Dumonda en scrit Schmutz concernent ils temps d'avertura da las butias en la staziun da Cuira
Sessiun: 24.03.2003
La staziun da Cuira vegn actualmain renovada. I sa tracta d'in project da construcziun cumplex. Tenor las comunicaziuns dals auturs dal project duai vegnir realisà en il sutpassadi per ils peduns er in center pli grond da butias e fatschentas.
En il shopville da Turitg èn vegnids amplifitgads ils temps d'avertura da las butias considerablamain. Igl ha dà en quest connex cuntraversas giuridicas pli lungas davart l'admissiun d'ina tala prolungaziun dals temps d'avertura da las butias. Ultra da quai è propi vegnì disturbà l'equiliber commerzial en il conturn da la staziun.
Per Cuira tem jau che la situaziun pudess daventar sumeglianta.
En quest connex sa tschentan suandantas dumondas:
1. È propi planisà en il conturn da la staziun in nov center da butias e fatschentas? Sche bain, nua vegn quest center a sa chattar?
2. A tge legislaziun suttastattan questas fatschentas areguard ils temps d'avertura?
3. Vesa la regenza la pussaivladad che fatschentas en vischinanza da la staziun restian avertas durant 24 uras?
4. Co vegn il persunal protegì en quests manaschis senza glisch dal di?
5. Tge interprenda la regenza per evitar gronds problems en quest connex?
Cuira, ils 24 da mars 2003
Name: Schmutz
Session: 24.03.2003
Vorstoss: rg SchriftlicheAnfrage
Resposta da la regenza
1. Tenor l'infurmaziun da l'uffizi da construcziun bassa da la citad vegn construì en il nov sutpassadi da la staziun in center da fatschentas da ca. 800 m2 fin 1'000 m2. Ultra dals spurtegls da bigliets per las VFF e da la “Bus da la citad da Cuira” SA vegnan collocads en il nov passadi da la staziun 4 fin 5 manaschis da vendita resp. da restauraziun. Previs èn tranter auter in café/manaschi da restauraziun sco er ina fatschenta da victualias-takeaway. Il nov passadi da la staziun vegn fatg accessibel tras in grond portal d'entrada cun mintgamai 2 stgalas mecanicas, uschia che las fatschentas en proximitad da quest portal han per part glisch dal di. In center pli grond da butias e da fatschentas sper il passadi da la staziun n'è betg planisà.
2. Tenor l'art. 39 da la lescha federala da viafier (Lviafier) èn interpresas da viafier autorisadas d'endrizzar manaschis accessoris en staziuns ed en trens, sche quels èn orientads als basegns dals clients da viafier. Tenor l'art. 26 da l'ordinaziun 2 tar la lescha da lavur (LL O2) dastgan las forzas da lavur en kiosks e manaschis per viagiaturs, sco p.ex. posts da vendita e manaschis da prestaziuns da servetsch en staziuns ed eroports, lavurar las dumengias e la notg fin la 01.00 h. Il tribunal federal ha constatà che las disposiziuns surmenziunadas da la lescha federala da viafier e da la lescha da lavur stoppian vegnir interpretadas a moda coordinada, perquai ch'i dat la supposiziun ch'ils manaschis da viafier tenor l'art. 39 Lviafier sajan il medem temp er manaschis per ils basegns dals viagiaturs en il senn da l'art. 26 LL O2. Ils temps d'avertura per ils manaschis accessoris da viafier en il senn da la lescha federala da viafier vegnan fixads en il cas concret da las VFF. Sch'i vegnan fatgas fatschentas en il passadi da la staziun che n'han ni las qualitads d'in manaschi accessori da viafier (art. 29 Lviafier) ni quellas d'in kiosk u d'in manaschi per viagiaturs tenor la lescha da lavur (art. 26 LL O2), alura èn ellas suttamessas a la lescha davart ils temps d'avertura da las butias da la citad da Cuira.
3. Sco menziunà vegnan ils temps d'avertura da las butias da manaschis accessoris da viafier fixads da l'interpresa da viafier. Suenter avair consultà las VFF èsi da partir dal fatg ch'in manaschi da 24 uras n'è betg previs a Cuira.
4. Tenor l'art. 24 al. 5 da l'ordinaziun 3 tar la lescha da lavur (LL O3) sto esser avant maun la vista or en il liber per plazs da lavur permanents. En locals senza fanestras da fatschada èn admess plazs da lavur permanents be, sch'i vegn garantì - tras mesiras spezialas da construcziun e d'organisaziun - ch'ins ademplescha generalmain las pretaisas da la prevenziun sanitara. Plazs da lavur senza glisch dal di n'èn er en la citad da Cuira nagina novaziun. Uschia dispona p.ex. il persunal da vendita en noss gronds negozis be en cas excepziunals da plazs da lavur cun vista or en il liber. Da vart da la medischina da lavur vegni constatà ch'il contact frequent cun ina clientella alternanta è bun da cumpensar per part il dischavantatg che resulta da la mancanza da vista or en il liber. En quest reguard èn ils futurs plazs da lavur en il passadi da la staziun cumparegliabels cun plazs da lavur en gronds negozis. Sco en ils gronds negozis vegnan ins a stuair far attenziun er en il passadi da la staziun che l'illuminaziun da l'interiur vegnia concepida tenor las enconuschientschas da l'associaziun svizra per la glisch (SLG) e tenor il pli nov stadi da la tecnica. La direcziun da construcziun da las VFF ha gia piglià contact cun l'inspecturat chantunal da lavur. En il rom da la procedura d'examinaziun dals plans vegn l'autoritad menziunada a far recumandaziuns davart l'installaziun dals plazs da lavur, spezialmain davart la concepziun dal spazi e da la glisch.
5. Resguardond il fatg ch'il futur passadi da la staziun na vegn betg a disponer da fitg grondas surfatschas da vendita sco p.ex. il shopville a Turitg, daventan obsoletas mesiras profilacticas. Sch'i dat effectivamain problems, alura ston quels vegnir schliads a temp util dals uffizis cumpetents.
Datum: 29 d'avrigl 2003