Navigation

Inhaltsbereich

Interpellaziun concernent la tgira dals guauds cun ina funcziun speziala da protecziun (guauds FSP)

Sessiun: 26.11.2002
Ina gronda part da noss guauds protegian abitadis, vias da traffic ed autras installaziuns impurtantas. En il chantun Grischun èn 34% da la surfatscha dal guaud declerà sco guaud cun ina funcziun speziala da protecziun. Quests guauds impedeschan che la cuverta da naiv sa glischna, stabiliseschan la terra e reguleschan la bilantscha d'aua. Per che quests guauds possian ademplir lur funcziun a lunga vista, dovran els ina cultivaziun minimala. Quella cumpiglia: regiuvnar l'effectiv, tgirar ils guauds giuvens, regular la maschaida da differentas spezias da plantas, cumplettar il regiuvnament natiral cun implantaziuns e proteger d'influenzas tras selvaschina d'ungla. Tenor l'art. 3 al. 2 da la lescha chantunala dal guaud èn ils proprietaris da guaud obligads da mantegnair la funcziun da protecziun dal guaud a lunga vista. La situaziun precara sin il martgà da laina e la politica da subvenziuns actuala na portan als proprietaris da guaud pli meds finanzials avunda per realisar las mesiras per garantir la funcziun da protecziun da noss guauds. La confederaziun ed il chantun sustegnan gia oz la cultivaziun dal guaud, la construcziun da rempars da lavinas e la meglieraziun da l'infrastructura forestala. Ils interpellants han plaschair ch'en il preventiv dal 2003 la posiziun 5623 dal quint d'investiziun è, cun fr. 3'300'000.--, laschada sco l'onn passà. Nus avain dentant er constatà che quests imports èn vegnids stritgads massivamain ils davos onns.
La planisaziun forestala PSG (plan per il svilup dal guaud), ils novs plans da manaschi ed ils projects forestals da las vischnancas mussan ch'ils meds finanzials che stattan a disposiziun na tanschan betg pli per cultivar ils guauds FSP a moda minimala.

Perquai supplitgain nus la regenza da respunder las suandantas dumondas:

1. Donns per consequenza da mancanza da cultivaziun dal guaud ston pli tard vegnir sanads cun blers daners. Po il chantun Grischun sa lubir ch'ils proprietaris da guaud cun ina funcziun speziala da protecziun negligeschan ils guauds per motivs finanzials?

2. A l'interpellaziun dals 24 da schaner 2000 concernent „Influenzas e mesiras per l'economia forestala e per l'industria da laina dal Grischun suenter il stemprà Lothar“ ha la regenza respundì tranter auter suandantamain: „Per nizzegiar las contribuziuns federalas concedidas èsi plinavant da sfurzar la cultivaziun dals guauds da protecziun ch'è per il mument urgenta. Èsi pussaivel da survegnir da la confederaziun in import pli grond per la tgira dals guauds cun ina funcziun speziala da protecziun (FSP) per il chantun Grischun?

3. Tge duain far ils proprietaris da guaud che n'han betg las pussaivladads finanzialas da cultivar andantamain ils guauds (FSP) cun ina funcziun speziala da protecziun?

4. Dastga la cultivaziun selviculturala vegnir negligida en il guaud da protecziun sur noss abitadis?

Cuira, ils 26 da november 2002

Nums: Giacometti, Thomann, Conrad, Ambühl, Berther (Mustér), Berther (Sedrun), Bischoff, Casanova (Vignogn), Cathomas, Catrina, Caviezel (Cuira), Caviezel (Pitasch), Dermont, Frigg, Giovannini, Hess, Jäger, Joos, Keller, Kessler, Koch, Lardi, Looser, Luzio, Maissen, Marti, Noi, Robustelli, Roffler, Schmutz, Schütz, Tramèr, Trepp, Tuor (Mustér), Tuor (Trun), Zarro

Session: 26.11.2002
Vorstoss: rg Interpellation

Resposta da la regenza

La surfatscha dal guaud dal chantun Grischun cumpiglia ca. 180'000 hectaras. Circa in terz da quella u 60'000 ha èn zavrads sco guauds cun ina funcziun speziala da protecziun. Quests guauds protegian abitadis nua che persunas vivan permanentamain, vias naziunalas e chantunalas sco er lingias da viafier directamain da lavinas, privel da crappa, sbuvadas e bovas. Els han perquai per il spazi da viver en noss chantun in'impurtanza existenziala directa. Per ch'ils guauds da protecziun possian ademplir lur funcziun en moda persistenta, q.v.d. permanentamain ed effizientamain, è ina tgira adequata dal guaud bunamain adina necessaria. Sche questa tgira vegn tralaschada, è la stabilitad suffizienta e la regiuvinaziun a temp dals guauds messa en dumonda; la funcziun da protecziun n'è baud u tard betg pli garantida.

La moziun Lauer inoltrada l'onn 1986 sin champ federal, sa basava sin il fatg che noss guauds eran per groda part memia vegls e ch'ina regiuvinaziun era urgentamain necessaria. Dapi alura vegnan ils proprietaris da guaud sustegnids dal chantun e da la confederaziun tar la tgira da lur guauds en il rom da projects da guaud, e blers guauds ch'eran vegnids tralaschads onns a la lunga èn vegnids tgirads e regiuvinads cun grond success.

Las basas actualas da la planisaziun forestala prevesan per l'avegnir ina pli gronda necessitad da la tgira dals guauds da protecziun che fin ussa. L'influenza dal nivel bas dals pretschs da laina ch'èn gia daditg nuncuntentaivels pretenda - er cun in'utiltsaziun optimala da las resursas - pli blers meds finanzials dal chantun e da la confederaziun. Ins fa quint cun in augment da ca. 15 %. Quai resulta in auzament dals meds chantunals mumentans da fr. 3'300'000.- a fr. 3'800'000.-. En vista a la situaziun finanziala precara dal chantun e da la confederaziun ston ils meds vegnir impundids tenor clers criteris sin fundament da lur necessitad e prioritad.

La dumondas vegnan respundidas suandantamain:

1. A basa da l'artitgel 20 al. 5 LF davart il guaud e da l'artitgel 25 al. 2 da la lescha forestala dal chantun sto il chantun garantir ina tgira minimala dal guaud, premess che la funcziun da protecziun pretenda quai. Uschia resorta cleramain l'obligaziun legala d'intimar ils proprietaris da guaud da tgirar lur guauds da protecziun a moda necessaria e dals sustegnair finanzialmain en quest connex. Sch'i fa basegn po il chantun er prender mesiras substitutivas (art. 50 LF davart il guaud ed art. 50 LfoC). In guaud da protecziun intact è a la fin dals quints il pli favuraivel "rempar" per proteger abitadis e vias.

2. Il chantun vegn er en avegnir a pretender da la confederaziun ils contingents da credit necessaris per la tgira dals guauds da protecziun.

3. Per tut ils proprietaris da guaud exista la pussaivladad da dumandar il chantun e la confederaziun per sustegn finanzial -en il rom da projects da guaud- per la tgira da guauds da protecziun. Persunas da contact per dumondas en quest connex As stattan a disposiziun tar l'uffizi forestal dal Grischun.

Da la vista dal chantun sto la tgira dals guauds da protecziun vegnir garantida. En temps da paucas da resursas èsi inevitabel da metter accents e prioritads da realisar.


Datum: 11 da favrer 2003