Navigation

Inhaltsbereich

Moziun Bühler concernent l'adattaziun dal process da budgetar (moziun da la CdG)

Sessiun: 25.03.2003
Il process da budgetar per il preventiv 2003 ha mussà las difficultads da pudair diriger en moda fina ed effectiva il budget en il rom da la suveranitad da budget dal cussegl grond.
En connex cun ina situaziun precara da partenza areguard las finanzas, tar la quala la regenza preschenta in sboz dal preventiv cun in grond deficit, la CdG resp. il grond cussegl però scuvra in potenzial da correctura en l'autezza da milliuns per la vart da las expensas, èsi necessari, ch'ins sto repassar tschients da posts dal preventiv. Questa moda da tractar il budget tras il parlament dovra fitg bler temp e sa mussa sco betg pli actuala.
La metodica da la CdG perencunter sa mussa a chaschun dal process da budgetar per il preventiv 2003 en la pratica sco adattada e cun cleras finamiras. Perquai che sia legitimitad è vegnida contestada, duai ella ussa vegnir messa sin ina basa giuridicamain correcta. Perquai sto vegnir stgaffida u adattada analogamain a la confederaziun la basa legala che dat la pussaivladad al cussegl grond da pudair decider tant singulas scursanidas resp. scursanidas spezialas d'expensas sco er directivas globalas da scursanir. Talas scursanidas resp. ina eventuala bloccada dal credit pon però vegnir concepidas differentamain, latiers tutgan er premissas e cumpetenzas per annullar totalmain u per part las bloccadas dal credit. Ina nova regulaziun s'impona a curt termin ed independentamain d'in'eventuala introducziun da GRiforma.
La CdG incumbensescha la regenza da midar la lescha davart las finanzas dal chantun Grischun ed eventualmain autras basas legalas cun l'intent ch'il grond cussagl possia decider tant scursanidas intenziunadas da las expensas sco er scursanidas globalas u bloccadas dal credit en il rom dal process da l'approvaziun dal budget.

Cuira, ils 24 da mars 2003

Name: Bühler, Nigg, Geisseler, Bachmann, Bär, Barandun, Battaglia, Beck, Bischoff, Brüesch, Brunold, Casanova (Vignogn), Cathomas, Catrina, Cavegn, Caviezel (Cuira), Caviezel (Pitasch), Cavigelli, Christ, Christoffel, Claus, Conrad, Dalbert, Demarmels, Donatsch, Farrér, Federspiel, Feltscher, Giovannini, Göpfert, Gross, Hanimann, Hardegger, Hartmann, Hess, Hübscher, Joos, Juon, Kehl, Keller, Kessler, Lardi (Puschlav), Lardi (Le Prese), Lemm, Loepfe, Marti, Möhr, Montalta, Nick, Noi, Parolini, Parpan, Patt, Peretti, Pfenninger, Plozza, Portner, Quinter, Ratti, Righetti, Robustelli, Scharplatz, Stiffler, Suenderhauf, Suter, Thomann, Thöny, Trachsel, Tramèr, Tscholl, Tuor (Trun), Valsecchi, Walther, Wettstein, Zarro, Zegg

Session: 25.03.2003
Vorstoss: rg Motion


Resposta da la regenza

En il tractament supplementar dal preventiv 2003 tras il cussegl grond ha la CdG incumbensà la regenza da midar la lescha davart las finanzas dal chantun Grischun uschia, ch'il cussegl grond po decider sper scursanidas sistematicas d'expensas da nov er scursanidas globalas da credits u bloccadas da credits. Cun quai duai il cussegl grond, en cas da gronds deficits dal preventiv, cuntanscher meglieraziuns considerablas dal preventiv senza grondas discussiuns da detagl. La basa legala necessaria duai vegnir stgaffida a curt termin ed independentamain d'ina eventuala introducziun da GRiforma.

La regenza è da princip da l'opiniun da la CdG ch'ulteriurs pass sin via vers ina direcziun globala dal preventiv duain vegnir examinads. Uschia pudessi senz'auter esser adattà da prescriver ina limitaziun per las expensas permessas per il persunal u per tscherts secturs d'incumbensas. Talas propostas ha la regenza er applitgà pli e pli ils ultims onns a l'intern da l'administraziun per il process da budgetaziun.

La regenza metta pais sin quai che novs instruments directivs èn cumpatibels cun ils princips dal model armonisà da contabilitad (MAC) per las administraziuns publicas. La confederaziun, ils chantuns e las vischnancas sa stentan, en connex cun il svilup constant dal MAC, da cuntanscher ina armonisaziun uschè auta sco pussaivel. Uschia na pon vegnir fatgas da princip naginas expensas senza in credit concedì. La cumpetenza da conceder credits ha il parlament e l'executiva decida davart l'utilisaziun dal credit. Questa regulaziun correspunda al standard per ils budgets publics ed effectuescha ina clera cunfinaziun da las cumpetenzas e responsabladads. Il budget annual sto ultra da quai pudair vegnir fixà definitivamain mintgamai avant l'entschatta da l'onn.

Tenor la moziun da la CdG duai il cussegl grond er pudair far - sper la permissiun dals contos singuls - scursanidas globalas da credits . Prescripziuns globalas han mo in senn sch'il cussegl grond na fixescha betg il medem mument ils credits sin il stgalim dals contos singuls dals secturs pertutgads. La realisaziun concreta resp. la cumpetenza da conceder credits na dastga però betg vegnir delegada simplamain a la regenza. Ina delegaziun a la CdG para perencunter d'esser cumpatibla cun la separaziun da las pussanzas sco ch'ella vegn pratitgada en las cuminanzas publicas. La suveranitad concernent il preventiv resta en quest cas tar il parlament. Relativ al budget 2003 duess la CdG survegnir la cumpetenza d'approvar definitivamain in budget supplementar cun contos singuls ch'èn vegnids adattads areguard l'import.

L'instrument d'ina bloccada da credits sco quai che la confederaziun al enconuscha dapi l'onn 1997 vegn fitg datiers ad ina scursanida lineara da las contribuziuns. Per il budget federal che vegn engrevgià oravant tut da pajaments da transfer po ella avair in effect correspundent. Ella dat al parlament la cumpetenza da scursanir ils credits da budget betg liads giuridicamain en moda lineara per ina tscherta procentuala p.ex. per dus pertschient. Per il preventiv dal chantun Grischun para ina bloccada da credit tenor il muster da la confederaziun sper la pussaivladad existenta da scursanir linearmain contribuziuns d'esser pauc adattada. Ella fiss però applitgabla areguard l'administraziun a moda relativamain simpla senza studi da detagl dals documents dal budget. Ella na permettess dentant nagina differenziaziun tenor prioritads politicas u tenor libertads d'agir concernent il manaschi. Ella excludess facticamain mesiras intenziunadas da distgargia u chaschunass da l'autra vart cumulaziuns problematicas. Er augmentass ella considerablamain il squitsch sin surpassaments da credits.

Il dretg da finanzas ed il process da budgetaziun èn cumplexs. Tenor l'opiniun da la regenza na pon ils instruments directivs globals che vegnan pretendids betg vegnir concepids independentamain d'ina examinaziun generala dal dretg da finanzas. Ina regulaziun globala consequenta e pir pussaivla, sche tut las finanzas dal chantun vegnan manadas cun budgets globals ed incumbensas da prestaziun.

Areguard il plan da termins per l'adattaziun pretendida da la basa legala èsi da resguardar che la libertad d'agir per scursanidas linearas globalas da credits pudess esser duvrada per gronda part suenter la realisaziun da las mesiras per sanar il preventiv. Ulteriuras prestaziuns stuessan vegnir scursanidas; quai è insatge che sa lascha realisar a curta vista mo a moda limitada.

La regenza ha l'intenziun da preschentar al cussegl grond l'onn vegnint ina revisiun da la lescha davart las finanzas. Ella è pronta d'examinar - sco menziunà - las dumondas dals moziunaris en il rom global da quest project da revisiun.

Datum: 29 d'avrigl 2003