (banca chantunala grischuna, institut d'assicuranza d'edifizis e.u.v.). Ad els pari che tras quai vegnia violà il princip d'independenza ed els pretendan perquai ina cumplettaziun dal reglament da la cumissiun da gestiun (DG 170.160) cun ina disposiziun che scumonda ina tala participaziun contemporana.

Da princip èsi chaussa dal parlament co ch'el vul reglar l'incumpatibilitad da l'uffizi d'in commember da la CdG cun autras funcziuns. Il cuntegn dal giavisch dals moziunaris para dentant a la regenza d'esser giustifitgà, schebain ch'il Problem pudess vegnir reglà cun agid d'in urden da recusaziun formulà correspundentamain. Uschia persequitass il parlament consequentamain la via prendida cun la refurma da las dretgiras e cun la revisiun totala da la constituziun chantunala pertutgant las dumondas d'incumpatibilitad. Qua stuess la regulaziun concreta bain tunar uschia che l'uffizi d'in commember da la cumissiun da gestiun dal cussegl grond è incumpatibel cun la participaziun en organs d'instituziuns ch'èn suttamess ad ina controlla parlamentara. Cun questa formulaziun fissi garantì che tut ils cas vegnissan tractads a moda eguala, independentamain da la furma giuridica concreta (institut da dretg public, societad d'aczias e.u.v.) e da l'organisaziun dals instituts respectivs.

Ils moziunaris pretendan ina cumplettaziun dal reglament da la CdG cun ina correspundenta disposiziun d'incumpatibilitad. Sche la revisiun totala da la constituziun chantunala vegniss acceptada dal pievel ils 18 da matg 2003, alura stuess ina tala regulaziun dentant vegnir relaschada en il rom da la legislaziun adesiva sco lescha. Art. 22 al. 5 da la constituziun chantunala revedida prevesa tranter auter numnadamain che ulteriurs cas d'incumpatibilitad, ils quals n'èn betg reglads en la constituziun, vegnian reglads per lescha. Ultra da quai vegniss insumma abrogà cun la constituziun chantunala revedida er il dretg independent da relaschar ordinaziuns da fin uss dal cussegl grond per il sectur da sia organisaziun (art. 14 al. 2 constituziun chantunala).Sch'il pievel refusass dentant la revisiun totala da la constituziun chantunala, alura pudessan ins imaginar ina cumplettaziun dal reglament da la CdG cun ina tala disposiziun.

Suenter questas explicaziuns è la regenza pronta d'acceptar la moziun en il senn da las ponderaziuns.


Datum: 21 da schaner 2003