Navigation

Inhaltsbereich

Interpellaziun Pfiffner concernent l'installaziun da direcziuns da scola

Sessiun: 25.03.2003
Questa stad vegn a cumenzar il segund curs da scolaziun per directurs da scola. Quai ha per consequenza che bleras vischnancas grischunas èn per il mument occupadas cun l'installaziun da lur direcziuns da scola. Il fatg ch'i na dat naginas directivas e nagin agid dal chantun difficultescha massivamain l'incumbensa dals responsabels per la scola. Tut ils documents da basa ston vegnir ramassads u elavurads individualmain. Savens dovri ina tgira externa (e chara) d'ina firma da cussegliaziun. Auters chantuns porschan a lur vischnancas experts per l'accumpagnament e mettan a disposiziun directivas u fegls d'infurmaziun. Quels cuntegnan indicaziuns davart la calculaziun da pensums da direcziun, proceduras electoralas, cundiziuns d'engaschament, carnet da duairs da model per directurs da scola, novas incumbensas e duairs dal cussegl da scola da scolas administradas e.u.v.

1. N'è la regenza betg er da l'avis ch'i saja raschunaivel da sustegnair las vischnancas en lur stentas?

2. Ha la regenza l'intent d'instituir ina gruppa d'experts che sa fatschenta cun l'installaziun da directurs da scola e che elavurescha recumandaziuns per mauns da las vischnancas?

3. Quant lunsch è avanzada la revisiun da la salarisaziun da las magistras e dals magisters? È previsa ina indemnisaziun per ils "pensums da direcziun" da las direcziuns da scola davent da l'onn da scola 2004/05?

(Nus ans referin a la resposta da la regenza sin ina interpellaziun da M. Feltscher da l'october 2001.)

Cuira, ils 25 da mars 2003

Name: Pfiffner, Feltscher, Bucher, Arquint, Bischoff, Brasser, Caviezel (Cuira), Frigg, Hess, Jäger, Locher, Looser, Meyer, Noi, Pfenninger, Pfiffner, Robustelli, Schmutz, Schütz, Zindel

Session: 25.03.2003
Vorstoss: rg Interpellation


Resposta da la regenza

L'impurtanza da direcziuns da scola è s'augmentada considerablamain ils ultims onns. Cunzunt scolas pli grondas èn adina dapli dependentas d'ina atgna direcziun per accumplir lur incumbensas multifarias. Ma er scolas d'ina dimensiun pli pitschna u mesauna tschertgan pussaivladads per surdar lur incumbensas administrativas e pedagogicas a per part cuminaivlas direcziuns professiunalas da scola. La regenza ha stgaffì l'onn 2001 la basa per organisar en il chantun ina furmaziun per directurs da scola. L'emprima purschida da furmaziun han frequentà en tut 32 persunas d'instrucziun grischunas. Sin basa da la gronda dumonda ha la regenza decidì d'offerir a partir da l'onn 2003 in segund e per entant davos curs organisà en il chantun. La partenza da quel segund curs cun 31 participantas e participants è previs per il zercladur 2003.

I na constat betg, sco ch'igl è vegnì sugerì en l'interpellaziun, ch'il chantun na sustegna betg las vischnancas en connex cun l'installaziun da direcziuns da scola. Gist è il cuntrari ch'igl ha en mintga cas lieu in sustegn cun cleras finamiras en il rom da las pussaivladads existentas. Che eventualas renfatschas èn nungiustifitgadas e ston perquai vegnir refusadas mussan er las sequentas respostas a las dumondas fatgas.

1. Resguardond l'autonomia da vischnanca concernent organisaziun e direcziun da lur scola sustegna il chantun las vischnancas tar l'installaziun da direcziuns da scola tranter auter sco suonda:
- Las participantas ed ils participants dals dus curs per directuras e directurs da scola offerids en il chantun survegnan ina contribuziun chantunala da mintgamai maximalmain 5000.- francs. Quest import vegn pajà en etappas suenter avair terminà cun success singuls moduls da furmaziun. Cun quai distgargia resp. sustegna il chantun ils purtaders da scola.

- L'intermediaziun da bunas enconuschientschas per l'installaziun da direcziuns da scola muntan ina part integrala dals curs. Uschia vegnan purtadas en las differentas scolas las enconuschientschas professiunalas necessarias er da las absolventas e dals absovents dals dus curs.

- En il senn d'ina mesira accumpagnanta a las furmaziuns vegn purschì per ils purtaders da scola in bloc d'infurmaziuns per l'installaziun da direcziuns da scola. En il rom da l'emprim curs n'ha quella purschida - pervi da mancanza d'annunzias - displaschaivlamain betg pudì vegnir realisada.

2. L'engaschament d'ina gruppa d'experts n'è betg previs. Documents per l'installaziun da direcziuns da scola en il senn da glistas da controlla, propostas u indicaziuns èn avant maun e pon vegnir consultadas tant en il chantun sco er ordaifer il chantun tar divers purschiders.
Gia che l'installaziun d'ina direcziun da scola tutga tar la cumpetenza da la singula scola ston expertas ed experts ch'ins basegna er per l'installaziun da direcziuns da scola vegnir engaschads directamain dals purtaders da scola. In agid dal chantun tar l'intermediaziun d'expertas e d'experts è pussaivel.

Actualmain vegn preparada ina revisiun parziala da l'ordinaziun davart la salarisaziun dals magisters. En il sboz da revisiun era oriundamain previs ch'il chantun subvenziuneschia pensums da direcziuns da scola. En la missiva da la regenza al cussegl grond davart l'examinaziun da la structura e da la prestaziun per sanar las finanzas chantunalas vegn quest project però menziunà en la rubrica "renunzia a projects cun gronds custs". Uschia vesan ins pir il zercladur 2003 - suenter ch'il cussegl grond ha tractà la missiva numnada - sch'ins po proponer in sistem d'in stimul finanzial davart dal chantun per l'installaziun da direcziuns da scola. Ina entrada en vigur da l'ordinaziun revedida è pussaivla il pli baud sin l'entschatta da l'onn da scola 2004/05.

Datum: 29 d'avrigl 2003