Navigation

Inhaltsbereich

Postulat Caviezel concernent la deducziun da sustegn e la deducziun per uffants tar geniturs divorziads d'uffants maiorens en il dretg chantunal da taglia

Sessiun: 25.03.2003
Tenor la lescha chantunala da taglia po, tar conjugals divorziads, la persuna obligada da pajar taglia che contribuescha aliments (per regla il bab) far deducziuns per uffants, sch'in uffant maioren è en scolaziun. Ad ina mamma d'in uffant maioren ch'è en scolaziun na vegnan però concedidas naginas deducziuns. Ella na po far valair ni la deducziun per uffants u la deducziun da sustegn ni la deducziun da famiglia; ultra da quai vegn applitgada la tariffa per persunas che vivan sulettas.
Cun la sentenzia dals 23 da schaner 2002 ha il tribunal federal vis questa problematica ed interpretà correspundentamain l'art. 35 al. 1 lit. a e b da la lescha federala davart la taglia federala directa (LTFD) dals 14-12-1990. Tenor quella na cuntradi numnadamain ni al text ni al senn da la lescha, sche la deducziun per uffants vegn concedida ad ina mamma ch'educhescha suletta e ch'è divorziada e sche en medem mument vegn er concedida ina deducziun da sustegn al bab che pajà aliments per in uffant maioren ch'è en scolaziun. La lescha excludia numnadamain mo ch'in dals geniturs possia far valair il medem mument la deducziun da sustegn e la deducziun per uffants. Però na resulta betg londeror ch'ins stoppia refusar la deducziun per uffants a la mamma ch'educhescha suletta perquai che la deducziun da sustegn vegn concedida al bab che paja u viceversa. Tar la deducziun per uffants sa tracti numnadamain d'ina deducziun sociala, la quala na sa refereschia betg a l'obligaziun da pajar taglia per las prestaziuns alimentaras, mabain a las atgnas prestaziuns d'aliments per part pajadas en natiralias (p.ex. pli gronda abitaziun = pli auts custs da locaziun) ed a la prestaziun economica ch'è reducida pervia da la tgira d'uffants. A la remartga ch'uffants maiorens na basegnan da nagina tgira ston ins cuntradir. Per regla na cuschinan, nettegian e lavan els numnadamain betg sezs.
La regenza vegn perquai envidada d'introducir questa giurisdicziun dal tribunal federal davart l'art. 35 al. 1 lit. a e b LTFD er sin plaun chantunal e da conceder uschia la deducziun per uffants ad ina mamma ch'educhescha suletta in uffant maioren ch'è en scolaziun.

Cuira, ils 25 da mars 2003

Name: Caviezel (Cuira), Meyer, Pfenninger, Arquint, Augustin, Brasser, Bucher, Cahannes, Cavigelli, Christoffel, Frigg, Hardegger, Hess, Jäger, Locher, Looser, Maissen, Marti, Noi, Pfiffner, Portner, Schmutz, Schütz, Suter, Trepp, Zindel

Session: 25.03.2003
Vorstoss: rg Postulat


Resposta da la regenza

En la pratica davart la lescha da taglia na vegn betg concedida ina deducziun per uffants ad in genitur ch'è suttamess separadamain a la taglia ed il qual viva cun uffants maiorens ch'èn anc en scolaziun; quai, sche principalmain l'auter dals geniturs finanziescha cun ils pajaments d'aliments la vita da l'uffant. Quest genitur n'ha però er betg da pajar taglia per ils aliments pajads a l'uffant. Ils postulants fan attent al fatg ch'i vegn concedì per la taglia federala directa ina deducziun per uffants ed envidan la regenza da surpigliar la pratica da la confederaziun er per la taglia chantunala.

Per la taglia federala directa vegn concedida la deducziun da sustegn - tar geniturs ch'èn suttamess separadamain a la taglia - al genitur che finanziescha principalmain la vita da l'uffant maioren. Il medem mument vegn concedida la deducziun per uffants al genitur che viva ensemen cun quest uffant en in tegnairchasa communabel; ultra da quai vegn applitgada la tariffa per persunas maridadas. Questa pratica sa basa sin ina decisiun dal tribunal federal.

En l'interpretaziun da la lescha da taglia chantunala è l'administraziun da taglia vegnida a la conclusiun che la pratica tar la taglia federala directa na sappia betg vegnir surpigliada per la taglia chantunala. Il genitur, tar il qual l'uffant maioren viva, vegn suttamess a la taglia federala directa medem sco in genitur cun in uffant maioren en medemas relaziuns finanzialas. La circumstanza che tar conjugals divorziads sto in creschì damain viver da las medemas entradas vegn resguardada gist uschè pauc sco il fatg che la vita da l'uffant vegn finanziada principalmain da l'auter conjugal. Quai cuntradì tant a la lescha fundamentala da l'imposiziun da taglia tenor la prestaziun finanziala sco er a la lescha d'egualitad giuridica, cun quai che differenzas en las relaziuns effectivas restan nunobservadas. Però er la voluntad dal legislatur chantunal mussa ch'ins na po betg cumular deducziuns per uffants e deducziuns da sustegn. En la missiva davart la revisiun parziala da la lescha da taglia dals 11-5-1995 è il legislatur parti cleramain dal fatg ch'i na possian betg vegnir concedidas per il medem uffant ina deducziun per uffants ed ina deducziun da sustegn (missivas 1995-96, carnet nr. 2, pag. 153).

La regenza è da la medem'idea concernent il giudicament da l'administraziun da taglia ch'è cumpententa per l'interpretaziun e l'applicaziun da la lescha chantunala e considerescha uschia la pratica d'ozendi sco confurma cun la lescha.

L'imposiziun da taglia dal genitur che viva separà e che viva cun uffants maiorens en il medem tegnairchasa, na dastga betg vegnir midada sin la via da l'interpretaziun da disposiziuns legalas existentas. La dumonda po però vegnir examinada en connex cun la proxima revisiun da l'imposiziun da taglia sin famiglias. La regenza è pronta d'acceptar il postulat en quest senn che la situaziun da taglia da geniturs divorziads che vivan ensemen cun uffants maiorens vegn examinada en la proxima revisiun parziala da la lescha da taglia.

Datum: 29 d'avrigl 2003