Navigation

Inhaltsbereich

Interpellaziun concernent la permissiun per lavur da dumengia en l'industria da construcziun da San Murezzan

Sessiun: 27.11.2002
L'Engiadin'ota s'allegra actualmain d'ina dumonda animada da bajegiar. In grond project da construcziun a San Murezzan è vegnì surdà ad in impressari general da l'exteriur. Ils impressaris principals sco er ils subimpressaris ch'èn incumbensads cun la realisaziun dattan lavur surtut a forzas da lavur da l'exteriur.
Avair avunda persunal a disposiziun per la realisaziun d'in grond project da construcziun tar in program da construcziun cumpact ed en gronda distanza da la sedia d'ina interpresa chaschuna gronds custs. Per guntgir a questa pressiun da custs vegni pruvà d'optimar il temp d'acziun per collavuratur.
Pussaivladads confurmas a la lescha per far frunt a la pressiun da termins èn, dasper il stgaffir premissas tecnicas, il schlargiament dal temp da lavur quotidian ed emnil, la realisaziun da lavur en squadras u l'engaschament da pli persunal.
Igl è scumandà a lavurants da lavurar durant il temp tranter sonda 23.00 e dumengia 23.00. Lavur da dumengia transitoria po vegnir permessa da l'autoritad chantunala, sch'in basegn urgent po vegnir cumprovà. L'ordinaziun tar la lescha da lavur regla ils detagls latiers.

Ils interpellants dumondan la regenza:

1. Èsi vair ch'igl è vegnì concedì per in project da construcziun ina permissiun da prestar lavur da dumengia durant pliras dumengias?

2. Sche quai è il cas, ord tge motivs e sin fundament da tge basa legala?

3. Sche quai è il cas, co èsi vegnì examinà avant che dar la permissiun che tut las autras pussaivladads sajan vegnidas exauridas per dumagnar las lavurs che resultan cun meds da planisaziun e cun mesiras organisatorias?

4. Tge mesiras prenda la regenza per garantir che las obligaziuns (p.ex. 50% supplement da paja etc.) colliadas a la permissiun sajan controllablas al lieu?

5. Divida la regenza las preoccupaziuns che las premissas per la realisaziun dal scumond da lavur da dumengia vegnian flaivlentadas cun questa permissiun e ch'i vegnia uschia mess pressiun sin ils MPM?

6. Tge sancziuns pon vegnir decretadas concretamain ad incumbensads fallibels?

Cuira, ils 27 da november 2002

Nums: Parpan, Suenderhauf, Conrad, Berther (Mustér), Brüesch, Büsser, Cahannes, Christoffel, Dalbert, Federspiel, Geisseler, Göpfert, Hardegger, Kehl, Keller, Luzio, Parolini, Parpan, Patt, Peretti, Pleisch, Plozza, Portner, Schmid (Val S. Pieder), Stiffler, Trachsel, Tremp, Tuor (Trun), Vetsch

Session: 27.11.2002
Vorstoss: rg Interpellation



Resposta da la regenza

Tar il project da construcziun en dumonda sa tracti da la construcziun nova e da la restauraziun da l'hotel dal Parc a San Murezzan che vegn realisada da l'interpresa generala Murer-Strabag. L'hotel, en il qual sa chatta er il nov casino, vegn manà da la gruppa Kempinski Hotel SA. Cun la realisaziun dal project vegnan investads fin l'onn 2006 en tut fr. 60 milliuns. L'onn passà èn stadas occupadas 109 interpresas cun ca. 1000 forzas da lavur sin quest plaz da bajegiar. 54 interpresas cun enturn 450 forzas da lavur, pia ca. la mesadad eran interpresas da l'exteriur. Fin il cumenzament da la stagiun era l'industria da construcziun da l'Engiadin'ota occupada fitg bain.

Resposta a las singulas dumondas:

1. I constat che differentas interpresas da construcziun internas han survegnì la permissiun da lavurar la dumengia. I sa tracta da lavurs dal suandant gener: tschentapalantschieus, picturs, tecnica da chasa, montascha da mobiglias.

2. Tenor l' art. 19 al. 2 da la lescha da lavur poi transitoriamain vegnir dà la permissiun da lavurar la dumengia, sche la necessitad è urgenta. Ina necessitad vegn acceptada practicamain tranter auter, sch'i smanatscha a la firma puniziuns convenziunalas per cas che la lavur n'è betg finida a termin. L'interpresa generala ha motivà la dumonda cun las puniziuns convenziunalas e cun las pretensiuns d'indemnisaziuns che la smanatschan en cas che l'hotel na po betg vegnir avert a temp. L'uffizi per industria, mastergn e lavur (UCIML) ha ultra da quai er resguardà che quest enviern han lieu ils campiunadis mundials da skis a
San Murezzan e ch'il turissem grischun na sa possia betg permetter ch'in hotel Kempinski a San Murezzan na possia betg dar dimora a tschients da giasts annunziads perquai ch'il hotel n'haja betg pudì vegnir finì ad ura.

3. En differents discurs cun la direcziun da construcziun èsi vegnì examinà, sch'i na fiss betg pussaivel da lavurar cun dus squadras da lavur al di. Sper il problem ch'ins avess stuì chattar a curta vista praticamain il dubel da lavurants, discurriva encunter il manaschi cun duas squadras er il fatg ch'ins n'avess er betg chattà albiert per tut quels. L'interpresa generala ha gì gia cun il dumber preschent da persunal difficultads da chattar l'albiert necessari en la regiun.

4. Il UCIML ha collià la permissiun en dumonda cun las pretensiuns correspundentas. Ultra da quai èsi vegnì fatg attent a la direcziun da construcziun ed als respunsabels per il persunal en il rom d'ina sesida d'instrucziun a las obligaziuns legalas. Sper ina controlla generala en collavuraziun cun la polizia chantunala, la polizia d'esters ed ils represchentants da la cumissiun professiunala paritetica da l'industria da construcziun, ha il UCIML fatg differentas controllas dal plaz da construcziun, la davosa giada la dumengia, ils 8 da december 2002. Il UCIML ha requirì ils mussaments da paja ed ils fegls da registraziun dal temp da lavur e vegn ad examinar, sch'ils supplements da paja per lavur da dumengia vegnan pajads e sch'ils dis libers prescrits èn garantids.

5. La regenza na parta betg questa preoccupaziun. La lescha da lavur e la pratica sa sviluppada circumscrivan ils fatgs excepziunals a moda relativamain restrictiva, uschia ch'i n'exista betg il privel ch'il scumond da lavurar la dumengia vegnia schlià.

6. Surpassaments da la lescha da lavur han en cas levs in'admoniziun per consequenza, en cas pli grevs vegn ins denunzià tar la procura publica.

La dimensiun da la puniziun va d'ina multa fin sis mais praschun. Ultra da quai exista tar las interpresas da l'exteriur la pussaivladad da prender davent la permissiun da lavur resp. da la refusar a chaschun da la proxima dumonda. Sin fundament da la lescha da submissiun po la regenza dar in'admoniziun u disponer in'exclusiun da la firma a surdadas publicas, però questas sancziuns na vegnan betg a far grond effect a firmas estras.


Datum: 14 da schaner 2003