Navigation

Inhaltsbereich

Postulat Bucher concernent differentas purschidas da terapia per uffants e giuvenils en il chantun Grischun

Sessiun: 25.03.2003
A chaschun da la sessiun da matg 2001 ha deputà al cussegl grond Martin Jäger inoltrà in postulat, il qual intenziunava la coordinaziun da las differentas purschidas da terapia per uffants e giuvenils. La regenza era pronta da prender encunter quest postulat, d'examinar a vista mesauna las structuras da las purschidas da terapia numadas e sclerir, sche questas purschidas possian vegnir coordinadas sur in post da consultaziun unitar. Il cussegl grond ha assegnà l'october 2001 il postulat cun .. tar .. vuschs.
Las examinaziuns ordinadas dal DECA davart il postulat Jäger èn vegnidas elavuradas dals manaders dals posts pertutgads. En la posiziun ch'è resultada da quai ha cusseglier guvernativ Lardi formulà las mesiras sco suonda: Il post da consultaziun unitar è mo raschunaivel tar dumondas e problems or dal sectur da la scola e da la scolina. Il post da consultaziun duai esser l'uffizi per secturs spezials da scola (DECA) u en il conturn da Cuira la cussegliaziun da scola e d'educaziun. Concernent la coordinaziun dals differents posts da terapia per uffants e giuvenils n'èn anc nagins resultats avant maun. L'onn 2000 è vegnì fatg per incumbensa da la regenza in rapport davart las prestaziuns e las juncziuns en la cussegliaziun e la terpia per uffants e giuvenils. Da quest rapport resulta che tant las sinergias sco er las pussaivladads d'entradas na vegnan betg explotadas dal tuttafatg.
En il senn d'ina coordinaziun da las purschidas da terapia ed en il senn d'ina economia equilibrada dumondan las postulantas ed ils postulants la regenza d'examinar ils suandants puncts:
1. Las midadas da structura che pussibiliteschan ina coordinaziun da la purschida da terapia.
2. L'explotaziun da las pussaivladads d'entradas finanzialas en la purschida da terapia psicosociala ch'exista en il chantun Grischun.
3. L'installaziun d'in post da consultaziun unitar en il chantun, il qual fiss abel da garantir il diever dals potenzials da vart da las entradas e da decider davart la triascha professiunala.

Cuira, ils 25 da mars 2003

Name: Bucher, Pfiffner, Marti, Arquint, Augustin, Brasser, Butzerin, Caviezel (Cuira), Caviezel (Pitasch), Cavigelli, Christoffel, Frigg, Hardegger, Jäger, Joos, Kessler, Koch, Locher, Looser, Meyer, Noi, Pfenninger, Portner, Schmutz, Schütz, Trepp, Zindel

Session: 25.03.2003
Vorstoss: rg Postulat


Resposta da la regenza

L'activitad terapeutica che tschertga principalmain da far diagnosas e tractaments da malsognas sa lascha cunfinar relativamain cler envers la cussegliaziun psicologica e l'agid pedagogic-psicologic. Las terapeutas ed ils terapeuts han fatg ina scolaziun uffiziala speziala. Las noziuns da la cussegliaziun psicologica u pedagogic-psicologica en cuntrari n'èn betg protegidas dal stadi. Las purschidas da cussegliaziun èn drizzadas - sco intervenziuns a curta durada en il senn da l'agid per gidar a sasez - a l'emprender scolastic u a la meglieraziun da la cumpetenza educativa (cussegliaziun educativa). La persuna da cussegliaziun n'è però betg legitimada da far diagnosas e da far giu quint per terapias correspundentas sur ina cassa da malsauns u sur in'assicuranza d'invaliditad. Il temp impundì en il sectur d'activitad da la cussegliaziun psicologica e da l'agid pedagogic-psicologic sa differenziescha per regla cleramain da quel ch'è vegnì impundì en la terapia. In'unitad da scleriment e da cussegliaziun n'importa per regla betg dapli che 4 8 sesidas. Da l'autra vart èn dal temp nà terapias per il solit cleramain pli intensivas e pli lungas (cf. psicoterapia, terapias da logopedia, terapias psicomotoricas, terapias da legastenia). En cas da suspect d'in disturbi da sanadad ston ils clients vegnir encuraschads da las persunas da cussegliaziun da consultar ina terapeuta u in terapeut, il medi da chasa u in psichiater (d'uffants).

L'installaziun d'in post da consultaziun unitar per purschidas d'agid, da cussegliaziun e da terapias en il Grischun è gia stà object dal postulat Jäger concernent la colliaziun da las diversas purschidas da la cussegliaziun da scola e d'educaziun e dals differents servetschs da terapia per uffants e giuvenils, il qual il cussegl grond ha assegnà durant la sessiun da schaner 2002 cun 82 cunter 0 vuschs. Il departament d'educaziun, cultura e protecziun da l'ambient ha sutdividì la realisaziun da quest postulat en mesiras a curta vista ed en mesiras a vista mesauna. Las mesiras a curta vista èn vegnidas realisadas, quellas a vista mesauna èn en planisaziun.

Uschia è vegnì fixà sco mesira a curta vista il post da scola e da cussegliaziun dal servetsch psicologic da scola sco emprim post da consultaziun per coordinar la purschida da cussegliaziun e da terapia en cas difficultus resp. cas da dubi en dumondas da scola e da scolina. La dretga triascha professiunala è garantida sin questa via.

L'explotaziun da las pussaivladads d'entradas finanzialas en la purschida existenta da terapias psicosocialas en il chantun Grischun è stà l'object dal rapport da l'onn 2000 , il qual è vegnì menziunà en il postulat - davart las prestaziuns e las juncziuns dal servetsch psichiatric per uffants e giuvenils dal Grischun (SPUG) sco er dal servetsch psicologic da scola en il spievel da TarMed. La regenza è pronta d'examinar questa dumonda anc ina giada a temp util. Tenor il rapport menziunà duai però vegnir desistì enfin a nov urden dals pass ad ina fusiun dal servetsch psichiatric per uffants e giuvenils dal Grischun sco er dal servetsch psicologic da scola sut in tetg communabel. L'examinaziun la pli baud pussaivla da questa dumonda sa dat tenor il rapport suenter in pèr onns experientscha cun TarMed. Fin alura sto il quadrifoglio garantir ch'ils potenzials davart da las entradas vegnan exauridas. En il quadrifoglio sa scuntran ils manaders da l'uffizi chantunal da servetsch social, dal servetsch psichiatric per uffants e giuvenils, dal servetsch psicologic da scola e dal servetsch da pedagogia curativa a discussiuns regularas.

La regenza è pronta d'acceptar il postulat cun questas restricziuns.

Datum: 29 d'avrigl 2003