Navigaziun principala

Cuntegn da la pagina

Postulat Pfenninger concernent la concentraziun e la decentralisaziun da l'administraziun chantunala

sessiun: 25.03.2003
En connex cun las stentas da spargn ed il pachet da spargn per la sessiun da zercladur 2003 vegn tranter auter discutada resp. examinada er la reorganisaziun e la fusiun da differents uffizis chantunals. En cas d'eventualas restructuraziuns en ils singuls departaments duessi vegnir fatg diever da l'occasiun per na betg mo sclerir dumondas organisatorias, mabain er per realisar meglieraziuns areguard la situaziun da locaziun e las pussaivladads da la concentraziun locala.
L'administraziun chantunala è concentrada il mument quasi exclusivamain en la regiun da Cuira ed ils basegns e las pretensiuns da las regiuns èn in vegl tema. En il rom da la reorganisaziun da l'administraziun chantunala duessi vegnir examinà senza pregiudizis, sche singuls servetschs, gruppas d'uffizis u schizunt entirs departaments na pudessan betg vegnir excorporads gist uschè bain en centers regiunals sco Glion, Tusaun, Landquart, Schiers e.u.v., tantpli ch'en quests territoris stessan a disposiziun per part cumplexs d'edifizis pli gronds a cundiziuns favuraivlas. Sin fundament dals basegns da communicaziun e dals “contacts necessaris cun la clientella” na fiss quai segir betg raschunaivel en tut ils cas. Ma ins po s'imaginar differents uffizis u er departaments, nua ch'ina tala nova domiciliaziun en ils centers regiunals na chaschunass strusch custs supplementars. Ina concentraziun persunala essenziala e respargns spezialmain tar las locaziuns pudessan vegnir realisads uschia.
Ma er en la regiun da Cuira fissi d'empruvar da cuntanscher a media vista ina concentraziun locala pli intensiva dals differents uffizis e la planisaziun correspundenta da las immobiglias stuess vegnir iniziada a temp.
Nus envidain perquai la regenza d'examinar, a chaschun da las proximas reorganisaziuns en l'administraziun chantunala, cun emprima prioritad la concentraziun locala dals differents uffizis e d'examinar seriusamain sch'ina domiciliaziun da singuls uffizis, gruppas d'uffizis u er d'entirs departaments ordaifer la regiun da Cuira è realisabla.

Cuira, 25 da mars 2003

Name: Pfenninger, Hess, Cathomas, Ambühl, Arquint, Barandun, Bühler, Capaul, Casanova (Vignogn), Cavegn, Christ, Frigg, Hanimann, Kehl, Keller, Kessler, Lardi (Puschlav), Looser, Maissen, Pfiffner, Plozza, Quinter, Righetti, Scharplatz, Schmid (Val S. Pieder), Schmutz, Tuor (Trun), Zarro, Zindel

Session: 25.03.2003
Vorstoss: rg Postulat


Resposta da la regenza

37 pertschient da las plazzas da l'administraziun chantunala èn situadas decentralmain dador Cuira en 121 vischnancas. Per giuditgar la decentralisaziun or d'aspects da la politica regiunala è il lieu da domicil (domicil fiscal) d'ina impurtanza anc pli gronda. Qua sa mussa ina decentralisaziun anc pli ferma, damai che las collavuraturas ed ils collavuraturs dal chantun vivan en 190 differentas vischnancas. 917 collavuraturas e collavuraturs vivan a Cuira, 1766 en autras vischnancas. Medemamain èn las immobiglias dal chantun repartidas sin tut il chantun. Il chantun posseda en 108 vischnancas immobiglias ed è en 58 vischnancas locatari d'immobiglias. Da las totalmain 263 relaziuns da locaziun èn 175 ordaifer Cuira. Questas datas mussan che l'administraziun chantunala è fitg decentralisada.

In'ulteriura decentralisaziun da l'administraziun chantunala n'è betg opportuna e n'è betg da tschertgar or da l'optica da l'economia da manaschi (custs, process directivs, svilup da l'organisaziun, communicaziun, martgà da lavur). Uschia poi sa tractar or da la perspectiva da la regenza - er en il senn da la sanaziun currenta dal budget chantunal - mo d'optimar l'administraziun chantunala a Cuira ed en ils subcenters regiunals a moda raschunaivla or da la vista da l'economia da manaschi. Perquai van las stentas da la regenza en las suandantas trais direcziuns:

- ina concentraziun locala pli gronda dals differents uffizis en la regiun da Cuira;
- ina concentraziun a subcenters regiunals dals uffizis situads ordaifer Cuira;
- ina examinaziun da spustar singuls uffizis da Cuira a centers regiunals d'administraziun.

La realisaziun da questas stentas sa basa sin ina planisaziun d'immobiglias correspundenta e mintgamai sin in'analisa dals custs e dal gudogn or da l'optica da l'economia da manaschi. I n`è betg previs d'agir en l'entir chantun, mabain las structuras existentas e creschidas duain vegnir examinadas da cas en cas confurm a la situaziun per las midar eventualmain. Per il svilup futur da l'organisaziun da l'administraziun chantunala sto però valair il primat d'optimar ils custs.

En il senn da questas explicaziuns è la regenza pronta da prender encunter il postulat.

Datum: 29 d'avrigl 2003