Navigation

Inhaltsbereich

Moziun Portner concernent la regulaziun da l'execuziun da chastis e mesiras sco lescha

Sessiun: 25.03.2003
L'execuziun da chastis e mesiras è actualmain reglada en noss chantun en in'ordinaziun, numnadamain en l'ordinaziun da la regenza davart l'execuziun da chastis e mesiras en il chantun Grischun (OCM) dals 16 da december 1985 (DG 350.460). Da l'autra vart sa basa quella tranter auter sin l'art. 28 da la constituziun chantunala sco er sin ils art. 181 e 186 da la lescha davart la procedura penala (PP).
Or da l'optica odierna dal dretg public na basta questa regulaziun betg: La convenziun europeica dals dretgs umans e la giurisdicziun dal tribunal federal pretendan per quest champ sensibel ina regulaziun sco lescha. I vala da cumpensar quest manco e da relaschar per quai ina lescha en il senn furmal.
Cun questa lescha duain ins cuntinuar cun la pratica vertenta ma er serrar largias da la legislaziun sco numnadamain tar la medicaziun sfurzada e tar il nutriment sfurzà da las persunas ospitalisadas. Ultra da quai duain vegnir regladas las cumpetenzas da tut ils stgalims en moda pli clera.
Plinavant pon ins sclerir dumondas, p.ex. sch'ins duai en il futur prender per forza ina prova da DNA da tut las persunas ospitalisadas u sche las disposiziuns vertentas resp. las mesiras dal servetsch d'identificaziun bastan. Il medem vala per la surveglianza da la correspundenza, nua che uffizis duain eventualmain survegnir il medem status giuridic sco plevons, medis ed advocats. En tscherts cas da suspect e suenter preannunzia duain ins pudair controllar las brevs. Er fiss da discutar la regulaziun dals custs senza spustar la repartiziun dals custs tranter il chantun e las vischnancas. Il chantun pudess prefinanziar ils custs da las mesiras penalas sco er ils custs extraordinaris da l'execuziun dal chasti e metter els directamain a quint da la repartiziun da las chargias.

Cuira, ils 25 da mars 2003

Name: Portner, Trachsel, Roffler Arquint, Battaglia, Beck, Berther (Mustér), Berther (Sedrun), Biancotti, Bischoff, Brüesch, Bucher, Bühler, Büsser, Capaul, Casanova (Vignogn), Cathomas, Cavegn, Caviezel (Pitasch), Cavigelli, Christ, Christoffel, Crapp, Dalbert, Demarmels, Farrér, Federspiel, Geisseler, Gross, Hardegger, Hess, Hübscher, Joos, Juon, Keller, Kessler, Lardi (Le Prese), Lemm, Locher, Loepfe, Luzio, Maissen, Märchy, Marti, Meyer, Noi, Peretti, Portner, Quinter, Righetti, Robustelli, Sax, Schmid (Sedrun), Schmid (Val S. Pieder), Stiffler, Tuor (Mustér), Tuor (Trun), Vetsch

Session: 25.03.2003
Vorstoss: rg Motion


Resposta da la regenza

L'execuziun da chastis e mesiras vegn actualmain reglada en il chantun Grischun cun l'ordinaziun da la regenza davart l'execuziun da chastis e mesiras en il chantun Grischun (OCM). Lien èn normadas substanzialmain las incumbensas e la realisaziun da l'execuziun sco er la posiziun dals praschuniers resp. lur dretgs e duairs. Questa ordinaziun sa basa sin l'art. 28 da la constituziun chantunala sco er sin ils art. 181 e 186 da la lescha davart la procedura penala (PP). Ultra da quai ston vegnir resguardadas las disposiziuns da la cunvegna dals chantuns da la Svizra orientala davart l'execuziun da chastis e mesiras da la quala il chantun Grischun fa part. E finalmain èn decisivas per l'execuziun da chastis e mesiras cun privaziun da la libertad las disposiziuns dal cudesch penal svizzer.

Per il sectur dal dretg penal sto ultra da quai vegnir resguardà il svilup sin plaun federal. Ils 21 da settember 1998 ha il cussegl federal deliberà la missiva per midar il cudesch penal svizzer (BBl 1999 1979). Lien ha el proponì al parlament ina revisiun totala da las disposiziuns generalas dal cudesch penal (CP) e da la lescha penala militara (LPM) sco er da relaschar ina nova lescha davart il dretg penal per giuvenils. L'intent central da la revisiun è la reordinaziun e la differenziaziun dal sistem da sancziun. Sper quai cuntegna il project novaziuns sco il schlargiament da la cumpetenza per persequitar delicts commess a l'ester, reglas simplifitgadas per la surannaziun u la punibilitad da l'interpresa. Il dretg penal per giuvenils duai alura vegnir distatgà en ina lescha federala separata dal dretg penal per creschids. Il termin da referendum è scadì ils 3 d'avrigl 2003 nunduvrà.

Per ils chantuns resultescha da la revisiun da la part generala dal cudesch penal in basegn general d'agir sin divers livels. Per l'ina daventan necessarias vastas lavurs per l'adattaziun da la legislaziun dals decrets chantunals correspundents. En quest rom ston er vegnir adattadas a las directivas dal dretg federal tant la procedura penala chantunala e l'ordinaziun davart l'execuziun da chastis e mesiras sco er la cunvegna dals chantuns da la Svizra orientala davart l'execuziun da chastis e mesiras. Per l'autra daventan necessarias mesiras da construcziun e da manaschi. A la fin sto vegnir sclerì tranter ils chantuns il basegn d'infurmaziun e d'instrucziun ed ils andaments da l'acziun ston vegnir coordinads.

Las lavurs preparativas correspundentas èn er vegnidas iniziadas en il chantun Grischun. Cun il conclus dals 8 d'avrigl 2003 (nr. dal protocol 504) ha la regenza installà ina gruppa da lavur cun l'incumbensa d'eruir en detagl il basegn d'agir sco er d'elavurar l'adattaziun da la legislaziun en il dretg chantunal. Las dumondas fatgas ed ils problems menziunads en questa moziun ston vegnir examinads ed instradads en il rom da questas lavurs.

La regenza sa declera en quest senn pronta d'acceptar la moziun e da preschentar al cussegl grond ina nova regulaziun da l'execuziun da chastis e mesiras sco lescha.

Datum: 29 d'avrigl 2003