Navigaziun principala

Cuntegn da la pagina

Dumonda en scrit concernent la preschientscha da l'Orchestra della Svizzera Italiana (OSI) en il chantun Grischun

Sessiun: 26.11.2002
Durant la stad da l'onn 2002 è l'Orchestra della Svizzera Italiana (OSI) sa preschentà trais giadas en il chantun Grischun: a Puschlav, a Mustér ed a Santa Maria.
La preschientscha da l'OSI en noss chantun, che sa basa sin las relaziuns istoricas cun l'orchester or dal temp da la segunda guerra mundiala, è da grond'impurtanza e pussibilitescha d'offrir ina purschida culturala ed il medem mument in'attracziun turistica. En quest lieu duai vegnir menziunà ch'en il chantun Grischun èsi mo limitadamain pussaivel d'offrir concerts cun in orchester occupà cumplettamain.

Areguard quests fatgs vegn l'onuraivla regenza dumandada, sche:

1. ella è da l'opiniun che las represchentaziuns da l'OSI en noss chantun duain vegnir promovidas er en l'avegnir?

2. ella è da l'opiniun che la collavuraziun cun il turissem duai vegnir rinforzada per meglierar l'effect turistic da questas occurrenzas (concerts)?

Cuira, ils 26 da november 2002

Name: Keller, Lardi, Giuliani

Session: 26.11.2002
Vorstoss: rg SchriftlicheAnfrage


Resposta da la regenza

Il sustegn da l'Orchestra della Svizzera Italiana (OSI) entras il chantun Grischun ha ina lunga tradiziun. Dapi l'introducziun da la lescha per promover la cultura en l'onn 1998 sustegna il chantun Grischun il OSI mintg'onn cun contribuziuns regularas or dals meds dal budget. Or dal medem conto vegn er sustegnì l'orchester da chombra dal Grischun che concertescha savens en noss chantun. Il OSI n'ademplescha betg mo ina funcziun impurtanta che promova l'identitad en Svizra, mabain el è per il chantun Grischun in excellent enritgiment cultural. Igl è il sulet grond orchester da sinfonia cun muntada internaziunala che sa preschenta regularmain en differents lieus da noss chantun.

Davart las dumondas concretas prenda la regenza posiziun sco suonda:

1. La regenza è da la medem'opiniun sco il dumandader ch'ils concerts dal OSI en il chantun Grischun duain vegnir promovids er en l'avegnir. Il sustegn finanzial da quests concerts è dal reminent garantì tras contract.

La regenza è da l'opiniun ch'i saja da tschertgar ina meglra collavuraziun cun las organisaziuns turisticas da noss chantun sinaquai ch'er il turissem possia profitar da l'offerta d'aut nivel cultural dal OSI (però er da l'orchester da chombra dal Grischun). Per quest intent duai “Grischun vacanzas” vegnir dumandà d'instradar ils pass correspundents.

Datum: 25 da favrer 2003