Navigation

Inhaltsbereich

Postulat concernent l'adattaziun da las directivas per la commerzialisaziun da muvel da maz e da nursas

Sessiun: 27.11.2002
En il chantun Grischun n'han bundant 50 % dals manaschis agriculs nagin contingent da latg. Quests manaschis senza producziun da latg per la vendita sa concentreschan en emprima lingia sin la tratga da vatgas-mamma u sin l'engrasch da vadels sco sectur principal da manaschi. La producziun annuala da vadels da maz munta a ca. 4500 chaus. Ca. 90 % da quels vegnan commerzialisads cun in label. Da quels vegnan vendids puspè ca. 75 % directamain or d'uigl, il rest sur ils martgads publics.
Il nov concept chantunal per la commerzialisaziun dal muvel da maz è vegnì mess en vigur per il 1. da settember 2002. La contribuziun pajada sa cumpona tar la spezia muvel gross d'ina premia da qualitad e d'ina premia da commerzialisaziun. In supplement per la producziun tenor label e per la commerzialisaziun directa po er vegnir pajà.
Sco criteri supplementar è fixada ina limita da vegliadetgna da 5 mais. Questa limita ha per consequenza che per vadels da maz na po betg vegnir pajada ina contribuziun.

Las postulantas ed ils postulants dumondan uss la regenza:

1. da far in'adattaziun da las directivas per la commerzialisaziun da muvel da maz e da nursas. Tras quella duain pudair profitar da nov spezialmain ils purs da vadels da maz da quests pajaments da contribuziuns;

2. d'adattar il dretg da contribuziuns, en moda che la vegliadetgna per animals da la spezia muvel gross vegn fixada da nov sin 3 mais.

Cuira, ils 27 da november 2002

Nums: Farrér, Schmid (Val S. Pieder), Caviezel (Pitasch), Barandun, Battaglia, Berther (Mustér), Bischoff, Bucher, Capaul, Casanova (Vignogn), Cathomas, Cavigelli, Christoffel, Dalbert, Darms, Giuliani, Heinz, Joos, Koch, Luzio, Maissen, Noi, Patt, Peretti, Pfenninger, Plozza, Ratti, Righetti, Rizzi, Sax, Stoffel, Thomann, Thöny, Zanolari

Session: 27.11.2002
Vorstoss: rg Postulat



Resposta da la regenza

Sa basond sin il conclus da la regenza dals 13 d'avust 2002, prot. nr. 1107, ha decretà il departament da l'intern e da l'economia publica directivas per manar tras la commerzialisaziun da muvel da maz e da nursas. Questas directivas èn entradas en vigur il 1. da settember 2002. La finamira da las mesiras decretadas è da garantir e da promover en tut las regiuns dal chantun la commerzialisaziun da muvel da maz e nursas. Latiers èn la transparenza e la concurrenza noziuns impurtantas. Cun l'adattaziun van ins novas vias. Fin ussa ha principalmain il chantun promovì il martgà public. Da nov po vegnir fatg sur in'associaziun da vendita commerzi cun muvel da maz e nursas independentamain da la plazza da martgà e dal temp. Cun quest instrument pon ins reagir pli bain sin dumonda ed offerta.

En las directivas ch'èn en vigur dapi il 1. da settember 2002 èn vegnidas resguardadas las categorias d'arments e da nursas ch'èn vegnidas sustegnidas fin ussa. Ils arments sut tschintg mais, ils vadels da maz, èn cun quai exclus dal sustegn. Il nov concept da commerzialisaziun acceptass però da resguardar ils vadels da maz, ord dus motivs èsi per il mument da renunziar ad in sustegn dals vadels da maz.

Primo stattan a disposiziun per il nov concept da commerzialisaziun ils medems meds finanzials sco avant. Per il mument èsi intschert co che la commerzialisaziun sur l'associaziun da vedita sa sviluppa. Perquai èsi difficil da stimar il basegn da daners.

Secundo è il martgà per vadels da maz anc adina intact. L'onn passà èn ils pretschs per vadels da maz s'augmentads per 4%, entant che quels per muvel d'elavuraziun (vatgas e trimas) e per muvel da maz (taurs) èn crudads per 23% e dapli.

Suenter in onn vegn reponderà la situaziun actuala e decidì sch'il concept duai vegnir sviluppà vinavant u betg.

Sin basa da questas explicaziuns fain nus la proposta da refusar il postulat Farrér davart l'adattaziun da las directivas per la commerzialisaziun da muvel da maz e da nursas.


Datum: 14 da schaner 2003