Navigation

Inhaltsbereich

Sessiun: 27.11.2002
Tenor decleraziuns da l'administraziun da taglia dal chantun Grischun èn actualmain ca. 50 % dals pajataglias taxads definitivamain. Quai pertutga las taglias ordinarias. En connex cun las taglias spezialas èn enconuschents cas, tar ils quals las decleraziuns da taglia da l'onn passà n'èn fin oz anc betg taxadas.
Cun questa decleraziun vulessan las sutsegnadas ed ils sutsegnads dentant accentuar expressivamain ch'els n'èn betg da l'avis che l'administraziun da taglia lavuria a moda ineffizienta. Il cuntrari è vair e nus na vulessan betg tralaschar d'engraziar en questa chaschun a l'administraziun da taglia per sia lavur.
Sin basa da las circumstanzas surmenziunadas partin nus dal fatg, ch'i resulta simplamain memia blera lavur. Schebain ch'ins ha engaschà set cumissarias resp. cumissaris da taglia supplementars gia cun midar a la valitaziun postnumerando.
En il chantun Genevra èsi sa mussà ch'ins ha pudì reducir las pendenzas e far meglras controllas cun engaschar supplementarmain cumissarias resp. cumissaris da taglia. La finala ha mintga emploidada supplementara resp. emploià supplementar gudagnà 1 milliun dapli en la chascha statala per il chantun.
Las postulantas ed ils postulants partan dal fatg che tschintg bunas cumissarias resp. buns cumissaris da taglia chaschunassan custs da paja bruts da ca. fr. 750.000.--, ma ch'en la chascha statala fluissan persuenter la fin da l'onn ca. fr. 4 - 5 milliuns dapli.
La regenza vegn envidada da crear il pli spert pussaivel almain 5 plazzas per cumissarias resp. cumissaris da taglia.

Cuira, ils 27 da november 2002

Name: Caviezel (Cuira), Bucher, Pfenninger, Arquint, Capaul, Frigg, Jäger, Locher, Looser, Meyer, Noi, Pfiffner, Schmutz, Schütz, Tremp, Trepp, Zindel

Session: 27.11.2002
Vorstoss: rg Postulat


Resposta da la regenza

Las postulantas ed ils postulants rendan attent a la situaziun da pendenzas tar l'administraziun chantunala da taglia. Ellas ed els partan dal fatg che cun engaschar ulteriuras cumissarias e cumissaris da taglia pudessan vegnir diminuidas las pendenzas ed exequidas meglier las controllas, ed ellas ed els envidan la regenza da stgaffir uschè svelt sco pussaivel almain tschintg plazzas per cumissarias e cumissaris da taglia.

La regenza metta pais sin la constataziun che las relaziuns dal chantun da Genevra n'èn betg senz'auter cumparegliablas cun quellas en il chantun Grischun. En princip parta ella però l'opiniun da las postulantas e dals postulants. Cun engaschar ulteriuras collavuraturas e collavuraturs per l'administraziun da taglia pon vegnir diminuidas pendenzas e la qualitad da la taxaziun po vegnir augmentada. Ils custs da las novas plazzas vegnan pli che finanziads cun las entradas supplementaras eruidas.

La regenza ha prendì si quell'idea da stgaffir novas plazzas per l'administraziun da taglia. Ella propona al cussegl grond en sia missiva davart l'examinaziun da la structura e da la prestaziun per sanar las finanzas chantunalas d'augmentar il dumber da las collavuraturas e dals collavuraturs da l'administraziun da taglia. Uschia vegn il cussegl grond a survegnir gia en la sessiun dal zercladur 2003 la pussaivladad da sa fatschentar cun questas dumondas. El vegn a pudair decider sch'el vul concluder da realisar il postulat per part u cumplettamain.
En quest senn è la regenza pronta d'acceptar il postulat.

Datum: 8 d'avrigl 2003