Navigaziun principala

Cuntegn da la pagina

Interpellaziun concernent la permissiun e la controlla d'offerents e lavurants da l'exteriur

Sessiun: 27.11.2002
Dapi il 1. da fanadur da quest onn èn ils contracts bilaterals e pia er la cunvegnientscha davart la libra circulaziun da persunas en vigur. En connex cun il martgà da lavur liberalisà pon ins constatar che surtut en las regiuns da cunfin da noss chantun vegnan fatgas lavurs pli e pli d'offerents da l'exteriur. Uschia è vegnida surdada la realisaziun d'in grond project da construcziun a San Murezzan ad in offerent da l'exteriur. Ils impressaris principals sco er ils subimpressaris ch'èn incumbensads cun la realisaziun dattan lavur surtut a forzas da lavur da l'exteriur.
Durant ils emprims dus onns suenter l'entrada en vigur da la cunvegna davart la libra circulaziun da persunas sto tenor contract la controlla uffiziala da las cundiziuns da paja e da lavur vegnir cuntinuada en il rom d'enfin ussa.
Il patrun sto inoltrar en scrit in contract da lavur a l'autoritad dal martgà da lavur. Las autoritads dal martgà da lavur èn obligadas da pretender in contract da lavur en scrit ch'è liant e ch'è suttascrit almain da la vart dal patrun. Ultra da quai ston las autoritads dal martgà da lavur examinar quest contract da lavur avant che conceder la permissiun.

Ils interpellants dumondan a la regenza:

1. Èn ils contracts da San Murezzan enconuschents a las autoritads dal martgà da lavur e pon ins vesair ordlonder funcziun, lieu da lavur, durada dal contract da lavur, temp da lavur, paja, prestaziuns socialas e deducziuns?

2. Cun tge mesira po l'autoritad dal martgà da lavur garantir che las disposiziuns dals contracts collectivs da lavur valaivlas ch'èn vegnidas decleradas cun vigur lianta per conclus federal vegnan resguardadas?

3. Tge mesiras prenda la regenza per garantir che las indicaziuns decleradas en las dumondas da permissiun sajan controllablas al lieu?

4. Co po, en connex cun la procedura da permissiun pratitgada, in impressari principal resp. general vegnir obligà d'observar las disposiziuns legalas e collectivas da lavur?

5. Tge sancziuns pon vegnir decretadas concretamain ad incumbensads fallibels?

Cuira, ils 27 da november 2002

Nums: Conrad, Geisseler, Göpfert, Biancotti, Büsser, Butzerin, Cathomas, Caviezel (Cuira), Crapp, Dalbert, Federspiel, Giacometti, Giovannini, Giuliani, Gross, Hanimann, Hartmann, Kehl, Lemm, Luzio, Nick, Parpan, Patt, Peretti, Plozza, Ratti, Suenderhauf, Thomann, Trachsel, Tuor (Trun), Vetsch, Zanolari

Session: 27.11.2002
Vorstoss: rg Interpellation



Resposta da la regenza

1. L'experienza mussa che bleras interpresas estras na fan nagins contracts en scrit cun lur lavurants. Ellas sa basan tar la fixaziun da las cundiziuns da lavur e da paja sin regulaziuns collectivas. La controlla da contracts da lavur esters na faschess nagin senn perquai che cun quels contracts na vegnan tuttina betg resguardadas las cundiziuns da paja e da lavur svizras. Suenter avair discutà cun l'uffizi federal per dumondas dals esters han perquai cumenzà ils chantuns da la Svizra orientala, oravant tut il chantun Grischun, da pretender uschenumnadas confermas da distatga. En questas confermas da distatga ha il patrun ester petent da far las indicaziuns suandantas: denominaziun da l'incumbensa, durada, conferma che la garanzia tras l'assicuranza necessaria è avant maun, funcziun da la forza da lavur, paja da basa, supplement da paja per l'ester, indemnisaziun da las spesas a l'ester. Ina cumparaziun da las prestaziuns e da las deducziuns da l'assicuranza sociala na fa quasi nagin senn areguard ils sistems d'assicuranza sociala uschè divers.

2. Cun il permiss survegnan ils patruns esters in fegl d'infurmaziun ch'als renda attents a las disposiziuns las pli impurtantas da la lescha da lavur ed oravant tut al fatg che las cundiziuns da paja e da lavur localas e da la professiun sco er ch'il contract collectiv da lavur ston vegnir resguardads. La controlla ch'ils contracts collectivs da lavur generals liants vegnian resguardads è fin ussa vegnida fatga en emprima lingia da las cumissiuns professiunalas pariteticas. La lescha federala davart mesiras da sustegn per la libra circulaziun da persunas prevesa explicitamain che las cumissiuns professiunalas pariteticas han questa incumbensa.

3. La cunvegna davart la libra circulaziun da persunas è en vigur dapi il 1. da zercladur 2002. Sin basa da las constataziuns actualas pretenda l'uffizi per industria, mastergn e lavur (UCIML) ch'ils fegls per controllar il temp da lavur vegnian manads sin il plazzal e sajan adina examinabels. In pau pli difficil è la controlla da las pajas sbursadas, perquai che las contabilitads da paja vegnan manadas mintgamai en il pajais da provegnientscha ed ils documents en questiun ston vegnir pretendids. La controlla sin il plazzal è mo pussaivla or da motivs da persunal - en furma da provas da controlla. La partiziun Inspecturat da lavur dal UCIML ha per quella incumbensa in collavuratur, la partiziun Cundiziuns da lavur cun quatter collavuraturAs controlla durant ils emprims dus onns da la fasa transitoria che las cundiziuns da paja e da lavur localas e da la professiun vegnan resguardadas tenor ils contracts inoltrads. Perquai resta mo in temp limità per controllar al lieu las indicaziuns decleradas.

4. Pervi dal princip da tractament egual na datti nagina pussaivladad da far responsabel impressaris generals esters per l'observaziun da las cundiziuns da paja e da lavur localas e da la professiun da tut ils subimpressaris. Perquai vegn pretendì da mintga firma per mintga forza da lavur estra ina conferma da distatga ed i vegn explicitamain rendì attent en il rom da la procedura da permissiun che las cundiziuns svizras da paja e da lavur ston vegnir resguardadas.

5. En branschas che han contracts collectivs da lavur cun vigur lianta han las cumissiuns professiunalas pariteticas la pussaivladad da decretar las sancziuns ch`èn prevesidas en il contract collectiv. Surpassaments da la lescha da lavur han per consequenza en cas levs in'admoniziun, en cas pli grevs vegn ins denunzià tar la procura publica. La mesira dal chasti va da la multa fin sis mais praschun. Sco ulteriura sancziun pon ils permiss da lavur vegnir prendids davent a las firmas estras respectivamain refusads tar dumondas futuras. Sin basa da la lescha da submissiun po la regenza formular in'admoniziun u decretar l'exclusiun d'attribuziuns publicas.


Datum: 14 da schaner 2003