Navigaziun principala

Cuntegn da la pagina

Dumonda en scrit Koch concernent la reducziun da las subvenziuns federalas per las vias naziunalas en il Grischun

sessiun: 25.03.2003
Suenter che dacurt l'intenziun da degradar la reclassificaziun positiva da la via dal Partenz ha procurà per inquietezza, audan ins actualmain che la confederaziun vul far da nov reducziuns massivas vi da differents projects da vias naziunalas en il Giura, il Vallais ed il Grischun.
Mia dumonda pertutga il project “sviament da Saas” e l'observaziun da l'urari per la finiziun tenor l'uffizi da construcziun bassa dal Grischun. Cun annualmain vers 3 milliuns passadis tras vischnanca è l'observaziun da l'urari fitg impurtanta per la populaziun da Saas, dentant er per la regiun da turissem Tavau.

Jau dumond la regenza:

1. Co statti cun las reducziuns da las finanzas federalas ch'èn previsas (sviament da Saas)?
2. Pon ins ademplir l'urari actual?

Cuira, ils 25 da mars 2003

Name: Koch

Session: 25.03.2003
Vorstoss: rg SchriftlicheAnfrage


Resposta da la regenza

Cun la reclassificaziun succedida è la via dal Partenz dapi il 1. da schaner 2002 part da la rait da las vias naziunalas. Perquai subvenziunescha la confederaziun tranter auter er ils custs per la construcziun dal sviament da Saas cun 92 %. La primavaira 2002 han ins pudì entschaiver cun las emprimas lavurs per l'access al plazzal e per il provediment cun forza electrica sco er per il provediment d'aua. Tenor urari pon ins quintar cun il sviament da Saas sin la fin da l'onn 2011. Quest termin po però mo vegnir resguardà, sch'ils meds finanzials correspundents stattan a disposiziun.

Tant tar la confederaziun sco er tar il chantun Grischun èn ins il mument vidlonder da far mesiras da spargn rigurusas che pertutgan er il sectur da las vias.
Gia durant l'onn current èn vegnidas fatgas reducziuns tar la construcziun da vias naziunalas. Quellas han surtut tutgà ils chantuns perifers ed ils chantuns muntagnards. Ina reducziun dals meds per la via da sviament da Saas ha cun bain inqual sforz però pudì vegnir impedì. Per il Grischun ha quest sviament en il rom da l'amplificaziun da las vias naziunalas anc adina emprima prioritad.
La planisaziun da finanzas dal chantun cuntegna questas summas correspundentas. La regenza vegn er a s'engaschar vinavant per ch'ils daners necessaris per la construcziun dal sviament da Saas vegnian mess a disposiziun da la confederaziun confurm al temp, uschia ch'i n'avess da dar nagin retard tar la realisaziun da quest project impurtant.

Datum: 29 d'avrigl 2003