Interpellaziun concernent ils plans per in'olimpiada en il Grischun
Sessiun: 26.11.2002
Tut ils plans per in'olimpiada en la Svizra han fatg naufragi ils davos onns. En il chantun Berna è ina participaziun a l'olimpiada vegnida refusada cleramain dal suveran e la candidatura dal Grischun è gia ida da l'aua giu en la sterzada interna da la Svizra.
Tuttina ha il maun public stuì impunder considerabels meds finanzials e temp a basa d'iniziativas privatas, uschia er en il Grischun.
Cumbain che la votaziun dal pievel en il chantun Berna davart ils gieus olimpics d'enviern è vegnida refusada cleramain, va il spiert olimpiada puspè enturn en il Grischun. En vista da las stgarsas finanzas chantunalas ed als deficits annuals fissi tenor noss manegiar nunresponsabel, sch'il chantun sa participass puspè finanzialmain e temporalmain a basa da promotours privats a l'olimpiada.
Nus supplitgain perquai la regenza da respunder las suandantas dumondas:
È la regenza pronta, a basa da la gronda opposiziun cunter ils gieus olimpics d'enviern en il Grischun ed a basa da las experientschas fatgas en auters chantuns da garantir che nagins meds chantunals curran en in nov project d'olimpia, avant ch'i n'ha betg gì lieu ina votaziun dal pievel davart in project correspundent?
Cuira, ils 26 da november 2002
Nums: Looser, Trepp, Bucher, Caviezel (Cuira), Frigg Jäger, Locher, Meyer, Noi, Pfenninger, Pfiffner, Schmutz, Schütz, Zindel
Session: 26.11.2002
Vorstoss: rg Interpellation
Resposta da la regenza
Ils gieus olimpics d'enviern han gì lieu l'onn 1948 per l'ultima giada en Svizra. Las tentativas da Sion per ils onns 1976, 2002 e 2006 da clamar ils gieus puspè en Svizra n'èn betg gartegiadas pervia da la gronda concurrenza internaziunala. La candidatura “Berna 2010” è vegnida retratga suenter che la participaziun dal chantun è vegnida refusada da las votantas e dals votants. Davart ils motivs ch'han manà a la refusaziun pon ins mo specular. Conclusiuns da la decisiun negativa da Berna per il chantun Grischun èn gist uschè ristgadas sco talas da la decisiun positiva dals Vallesans per Sion.
Areguard la candidatura “Tavau 2010 (Grischun-Sviz-Turitg)” che n'è betg gartegiada pon ins constatar ch'ils trais chantuns participads e las 11 vischnancas da staziunament han sustegnì il project. Er il cussegl grond dal Grischun ha aderì per gronda part l'engaschament dal chantun. Uschia ha el refusà durant la sessiun da november 2000 cun 76 cunter 7 vuschs il postulat Trepp concernent “gieus olimpics en il Grischun: interrupziun da l'exercizi” ed ha approvà cun 85 cunter 0 vuschs in credit posteriur per las lavurs da projectaziun. Associaziuns economicas e dal turissem han sustegnì la candidatura, las uniuns per l'ambient èn stadas encunter. Gronda resistenza en quest senn n'han ins betg savia scuvrir.
La regenza è da princip da l'idea ch'il pievel duai votar davart la realisaziun dals gieus olimpics d'enviern en il Grischun. En quest senn ha ella fatg proposta al cussegl grond cun il messadi (carnet nr. 4/2001-2002, conclus 5) da suttametter la participaziun finanziala dal chantun ch'è prevesida per Tavau 2010 ad ina votaziun dal pievel. La regenza è però da l'avis ch'ina tala votaziun è mo alura raschunaivla ed inditgada, sch'in punct da referiment è dà en il senn d'in project concret e sche sia concepziun è avant maun en ils tratgs fundamentals, quai che n'è il mument betg il cas.
Sch'ina gruppa d'iniziativa s'avischina a la regenza cun in nov project, vegn ella ad analisar la situaziun e suenter a giuditgar, sch'in engaschi chantunal è raschunaivel ord punct da vista da l'economia publica ed en spezial, sche la candidatura intenziunada pudess contribuir sia part per stgaffir e segirar plazzas da lavur en il chantun Grischun. Pretendan la preparaziun d'in tal project e la fasa naziunala da candidatura meds chantunals, vegn il cussegl grond a pudair decider davart il credit necessari en il rom d'ina discussiun dal preventiv u d'in credit posteriur.
La regenza n'è en il senn da las decleraziuns betg pronta da dar la garanzia giavischada dals interpellants.
Datum: 18 da favrer 2003